Visto o expediente para outorgamento de autorización administrativa previa e autorización administrativa de construción da instalación eléctrica que a continuación se describe:

Solicitante: UFD Distribución Electricidad, S.A.

Domicilio social: travesía de Vigo, 204, 36207 Vigo.

Denominación: recuamento LMT ATI727 Cidade Deportiva Mos.

Situación: Mos.

Características técnicas: LMT aérea a 15 kV con condutor tipo LA-56 de 19 metros de lonxitude, con orixe no apoio nº 55-1 proxectado de tipo C-14/4500 que se intercalará na LMT ATI727 e final no apoio nº 55-1 existente de tipo HV-13/1000 da LMT ATI727. LMT subterránea a 15 kV con condutor tipo RHZA de 302 metros de lonxitude, con orixe no paso aéreo a subterráneo proxectado que se realizará no apoio nº 54 proxectado de tipo C-14/4500, que se intercalará na LMT ATI727 e final no apoio nº 55 proxectado de tipo C-14/4500 que se intercalará na LMT ATI727. As instalacións están situadas no lugar de Chan da Cruz, no concello de Mos.

Cumpridos os trámites ordenados na Lei 24/2013, do 26 de decembro, do sector eléctrico, e no capítulo II, título VII, do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, e na Resolución da Consellería de Economía e Industria, do 19 de febreiro de 2014, pola que se aproba o procedemento de autorización administrativa de construción (DOG núm. 54, do 19 de marzo), así como na Lei 5/2017, do 19 de outubro, de fomento da implantación de iniciativas empresariais en Galicia (DOG núm. 203, do 25 de outubro), esta xefatura territorial resolve:

Conceder autorización administrativa previa e autorización administrativa de construción para dita instalación, cuxas características se axustarán en todas as súas partes ás que figuran no proxecto de execución, ás condicións técnicas e de seguridade establecidas nos regulamentos de aplicación e ás condicións establecidas nos condicionados dos organismos que constan no expediente.

Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada.

Contra a presente resolución, que non é definitiva en vía administrativa, cabe interpoñer recurso de alzada ante o conselleiro de Economía, Emprego e Industria no prazo dun mes, contado a partir do día seguinte ao da notificación ou publicación desta resolución, conforme o establecido no artigo 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente. Consonte o establecido na disposición adicional terceira do Real decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada polo COVID-19, o prazo indicado non comezará a contar ata a perda de vixencia do referido real decreto ou, de ser o caso, das súas prórrogas, en relación coa suspensión de prazos administrativos.

Pontevedra, 14 de maio de 2020

Ignacio Rial Santomé
Xefe territorial de Pontevedra