Examinado o expediente de declaración de interese galego e inscrición no Rexistro de Fundacións de Interese Galego da Fundación Inserta, unha vez vista a proposta da subdirectora xeral de Coordinación Administrativa, dítase esta resolución baseada nos feitos e fundamentos de dereito que se expoñen a seguir:
Feitos:
Primeiro. O 8 de novembro de 2019, Manuel Amil Lago, presidente do padroado da Fundación Inserta, formulou solicitude de clasificación, declaración de interese galego e inscrición no Rexistro de Fundacións de Interese Galego.
Segundo. A Fundación Inserta foi constituída en escritura pública outorgada en Narón o 25 de setembro de 2019, ante o notario Juan de la Riva López-Riobóo, co número 1.812 do seu protocolo, por Manuel Amil Lago, María Antonia Blanco Bermejo e José Pablo Paredes Rodríguez que actúan no seu propio nome e dereito.
Terceiro. En virtude do disposto nos artigos 3 e 4 dos seus estatutos, a Fundación ten por misión contribuír á plena inserción sociolaboral e inclusión social das persoas con discapacidade de calquera tipo e grado, sen prexuízo de atender igualmente colectivos en risco de exclusión social, contribuíndo a facer efectivo o principio de igualdade de oportunidades e non discriminación. Para alcanzar a súa misión, a Fundación determina como os seus obxectivos ou fins fundacionais os seguintes:
‒ A promoción da plena integración laboral das persoas con discapacidade e en risco de exclusión social.
‒ A promoción da cualificación profesional e competencias laborais como factores determinantes para a integración laboral de persoas con discapacidade e en risco de exclusión social.
‒ A promoción, mantemento e xestión de centros especiais de emprego.
Cuarto. Na escritura de constitución constan os aspectos relativos á personalidade das persoas fundadoras e a súa capacidade e vontade de constituír a Fundación conforme os preceptos da Lei 12/2006, do 1 de decembro, de fundacións de interese galego (DOG núm. 242, do 19 de decembro).
Quinto. Nos estatutos da Fundación consta a denominación e natureza, obxecto e actividades, o domicilio e ámbito de actuación, as regras para a aplicación dos recursos aos fins fundacionais e para a determinación dos beneficiarios, a composición do padroado, as regras para a designación e substitución dos seus membros, as causas de cesamento, as súas atribucións e a forma de deliberar e de adoptar acordos.
Sexto. O padroado inicial da Fundación está formado por Manuel Amil Lago como presidente, María Antonia Blanco Bermejo como vicepresidenta e José Pablo Paredes Rodríguez como secretario.
Sétimo. A comisión integrada polos secretarios xerais técnicos de todas as consellerías, na xuntanza do día 18 de novembro de 2019, elevoulle ao vicepresidente e conselleiro de Presidencia, Administracións Públicas e Xustiza proposta de clasificación como de interese de promoción e de atención ás persoas en risco de exclusión por razóns físicas ou sociais da Fundación Inserta consonte as materias que constitúen o seu obxecto fundacional, polo que, cumpríndose os requisitos exixidos na Lei 12/2006, do 1 de decembro, de fundacións de interese galego e de conformidade co establecido no artigo 47 da antedita lei, no artigo 51 do Decreto 14/2009, do 21 de xaneiro, polo que se aproba o Regulamento de fundacións de interese galego e no artigo 7 do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego, o protectorado será exercido pola Consellería de Política Social.
Oitavo. De conformidade coa dita proposta, por Orde da Vicepresidencia e Consellería de Presidencia, Administracións Públicas e Xustiza, do 22 de novembro de 2019, clasificouse como de interese de promoción e atención ás persoas en risco de exclusión por razóns físicas ou sociais á Fundación Inserta, e adscribiuse á Consellería de Política Social para os efectos do exercicio das funcións de protectorado.
Fundamentos de dereito:
Primeiro. O artigo 34 da Constitución española recoñece o dereito de fundación para fins de interese xeral, e o artigo 27.26 do Estatuto de autonomía para Galicia establece que é competencia exclusiva da Comunidade Autónoma galega o réxime das fundacións de interese galego.
Segundo. De acordo co disposto no artigo 7.2 do Decreto 15/2009, do 21 de xaneiro, en relación co Decreto 176/2015, do 3 de decembro, polo que se establece a estrutura orgánica da Consellería de Política Social, correspóndelle a esta consellería a declaración de interese galego mediante resolución publicada no Diario Oficial de Galicia e a inscrición no Rexistro de Fundacións de Interese Galego da Fundación Inserta, así como o exercicio das funcións de protectorado e as demais que correspondan á Xunta de Galicia, de conformidade co indicado no dito regulamento.
Terceiro. Á vista do disposto na Lei 12/2006, do 1 de decembro, e no Decreto 14/2009, do 21 de xaneiro, e no Decreto 15/2009, do 21 de xaneiro, e logo do informe de idoneidade dos fins e de adecuación e suficiencia da dotación, resultan cumpridos os requisitos establecidos pola normativa vixente para a declaración de interese galego e a inscrición no Rexistro de Fundacións de Interese Galego, sección da Consellería de Política Social da Fundación Inserta, polo que,
RESOLVO:
Primeiro. Declarar fundación de interese galego a Fundación Inserta.
Segundo. Ordenar a inscrición da Fundación Inserta no Rexistro de Fundacións de Interese Galego, sección da Consellería de Política Social.
Terceiro. Esta fundación queda sometida ao disposto na Lei 12/2006, do 1 de decembro, no Decreto 14/2009, do 21 de xaneiro, e no Decreto 15/2009, do 21 de xaneiro, así como na demais normativa que resulte de aplicación, onde se establecen especialmente as obrigas de dar publicidade suficiente do seu obxecto e actividades, ausencia de ánimo de lucro na prestación dos seus servizos, e presentar anualmente a documentación contable e plan de actuación ante o protectorado, que será exercido por esta Consellería de Política Social.
Contra esta resolución, que non pon fin á vía administrativa, pódese interpoñer recurso de alzada ante a conselleira de Política Social, no prazo dun mes contado desde o día seguinte ao da súa publicación, segundo o disposto nos artigos 121 e 122 da Lei 39/2015, do 1 de outubro, de procedemento administrativo común das administracións públicas.
Santiago de Compostela, 10 de decembro de 2019
María Francisca Gómez Santos
Secretaria xeral técnica da Consellería de Política Social