Examinada a solicitude de conciliación formulada polos representantes dos montes veciñais en man común de Veiga de Lomear, Veiga, Gralleira e Fachado e Veiga de Arriba e Veiga de Abaixo, no concello de Calvos de Randín, resultan os seguintes

Feitos:

Primeiro. Con data do 25 de febreiro de 2019 tivo entrada no rexistro da Xefatura Territorial do Medio Rural en Ourense (nº 644/rx 405790) un escrito do Xulgado de Paz de Calvos de Randín co que se achegaban copias compulsadas dun acto de conciliación celebrado o día 8 de novembro de 2018 entre as comunidades propietarias dos montes veciñais en man común de Veiga de Lomear, Veiga, Gralleira e Fachado, Veiga de Arriba e Veiga de Abaixo, no concello de Calvos de Randín.

Segundo. O informe do Servizo de Montes da Xefatura Territorial de Ourense do 27 de marzo de 2019 indica que a solicitude foi realizada de acordo co artigo 53 da Lei 7/2012, de 28 de xuño, de montes de Galicia.

O perímetro estremeiro acordado non afecta outros montes veciñais en man común, e de acordo coa documentación achegada está perfectamente definido mediante a planimetría, descrición escrita e coordenadas UTM de todos os vértices que conforman as liñas poligonais abertas que definen os límites en cuestión.

O deslindamento realizado non modifica os lindeiros que figuran nos respectivos acordos de clasificación e as descrición que constan nas carpetas fichas dos expedientes.

Consideracións legais e técnicas:

Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se seguirá no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, o Xurado Provincial en Man Común acordou por unanimidade o día 6 de novembro de 2019:

Aprobar o acto de conciliación acadado polas xuntas reitoras dos montes veciñais en man común de Veiga de Lomear, Veiga, Gralleira e Fachado e Veiga de Arriba e Veiga de Abaixo, no concello de Calvos de Randín, de acordo co informe favorable do Servizo de Montes do 27 de marzo de 2019.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 13 de febreiro de 2020

Yago Borrajo Sánchez
Presidente do Xurado Provincial de Clasificación de Montes Veciñais
en Man Común de Ourense