O Pleno do Concello de Santiago de Compostela, na sesión ordinaria que tivo lugar o 19 de decembro de 2019, adoptou o seguinte acordo:
Ao abeiro do que dispoñen os artigos 47.1 da Lei 2/2016, do 10 de febreiro, do solo de Galicia, e 86.1 do seu regulamento de desenvolvemento, e co fin de estudar a reforma da normativa do vixente Plan xeral de ordenación municipal (PXOM), que regula os usos de aloxamento temporal e a súa compatibilidade co uso residencial nas distintas ordenanzas e plans de desenvolvemento,
– Suspender o procedemento de autorización de novos usos de aloxamento temporal no ámbito territorial delimitado graficamente no plano anexo, coas exclusións que máis adiante se relacionan.
O ámbito territorial xenérico afectado pola suspensión é o que se define no seguinte plano e correspóndese cos terreos situados entre a delimitación do ámbito do PE-1 (liña amarela) e o denominado perímetro da suspensión (liña azul).
Dentro do ámbito delimitado, a suspensión non afectará as seguintes parcelas e inmobles:
– As parcelas suxeitas á aplicación da ordenanza de equipamentos e dotacións.
– As parcelas especificamente cualificadas para uso terciario, que admitan o uso hoteleiro, ben sexa con carácter exclusivo ou con carácter alternativo ou compatible con outros usos distintos do de vivenda (residencial comunitario, dotacional ou outros terciarios). Este sería o caso, entre outros, do Hospital Vello de Galeras (AS-35).
– Aquelas en que a autorización do uso vivenda teña carácter residual e sexán maioritarios ou principais outros usos distintos do de vivenda (hoteleiro, residencial comunitario, dotacional, e outros terciarios). Este sería o caso, por exemplo, da ordenanza especial OE-6 (antigo colexio Manuel Peleteiro)
– As suxeitas á aplicación das ordenanzas 10 (actividades) e 12 (predios singulares) do PXOM.
– As incluídas no ámbito dos polígonos de solo urbano non consolidado e de solo urbanizable que non conten con proxecto de equidistribución definitivamente aprobado.
– As parcelas e inmobles que estean xa dedicados a uso hoteleiro ou de aloxamento temporal, de conformidade co respectivo título habilitante municipal de natureza urbanística, quedarán excluídas só na parte en que se desenvolve a actividade ou uso xa autorizados, quedando suspendidas as actuacións de ampliación.
Dentro do ámbito delimitado, a suspensión afectará os procedementos de outorgamento dos títulos habilitantes de natureza urbanística (licenza, comunicación previa ou declaración responsable) que supoñan a autorización dos seguintes usos ou actividades:
– Establecementos hoteleiros, nas súas distintas modalidades (hotel, pensión, pousada).
– Apartamentos e vivendas turísticas.
– Albergues turísticos (agás que se trate de albergues de peregrinos de titularidade pública).
– Vivendas de uso turístico, ou calquera outra modalidade que supoña a cesión da vivenda a terceiras persoas, mediante contraprestación económica, para estancias de curta duración (inferior a 30 días consecutivos) ou con finalidade turística.
– Calquera outra forma de aloxamento temporal con finalidade turística, nos termos que se definen no artigo 21.2 da Lei 7/2011, de turismo de Galicia.
O acordo publicarase no Diario Oficial de Galicia e nun xornal dos de maior difusión na provincia.
A suspensión será efectiva a partir da súa publicación e extinguirase, en todo caso, no prazo dun ano, sen prexuízo da suspensión automática que poida derivar do acordo de aprobación inicial da reforma.
Contra esta disposición poderase interpoñer directamente recurso contencioso-administrativo ante o Tribunal Superior de Xustiza de Galicia no prazo de dous meses, contados a partir do día seguinte ao da publicación deste anuncio no Diario Oficial de Galicia e nun xornal dos de maior difusión na provincia.
A documentación poderá ser consultada na páxina web do Concello de Santiago de Compostela:
http://transparencia.santiagodecompostela.gal/Suspension-previa-de-novos-usos-de-aloxamento-temporal/gl
Santiago de Compostela, 20 de decembro de 2019
O alcalde
P.D. (DEC/4742/2019, do 17.6.2019)
Mercedes Rosón Ferreiro
Concelleira delegada de Urbanismo, Vivenda e Cidade Histórica