Faise público o Acordo núm. 4788 adoptado polo Concello de Poio en sesión extraordinaria realizada con data do 25 de agosto de 2020, en que presta aprobación definitiva ao Plan especial de infraestruturas e dotacións para a implantación de hotel da natureza en Camiño da Serpe, s/n, Raxó, promovido por Pepe Vieira, S.L. e redactado polos arquitectos Álvaro Marín Durán e Alfonso Castro Lorenzo.

O contido íntegro do plan quedará á disposición pública de calquera persoa interesada no enderezo electrónico https://www.concellopoio.gal/, portal de transparencia.

De conformidade co establecido no artigo 84 de la Lei 2/2016, do 10 de febreiro, do solo de Galicia, e o artigo 10 de la Lei 29/1998, do 13 de xullo, reguladora da xurisdición contencioso-administrativa, contra o presente acordo de aprobación de disposición administrativa de carácter xeral poderase interpoñer recurso contencioso-administrativo, no prazo de dous meses, contado desde o día seguinte ao da publicación do anuncio de aprobación definitiva no Diario Oficial de Galicia, ante o Tribunal Superior de Xustiza de Galicia.

Anexo I Procedemento de avaliación ambiental (artigo 25 normas técnicas de planeamento urbanístico de Galicia).

I. Xustificación da integración no documento de plan dos aspectos ambientais.

O Plan especial de infraestruturas e dotacións Pepe Vieira establece a ordenación da parcela, a composición volumétrica da nova edificación e as características arquitectónicas e estéticas da intervención. Esta foi realizada atendendo a criterios da súa correcta integración na contorna natural e o respecto e a integración no ambiente.

Destácanse as seguintes consideracións xerais:

– Natureza: a contorna debe ser o principal elemento sobre o que vire o concepto global e o respecto por ela o que determine a estadía de traballadores e clientes.

– Arquitectura: busca a integración na paisaxe e a adaptación á topografía existente. Utilízase unha linguaxe sinxela e actual en consonancia coa actividade levaba a cabo.

– Aloxamentos: deseñados baixo a premisa de proporcionar unha estancia na natureza, interactuando co xardín e convertendo a estancia nunha experiencia de vida, na cal tomarán importancia as sensacións, as texturas, os aromas, a luz, os sons, as estacións, a choiva ou o vento.

II. Xustificación de como se tomaron en consideración no documento de plan o estudo ambiental estratéxico, os resultados da información pública e das consultas e a declaración ambiental estratéxica, así como, se é o caso, as discrepancias xurdidas no proceso.

Tendo en conta as consideracións expostas, a proposta adáptase á topografía accidentada existente e incorpora o espazo natural ás edificacións. Incorpóranse especies vexetais en máis da metade da superficie da parcela, pasando a ocupar aqueles espazos libres entre as edificacións previstas. A actuación inclúe zonas de hortos para o cultivo propio.

A composición en bloques illados repartidos no ámbito permite mellorar a experiencia de aloxamento en contacto coa natureza e reduce o impacto visual e no relevo natural do terreo. Deste xeito, os socalcos existentes aprovéitanse para a ordenación de bungalós co menor impacto sobre a contorna inmediata, evitando, na medida do posible os movementos de terras. Para a integración e redución do impacto dos socalcos, tanto os existentes como o único que se executará, proxéctase unha cubrición mediante a plantación de especies vexetais e plantas rubideiras de folla perenne.

No referente á materialidade e os acabados, serán similares aos existentes na edificación autorizada, co fin de harmonizar con ela e coa contorna.

III. Razóns da elección da alternativa seleccionada en relación coas alternativas consideradas.

III.1. Análise das alternativas.

Alternativa 1: non modificar o plan.

Vantaxes – Inactividade.

Inconvenientes

– Perpetúa a situación anómala dalgunha das instalacións do complexo.

– Falta de desenvolvemento dun equipamento existente, potenciador do medio en que se sitúa, atractivo turístico e de recoñecido prestixio.

Alternativa 2: legalización das instalacións existentes e implantación dos bungalós coa licenza de campamento de turismo.

Vantaxes – Aproveitamento da licenza existente de campamento de turismo.

Inconvenientes – Non permite a oportunidade de evolución e adaptación do equipamento ás súas necesidades reais.

III.2. Xustificación da elección.

A alternativa que se formula é a única que posibilita o fin que pretende o Plan de infraestruturas e dotacións Pepe Vieira. As dúas alternativas mencionadas non supoñen unha alternativa real ao plan presentado.

O Plan especial de infraestruturas e dotacións ten como obxectivo a implantación, en solo rústico apto (equiparado ao solo rústico de protección ordinaria), do Hotel da Natureza Pepe Vieira, aproveitando e completando as instalacións existentes (con licenza de campamento de turismo), co fin de crear unha área global de uso hoteleiro. A través do plan consegue adaptar a parcela a un dos usos previstos na Lei 2/2016, do 10 de febreiro, do solo de Galicia; corrixe a situación irregular dalgunhas edificacións existentes e consolida e implanta un uso potenciador do medio e que pode contribuír ao enriquecemento da actividade económica da súa contorna máis inmediata.

A proposta defínese como un hotel formado por edificacións independentes, interconectadas entre si por espazos exteriores de espallamento, que conforman plataformas a distintas cotas, adaptándose ao terreo natural. O acceso prodúcese desde dous puntos nos extremos norte e sur, situados a distinta cota. Créanse circulacións internas que permitan o paso ocasional de vehículos. Na primeira plataforma atópase o edificio de servizos existente con soportal-terraza anexo. Nun nivel inferior, localízase o estacionamento con árbores e especies vexetais intercaladas. Na terceira plataforma atópanse 5 bungalós en planta baixa; na cuarta planta situaranse áreas de cultivo. Cara ao sur, dispóñense outras tres plataformas para a implantación de 6 bungalós, 3 bungalós e unha piscina e zona estacionamento respectivamente. Prevese a execución dun muro de pedra de 3 metros de altura, similar aos existentes. Para a redución do impacto visual dos socalcos, proxéctase a plantación de especies vexetais e plantas rubideiras.

Poio, 28 de agosto de 2020

Luciano Sobral Fernández
Alcalde