No Diario Oficial de Galicia núm. 37, do 24 de febreiro de 2020, publicouse a Resolución do 4 de febreiro de 2020 pola que se dá publicidade ao acordo do Consello de Dirección que aproba as bases reguladoras das axudas para a redución do impacto Brexit nas empresas galegas con interese no mercado do Reino Unido (Cheque Brexit) e se procede á súa convocatoria en réxime de concorrencia non competitiva.

No parágrafo segundo do punto cuarto da resolución establecíase que o prazo de execución para a realización dos servizos de consultoría obxecto de apoio remataba na data establecida na resolución de concesión, sen que nunca poida exceder o 15 de novembro de 2020 para as solicitudes con accións que se realicen ata esta data, e do 30 de xullo de 2021 para as solicitudes con accións que se realicen ata esa data. Estas dúas datas, en cada caso, son as datas últimas admisibles de facturación e pagamento. Dentro deste prazo de execución deberase presentar a solicitude de cobramento. As accións realizadas entre o 16 de novembro de 2020 e o 31 de decembro de 2020 poderán ser imputadas ao 2021.

No punto 1 do artigo 4 das beneficiarias establecíase:

1. Poderán ser beneficiarias destas axudas as empresas que cumpran algún dos seguintes requisitos:

a) Que o Reino Unido sexa un dos seus cinco principais mercados intracomunitarios de exportación.

b) Que exportasen ao Reino Unido máis de 100.000 € nos tres últimos exercicios.

c) Que o Reino Unido supoña un mínimo do 10 % da súa exportación intracomunitaria total.

O día 14 de marzo de 2020 publicouse no Boletín Oficial del Estado e entrou en vigor o Real decreto 463/2020, do 14 de marzo, polo que se declara o estado de alarma para a xestión da situación da crise sanitaria ocasionada por COVID-19. Nas súas disposicións adicionais terceira e cuarta decretábase a suspensión de prazos administrativos. O Decreto 465/2020, do 17 de marzo (BOE núm. 73, do 18 de marzo), dálle nova redacción ao número 4 da disposición adicional terceira e establece que as entidades do sector público poderán acordar motivadamente a continuación daqueles procedementos administrativos que veñan referidos a situacións estreitamente vinculadas aos feitos xustificativos do estado de alarma, ou que sexan indispensables para a protección do interese xeral ou para o funcionamento básico dos servizos.

O Acordo do Consello da Xunta de Galicia do 24 de abril de 2020, sobre a continuación da tramitación de determinados expedientes e procedementos en materia de subvencións, no eido da Administración xeral e das entidades instrumentais do sector público autonómico, establece aspectos relativos á continuación dos procedementos de concesión de subvencións cuxas bases e a convocatoria se tivesen aprobado e publicado no momento da entrada en vigor do devandito Real decreto 463/2020, do 14 de marzo, pero dos que non se tivese ditado a resolución de concesión, entre os cales se atopa este procedemento de Cheque Brexit, e os aspectos relativos á modificación das bases reguladoras para ampliar os prazos de execución da actividade subvencionada e, se é o caso, de xustificación e comprobación desa execución.

O día 23 de maio de 2020 publicouse no Boletín Oficial del Estado o Real decreto 537/2020, do 22 de maio, polo que se reinicia o cómputo dos prazos administrativos que tiveran sido suspendidos en virtude do Real decreto 463/2020, do 14 de marzo, con efectos desde o 1 de xuño de 2020.

A actual situación socioeconómica para as empresas internacionalizadas ou que prevían iniciar ese proceso, vese agora radicalmente afectada polo efecto COVID-19. No caso das empresas con obxectivo no mercado de Reino Unido, a incerteza aínda é maior ao unirse a esta situación a xa existente pola complexidade económica derivada da saída británica da Unión Europea. Isto provoca un cambio nas expectativas empresariais que as empresas podían ter e fai necesario que se vaian adaptando a unha nova realidade que lles obriga en moitos casos a reformular a súa situación de cara a continuar ou frear o seu proceso de internacionalización. Polo que é de vital importancia en moitos casos para a continuación dos devanditos procesos a posibilidade de reformular iniciativas sen verse obrigados pola inmediatez dos prazos.

Así mesmo, tendo en conta que a situación e o impacto do Brexit non afecta por igual as empresas nin os sectores de actividade, debemos considerar a incidencia particularmente negativa que supón para empresas non exportadoras ao Reino Unido pero pertencentes a sectores en que a súa actividade no mercado británico é a de importar produto/materia prima para logo proceder en Galicia á súa transformación e/ou comercialización. Neste caso, as empresas galegas afectadas por esta situación veríanse excluídas da posibilidade de apoio por parte das presentes bases.

O Consello de Dirección do Igape, na súa xuntanza do 18 de maio de 2020, acordou a modificación das bases reguladoras das axudas para a redución do impacto Brexit nas empresas galegas con interese no mercado do Reino Unido (Cheque Brexit) co obxecto de ampliar o prazo de execución dos proxectos para permitirlles ás empresas centrar os seus plans de actuación, así como emendar a necesidade de apoio aos sectores con relacións comerciais de importación co Reino Unido.

Por todo o anterior, de conformidade coas facultades que teño conferidas,

RESOLVO:

Artigo 1

Modificar a Resolución do 4 de febreiro de 2020 pola que se da publicidade ao acordo do Consello de Dirección que aproba as bases reguladoras das axudas para a redución do impacto Brexit nas empresas galegas con interese no mercado do Reino Unido (Cheque Brexit) e se procede á súa convocatoria en réxime de concorrencia non competitiva, no seguinte sentido:

O parágrafo segundo do punto cuarto da resolución queda redactado do seguinte xeito:

O prazo de execución para a realización dos servizos de consultoría obxecto de apoio iniciarase na data de presentación da solicitude de axuda e rematará na data establecida na resolución de concesión, sen que nunca poida exceder o 15 de novembro de 2020 para as solicitudes con accións que se realicen ata esta data, e do 15 de novembro de 2021 para solicitudes con accións que se realicen ata esa data. Estas dúas datas, en cada caso, son as datas últimas admisibles de facturación e pagamento. Dentro deste prazo de execución deberase presentar a solicitude de cobramento. As accións realizadas entre o 16 de novembro de 2020 e o 31 de decembro de 2020 poderán ser imputadas ao 2021.

O punto 1 do artigo 4 queda redactado do seguinte xeito:

Artigo 4.1. Poderán ser beneficiarias destas axudas as empresas que cumpran algún dos seguintes requisitos:

a) Que o Reino Unido sexa un dos seus cinco principais mercados intracomunitarios de exportación/importación.

b) Que exportasen/importasen ao/do Reino Unido máis de 100.000 € nos tres últimos exercicios.

c) Que o Reino Unido supoña un mínimo do 10 % da súa exportación/importación intracomunitaria total.

Artigo 2

Esta modificación entrará en vigor o día da súa publicación no Diario Oficial de Galicia.

Santiago de Compostela, 17 de xuño de 2020

Juan Manuel Cividanes Roger
Director xeral do Instituto Galego de Promoción Económica