Con data do 16 de outubro de 2019, a Dirección Xeral de Desenvolvemento Rural adoptou a resolución que a seguir se cita:

«O acordo da zona de Beán-Pereira (Ordes-A Coruña) foi aprobado pola dirección xeral competente en materia de concentración parcelaria, con data do 21 de decembro de 2010, e foi notificado e publicado na forma legalmente prevista.

Con posterioridade a estes actos, o Concello de Ordes solicitou a cesión da titularidade dos predios e para os destinos que se indican a continuación:

Predio nº 85, para un depósito-manancial da Aldea de Abaixo.

Predio nº 140, para a contorna da escola de Pereira.

Predio nº 372, para depósito-manancial en Mendo.

Predio nº 442, para campo de fútbol/equipamento colectivo.

Predio nº 569, para área recreativa de Ponte Pereira.

Predio nº 729, para ampliación da captación de auga do predio 731.

Predio nº 731, para depósito/captación de auga.

Predio nº 1030, por existir un manancial.

Predio nº 1150, para depósito/captación de auga.

Predio nº 1164, para unha caseta para maquinaria.

Predio nº 1393-2, para depósito/captación de augas.

Predio nº 1450, por existir un manancial.

Predio nº 1453, por existir un manancial.

Predio nº 1573, por existir un manancial.

Vista a proposta da xunta local da zona, a Lei de reforma e desenvolvemento agrario, do 12 de xaneiro de 1973; a disposición transitoria primeira da Lei 4/2015, do 17 de xuño, de mellora da estrutura territorial agraria de Galicia; a Lei 10/85, do 14 de agosto, de concentración parcelaria para Galicia, modificada pola Lei 12/2001, do 10 de setembro; a Lei 39/2015, do 1 de outubro, do procedemento administrativo común das administracións públicas, e demais disposicións vixentes de aplicación ao caso.

Dados os destinos para os que se solicitan os referidos predios, e respecto dos que son perfectamente subsumibles no suposto recollido no artigo 32 da antedita lei galega, esta dirección xeral resolve:

1. Modificar o acordo de concentración parcelaria da zona de Beán-Pereira (Ordes-A Coruña), e adxudicar ao Concello de Ordes a titularidade dos predios 85, 140, 372, 442, 569, 729, 731, 1030, 1150, 1164, 1393-2, 1450, 1453 e 1573, que causan baixa no fondo de terras da zona, para seren destinados aos fins que se determinan na parte expositiva.

Transcorridos cinco anos desde a cesión das propiedades sen que os predios fosen destinados aos fins para os cales son adxudicados, a titularidade dos referidos predios reverterá sobre o fondo de terras da zona, o Patrimonio da Comunidade Autónoma, a Axencia Galega de Desenvolvemento Rural (Agader) ou outra entidade que corresponda, segundo o caso.

2. Ordenar que á presente resolución se lle dea a oportuna publicidade, sen prexuízo da súa notificación ao Concello de Ordes».

Contra esta resolución, que non pon fin á vía administrativa, poderase interpor recurso de alzada, ante a persoa titular da Consellería do Medio Rural, no prazo dun mes, que se contará desde o día seguinte ao da publicación deste anuncio.

A Coruña, 27 de novembro de 2019

Mónica López López
Xefa territorial da Coruña