O artigo 31 do Estatuto de autonomía de Galicia atribúe competencia plena á Comunidade Autónoma para o regulamento e administración do ensino en toda a súa extensión, niveis e graos, modalidades e especialidades, sen prexuízo das limitacións dos artigos 27 e 149 da Constitución española.
A suspensión da actividade educativa presencial o pasado mes de marzo do presente ano debida á incidencia da pandemia de COVID-19 provocou unha alteración brusca do desenvolvemento do curso 2019/20, o que obrigou, tanto ao profesorado como ao conxunto da comunidade educativa, a facer un grande esforzo para poder dar continuidade á actividade lectiva por medio doutras modalidades de ensino e aprendizaxe.
O presente curso 2020/21 tamén supón un gran reto, ante a necesidade de cumprir cos obxectivos educativos e de sociabilidade necesarios para o desenvolvemento equitativo do alumnado, e facelo aplicando as medidas de prevención e control da COVID-19 para dispoñer de centros educativos seguros.
A aplicación das previsións da normativa sanitaria, así como a aplicación das instrucións específicas do ámbito educativo, pretende favorecer ao máximo a garantía de seguridade e, ao mesmo tempo, a actividade lectiva presencial para o alumnado de todos os niveis e etapas educativas, con prioridade para o alumnado de menor idade. E o cumprimento destas exixencias obriga os centros docentes privados concertados a adaptárense en función das súas posibilidades: número e dimensión das aulas, número de docentes e número e características do alumnado.
Esta orde ten por obxecto establecer a concesión directa, con carácter excepcional, de subvencións para a dotación extraordinaria de recursos económicos que permita aos centros educativos privados concertados afrontar durante o curso 2020/21 o aumento dos gastos derivados do incremento de horas adicionais do profesorado ou da necesidade de adecuar os espazos educativos e a adquisición de material hixiénico-sanitario, no marco da situación excepcional derivada da COVID-19.
O artigo 49 da Lei 6/2019, do 23 de decembro, de orzamentos xerais da Comunidade Autónoma de Galicia para o ano 2020, e os artigos 19.4.c) e 26.3 da Lei 9/2007, do 13 de xuño, de subvencións de Galicia, establecen a posibilidade de conceder, con carácter excepcional, subvencións de forma directa, cando se acrediten razóns de interese público, social, económico ou humanitario, ou outras debidamente xustificadas que dificulten a súa convocatoria pública, logo de autorización do Consello da Xunta de Galicia en atención ao seu importe.
Así mesmo, os artigos 31.6 da Lei 9/2007, do 13 de xuño, de subvencións de Galicia, e 63.3 do Decreto 11/2009, do 8 de xaneiro, que aproba o seu regulamento, permiten excepcionalmente por razóns debidamente xustificadas, o pagamento anticipado aos beneficiarios do importe total da subvención sen exixir ningún réxime de garantías, logo de autorización do Consello da Xunta de Galicia.
No presente caso, a concesión directa da subvención está xustificada pola concorrencia das seguintes circunstancias:
O artigo 9 do Real decreto lei 21/2020, do 9 de xuño, de medidas urxentes de prevención, contención e coordinación para facer fronte á crise sanitaria ocasionada pola COVID-19, establece nos centros educativos unha distancia de seguridade de 1,5 metros e, cando non sexa posible mantela, a observación de medidas de hixiene adecuadas para previr os contaxios.
No ámbito de Galicia, o punto 3.1.A) do Protocolo de adaptación ao contexto da COVID-19 dos centros de ensino non universitario de Galicia para o curso 2020/21 organiza o alumnado de educación infantil e primaria en grupos de convivencia estable, mantendo en todo caso a máxima distancia que permita a aula. Esta opción é a que mellor pode garantir a rastrexabilidade e a xestión dos casos de contaxio que poidan producirse e, así mesmo, permite que os nenos e as nenas poidan socializar e xogar entre eles, ademais de que sería practicamente imposible que manteñan a distancia interpersoal de 1,5 metros.
E a Orde do 16 de setembro de 2020 pola que se ditan instrucións sobre o comezo do curso académico 2020/21 (DOG número 189, do 17 de setembro), para as ensinanzas de educación secundaria obrigatoria, bacharelato, formación profesional e ensinanzas de réxime especial establece que a actividade lectiva será presencial para todos os niveis e etapas educativas, con prioridade para o alumnado con menor idade, mantendo unha distancia de polo menos 1,5 metros na interacción entre persoas no centro educativo, e a máxima que permita a aula entre os postos escolares.
Así mesmo, para o caso de que a aula non permita as distancias indicadas, a devandita orde prevé a adopción dalgunha das seguinte medidas: retirada de mobiliario non indispensable ou a utilización de aulas alternativas e, se tampouco fose posible manter a distancia de 1,5 metros, o centro poderá optar polas seguintes opcións: semipresencialidade rotatoria, agás educación secundaria obrigatoria, instalación de anteparos ou separacións, ou desdobramento de grupos de alumnado.
Todo isto exixe un aumento do número de horas de docencia en función do alumnado. Ademais, tamén pode ser necesario adaptar espazos, ben para acoller novos grupos de convivencia estable, ben para posibilitar a distancia interpersoal de 1,5 metros ou para adaptalos aos plans de continxencia elaborados polos centros; así mesmo, pode ser necesaria a adquisición de material adicional para realizar as separacións.
Así pois, a necesidade de dar unha resposta adecuada ás dificultades que pode xerar no funcionamento dos centros docentes privados concertados a adopción destas medidas e a súa excepcionalidade, engadida á necesidade de asegurar a correcta prestación do servizo público educativo, determina que sexa imprescindible e, pola súa vez xustifica, a tramitación do presente procedemento de concesión directa de subvencións e o pagamento anticipado aos beneficiarios da totalidade do importe concedido no respectivo exercicio, sen ningún réxime de garantías.
Na súa virtude, logo da autorización do Consello da Xunta de Galicia por Acordo do 12 de novembro de 2020, por proposta da Dirección Xeral de Centros e Recursos Humanos,
DISPOÑO:
Artigo 1. Obxecto
A presente orde ten por obxecto a concesión directa de subvencións a centros privados concertados, con carácter excepcional, para poder afrontar no curso 2020/21 os gastos derivados das seguintes actuacións motivadas pola pandemia de COVID-19:
a) Incremento de horas adicionais do profesorado na educación secundaria obrigatoria no período comprendido entre o 23 de setembro de 2020 e o 30 de xuño de 2021.
b) Outros gastos extraordinarios necesarios para a adecuación de espazos educativos, a instalación de anteparos ou separacións e a adquisición de material hixiénico-sanitario.
Artigo 2. Ámbito de aplicación
As subvencións concedidas nesta orde distribuiranse entre os centros privados concertados que impartan o 2º ciclo de educación infantil, educación primaria, educación secundaria obrigatoria, formación profesional básica, de grao medio e superior e educación especial, nos conceptos e contías indicadas no anexo desta orde, resultantes da análise efectuada pola inspección educativa das necesidades de incrementar o profesorado naqueles supostos en que é preciso realizar desdobramentos en educación secundaria obrigatoria, así como dispoñer de diversos materiais para respectar a distancia interpersoal e outras medidas de protección e control en función da tipoloxía dos centros, das unidades concertadas e do alumnado escolarizado en cada centro.
Artigo 3. Procedemento de concesión
As subvencións reguladas nesta orde teñen carácter excepcional e están xustificadas por razóns de interese público, social, económico e humanitario que dificultan a súa convocatoria pública, polo que procede aplicar o procedemento de concesión directa, segundo o previsto no artigo 19.4.c) da Lei 9/2007, do 13 de xuño, de subvencións de Galicia.
Artigo 4. Competencia para a xestión do procedemento
A Dirección Xeral de Centros e Recursos Humanos asumirá a competencia para tramitar o procedemento de xestión e xustificación desta subvención, e o Servizo de Centros é a unidade responsable do procedemento.
Artigo 5. Financiamento
A Consellería de Cultura, Educación e Universidade financiará esta subvención con cargo á aplicación orzamentaria 10.30.423A.482.2, por un importe de 4.546.291,00 € no exercicio 2020 e 2.703.720,00 € no exercicio 2021.
O orzamento para cada unha das actuacións subvencionadas é o seguinte:
1. O incremento para horas adicionais de profesorado de educación secundaria obrigatoria no período comprendido entre o 23 de setembro de 2020 e o 30 de xuño de 2021, por importe de 1.455.844 € para o ano 2020 e na contía de 2.703.720 € para o ano 2021.
2. Outros gastos extraordinarios necesarios para a adecuación de espazos educativos, a instalación de anteparos ou separacións e a adquisición de material hixiénico-sanitario, no período comprendido entre o 1 de setembro e o 31 de decembro de 2020, por importe de 3.090.447 € para o ano 2020.
Artigo 6. Actuacións subvencionadas
1. Contratar profesorado para impartir as horas adicionais de docencia derivadas do desdobramento extraordinario de grupos na educación secundaria obrigatoria motivado pola COVID-19, durante o período indicado no artigo 1.
2. Adecuar os espazos dispoñibles no centro educativo para garantir a distancia interpersoal, instalar anteparos ou separacións nas aulas e adquirir material hixiénico-sanitario (máscaras, hidroxel...), de acordo cos requirimentos mínimos establecidos polas autoridades educativas e sanitarias motivados pola COVID-19.
Os centros docentes deberán distribuír máscaras entre o alumnado matriculado en ensino obrigatorio con rendas baixas e en educación especial, seguindo o procedemento e criterios que estableza esta consellería.
Artigo 7. Condicións previas ao pagamento
1. O pagamento do importe da subvención concedida nesta orde está suxeito ás seguintes condicións:
a) Que o centro estea ao día no cumprimento de obrigas coa Seguridade Social, coa Axencia Estatal de Administración Tributaria e coa Facenda da Comunidade Autónoma de Galicia. A unidade de xestión do procedemento consultará estes datos, agás que o titular do centro beneficiario se opoña expresamente e achegue os documentos.
b) Que o centro beneficiario non renuncie expresamente á subvención.
2. A oposición á consulta automatizada dos datos indicados e a achega dos documentos e/ou a renuncia expresa á subvención, deberán realizarse no prazo de 5 días hábiles seguintes á publicación desta orde de concesión no Diario Oficial de Galicia.
Este trámite farase electronicamente utilizando o modelo PR004A (Presentación electrónica de solicitudes, escritos e comunicacións que non conten cun sistema electrónico específico nin cun modelo electrónico normalizado), dispoñible na sede electrónica da Xunta de Galicia, que irá dirixido ao Servizo de Centros da Dirección Xeral de Centros e Recursos Humanos, e indicará no recadro «Asunto relacionado» o seguinte: «Condicións previas subvencións COVID-19».
3. Cando o resultado da consulta automatizada dos datos indicados poña de manifesto que non está ao día nas devanditas obrigas tributarias e coa Seguridade Social, requirirase o afectado para que, no prazo de 5 días hábiles seguintes á notificación do requirimento, achegue o documento que acredite o dato.
4. A titularidade do centro perderá o dereito ao cobramento da subvención:
a) Se se opón de forma expresa á comprobación automatizada dos datos indicados e non achega os documentos acreditativos e/ou renuncia expresamente á subvención no prazo do número 2 deste artigo.
b) Se o resultado da consulta automatizada dos datos pon de manifesto unha situación de incumprimento das obrigas e non achega a documentación que o acredite no prazo do número 3 deste artigo.
Artigo 8. Pagamento anticipado da subvención
1. De acordo co previsto no artigo 31.6 da Lei 9/2007, do 13 de xuño, de subvencións de Galicia, efectuarase aos beneficiarios o pagamento anticipado do 100 % do importe subvencionado para poder levar a cabo as actuacións inherentes á subvención, sen exixir ningún tipo de garantías e sen que se supere a contía da anualidade prevista en cada exercicio orzamentario.
2. O Consello da Xunta de Galicia autorizará o dito pagamento anticipado, nos termos previstos no artigo 63.3 do Decreto 11/2009, do 8 de xaneiro, polo que se aproba o Regulamento da Lei de subvencións de Galicia.
3. As subvencións concedidas nesta orde aboaranse:
a) As destinadas a horas adicionais de profesorado do período comprendido entre o 23 de setembro e o 31 de decembro de 2020, con cargo o orzamento de 2020, a partir da entrada en vigor da presente orde; e as do período comprendido entre o 1 de xaneiro e o 30 de xuño de 2021, con cargo ao orzamento de 2021, e logo da xustificación de todos os importes recibidos no exercicio 2020.
b) A destinada a outros gastos extraordinarios, integramente con cargo ao orzamento de 2020, a partir da entrada en vigor da presente orde.
Artigo 9. Xustificación da subvención
1. A subvención xustificarase na forma prevista no artigo 7.2 desta orde, pero indicando no recadro «Asunto relacionado» o seguinte: «Xustificación subvencións COVID-19».
2. Esta xustificación realizarase:
2.1. No caso de horas adicionais para impartir docencia: achegando a nómina aboada á persoa traballadora e a acreditación do seu ingreso; así mesmo, a liquidación e ingreso das cotizacións á Seguridade Social e o ingreso da retención á conta do imposto sobre a renda das persoas físicas.
2.2. No caso doutras actuacións extraordinarias: achegando as facturas expedidas a nome do centro ou outros documentos acreditativos dos gastos derivados da execución das actividades subvencionadas, así como o xustificante de ter aboado efectivamente o seu importe.
3. A anterior xustificación deberá facerse:
3.1. Polas cantidades aboadas ou gastos facturados ata o 31 de decembro de 2020: antes do 31 de xaneiro de 2021 (este incluído).
3.2. Por cantidades aboadas ou gastos facturados entre o 1 de xaneiro e o 30 de xuño de 2021: antes do 31 de xullo de 2021 (este incluído).
4. En caso de incumprimento total ou parcial da obriga de xustificar o efectivo emprego da subvención recibida, procederá o reintegro total ou da parte proporcional non xustificada, nos termos previstos nos artigos 33 e seguintes da Lei 9/2007, do 13 de xuño, de subvencións de Galicia.
Artigo 10. Compatibilidades
As subvencións obxecto da presente orde son compatibles con outras subvencións, axudas ou recursos para a mesma finalidade procedentes de calquera Administración pública, entes públicos ou privados, nacionais, da Unión Europea ou de organismos internacionais, tendo en conta que o importe total de todas as subvencións recibidas non poderá superar o custo da actividade subvencionada e, en caso contrario, procederá o reintegro.
Disposición adicional primeira. Infraccións e sancións
Serán de aplicación as disposicións recollidas no título IV (artigos 50 a 68) da Lei 9/2007, do 13 de xuño, de subvencións de Galicia.
Disposición adicional segunda. Dereito supletorio
En todo o non previsto na presente orde será de aplicación a Lei 9/2007, do 13 de xuño, de subvencións de Galicia, o Decreto 11/2009, do 8 de xaneiro, polo que se aproba o seu regulamento e, subsidiariamente, a Lei 38/2003, do 17 de novembro, xeral de subvencións, e o Real decreto 887/2006, do 21 de xullo, polo que se aproba o seu regulamento.
Disposición derradeira primeira. Recurso
Contra esta orde, que pon fin á vía administrativa, poderase interpoñer recurso potestativo de reposición ante o conselleiro de Cultura, Educación e Universidade no prazo dun mes contado a partir do día seguinte ao da súa publicación no Diario Oficial de Galicia (artigos 123 e 124 da Lei 39/2015, do 1 de outubro, do procedemento administrativo común das administracións públicas) ou recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses contados desde a mesma data (artigos 8, 10 e 46.1 da Lei 29/1998, do 13 de xullo, reguladora da xurisdición contencioso-administrativa).
Disposición derradeira segunda. Entrada en vigor
A presente orde entrará en vigor o día seguinte ao da súa publicación no Diario Oficial de Galicia.
Santiago de Compostela, 13 de novembro de 2020
Román Rodríguez González
Conselleiro de Cultura, Educación e Universidade
