Examinada a solicitude de conciliación formulada polos representantes dos MVMC Serra de Lobios e Nichos e Tapada do Crego, Ribadeira e Estremadoiro, no concello de Lobios, resultan os seguintes

Feitos.

Primeiro. Con data do 30 de novembro de 2018 o presidente da xunta reitora da CMVMC de Gustomeao, A Regada e Sa presentou dúas solicitudes no rexistro electrónico da Xunta de Galicia (nº 2018/2891803 e nº 2018/2891821) para que se aprobase o deslindamento realizado entre o MVMC Serra de Lobios e Nichos e Tapada do Crego, Ribadeira e Estremadoiro, no concello de Lobios.

Posteriormente, presentouse o día 7 de xaneiro de 2019 no rexistro da Xefatura Territorial da Consellería do Medio Rural de Ourense (nº 183/26873) un novo escrito co que se achegou un CD que contén algunha da documentación xa presentada coa solicitudes anteriores.

Segundo. O informe do Servizo de Montes da Xefatura Territorial de Ourense do 25 de abril de 2019 indica que a solicitude foi realizada de acordo co artigo 53 da Lei 7/2012, do 28 de xuño, de montes de Galicia.

O perímetro estremeiro acordado afecta unicamente os dous montes veciñais, desprazándose cara ao sur, respecto do que figura na carpeta-ficha, no tramo comprendido entre a pista das Sombras, e o regato das Verdeás.

O perímetro está perfectamente definido na acta de deslindamento e no informe mediante a planimetría, a descrición escrita e as coordenadas UMT dos vértices que conforman a liña poligonal aberta que define o límite en cuestión. Entre os puntos 8 e 9 non se indican as coordenadas dos vértices e vén definido polo eixe da pista das Sombras nun tramo duns 1.000 m.

A modificación que se produce respecto dos planos de clasificación afecta a superficie de ambos os montes aumentando 92,39 ha a do MVMC Tapada do Crego, Ribadeira e Estremadoiro e diminuíndo a mesma superficie a do MVMC Serra de Lobios e Nichos.

Consideracións legais e técnicas.

Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se seguirá no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, o Xurado Provincial de Clasificación de Montes Veciñais en Man Común acordou por unanimidade o día 4 de xuño de 2019:

Aprobar o acto de conciliación acadado polas xuntas reitoras dos MVMC Serra de Lobios e Nichos e Tapada do Crego, Ribadeira e Estremadoiro, no concello de Lobios, de acordo co informe favorable do Servizo de Montes do 25 de abril de 2019.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 14 de novembro de 2019

Yago Borrajo Sánchez
Presidente do Xurado Provincial de Clasificación
de Montes Veciñais en Man Común de Ourense