A Xunta de Goberno Local do Concello da Cañiza (Pontevedra), en sesión que tivo lugar con data do 6.2.2020, aprobou definitivamente o Proxecto de equidistribución para o desenvolvemento do Plan de sectorización do Vieiro, que se executará polo sistema de concerto, adoptando o acordo que de seguido se transcribe:

Primeiro. Aprobar definitivamente o Proxecto de equidistribución para o desenvolvemento do Plan de sectorización do Vieiro, que se executará polo sistema de concerto. De conformidade cos artigo 107 da LSG e 274 do Regulamento da LSG esta aprobación definitiva terá os seguintes efectos:

a) Transmisión ao municipio, en pleno dominio e libre de cargas, de todos os terreos de cesión obrigatoria para a súa incorporación ao patrimonio público do solo ou a súa afectación aos usos previstos no planeamento.

b) Subrogación, con plena eficacia real, das antigas polas novas parcelas correspondentes.

c) Afectación real das parcelas adxudicadas ao cumprimento das cargas e pagamento dos custos inherentes ao sistema de actuación correspondente (artigo 107.1 da LSG).

Neste senso debemos de ter en conta que o promotor se trata dun propietario único dos terreos polo que será o que asuma as cargas e beneficios do ámbito, con independencia da cesión dos terreos de cesión obrigatoria en favor do Concello.

Segundo. Que se proceda a publicar un anuncio no Boletín Oficial da provincia e no Diario Oficial de Galicia.

Terceiro. Que se proceda á notificación individualizada a cargo da Administración actuante a todos os propietarios e interesados no polígono e nos sistemas xerais afectos, considerando os datos catastrais e os que figuren no Rexistro da Propiedade segundo a certificación expedida para tal efecto no seo do procedemento. Así mesmo, notificarase aos titulares de cargas e gravames afectados pola equidistribución.

Cuarto. De conformidade co establecido nos artigos 107.3 da LSG e 272 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia, unha vez firme en vía administrativa o acordo de aprobación definitiva do instrumento de equidistribución, procederase á súa inscrición no Rexistro da Propiedade.

Recursos: de conformidade coa disposición adicional terceira do Real decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada pola COVID-19, os prazos para presentar os recursos correspondentes quedan suspendidos.

A presente resolución pon fin á vía administrativa e contra ela, unha vez que perda vixencia a dita suspensión ou as súas posibles prórrogas, pode interpoñerse ou ben recurso potestativo de reposición ante o mesmo órgano que a ditou, no prazo dun (1) mes contado desde o día seguinte ao da súa notificación ou publicación, sempre que perdese vixencia a dita suspensión ou as súas posibles prórrogas, ou ben recurso contencioso-administrativo ante o Xulgado do Contencioso-Administrativo de Pontevedra, no prazo de dous (2) meses contados desde o día seguinte ao da súa notificación ou publicación, sempre que perdese vixencia a dita suspensión ou as súas posibles prórrogas. Se se opta por interpoñer recurso potestativo de reposición, non poderá interpoñerse recurso contencioso-administrativo ata que aquel sexa resolto expresamente ou se produza a súa desestimación por silencio. Todo iso sen prexuízo de que se interpoña calquera outro recurso que se coide procedente segundo o teor do artigo 40 da Lei 39/2015, do 1 de outubro, do procedemento administrativo común das administracións públicas.

A Cañiza, 31 de marzo de 2020

Luis Antonio Gómez Piña
Alcalde