Tras a aprobación do texto inicial e, unha vez finalizado o trámite de información pública (DOG núm. 85, do 6 de maio de 2019), na sesión ordinaria do 29 de xullo de 2019, a Corporación municipal en Pleno acordou ratificar o texto definitivo do convenio urbanístico de planeamento e para a execución deste, referido ao sector de solo urbanizable SU-7 del PXOM de Sanxenxo.

En cumprimento do punto terceiro do acordo plenario procédese á publicación do texto íntegro do convenio:

Sanxenxo, 22 de agosto de 2019

Telmo Martín González
Alcalde

Reunidos:

Telmo Martín González, con DNI * e domicilio para efectos de notificacións na rúa de Madrid nº 1, CP 36960, de Sanxenxo, Pontevedra.

Aitor Castro Casas, con DNI * e domicilio para efectos de notificacións na rúa *.

Jesús Feliciano Morón Puerto, con DNI *, e domicilio para efectos de notificacións na rúa *.

Delfa Losa García, con DNI * e domicilio para efectos de notificacións na rúa *.

Interveñen:

Telmo Martín González, na súa condición de alcalde do Concello de Sanxenxo e en representación deste.

Aitor Castro Casas, no seu propio nome e representación.

Jesús Feliciano Morón Puerto, en nome e representación de CPI Proyectos, S.L., de duración indefinida, con domicilio social en Madrid, rúa *, constituída en escritura autorizada polo notario de Madrid, *, o día *, número * de protocolo; inscrita no Rexistro Mercantil de Madrid, ao tomo *, libro *, folio *, sección *, folla *, con CIF *. Resulta a súa representación para este acto do seu cargo de administrador único da sociedade, segundo resulta da escritura de solemnización de acordos sociais autorizada polo notario de Madrid *, o día *, co número * de protocolo, asegurando a vixencia do seu cargo.

Delfa Losa García, en nome e representación de Promociones y Gestiones del Tambre, S.L., de duración indefinida, con domicilio social en Santiago de Compostela, *, constituída, baixo outra denominación, en escritura autorizada polo notario de Santiago de Compostela, *, o día *, número * de protocolo, sendo transformada en limitada en escritura autorizada polo notario de Santiago de Compostela, *, o día *, número * de protocolo; inscrita no Rexistro Mercantil da Coruña, ao tomo *, folio *, folla *, con CIF *. Resulta a súa representación para este acto da escritura de elevación a público de acordos sociais autorizada polo notario de Santiago de Compostela *, o día *, co número * de protocolo, á que se une a certificación do acordo de outorgamento de poder especial para este acto a favor de Delfa Losa García.

E en nome e representación de Aries Real, S.L., de duración indefinida, con domicilio social en Santiago de Compostela, rúa *, constituída en escritura pública autorizada polo notario de Santiago de Compostela, *, o día *, número * do seu protocolo; inscrita no Rexistro Mercantil de Santiago, ao tomo *, folio *, folla *, con CIF *. Resulta a súa representación para este acto da escritura de elevación a público de acordos sociais autorizada polo notario de Santiago de Compostela *, o día *, co número * de protocolo, á que se une a certificación do acordo de outorgamento de poder especial para este acto a favor de Delfa Losa García.

Tendo e recoñecéndose, segundo concorren, a capacidade legal necesaria para contratar e obrigarse, formalizan o presente convenio urbanístico, para cuxo fin

EXPOÑEN:

I. O Plan xeral de ordenación municipal (en diante, PXOM) de Sanxenxo foi aprobado definitivamente polo Pleno municipal na sesión celebrada o día 27 de febreiro de 2003.

Nel delimitáronse trinta sectores de solo urbanizable delimitado, indicando as características, parámetros urbanísticos e condicións de desenvolvemento de cada un deles.

II. Na actualidade, tres sectores de solo urbanizable (o SU-3, o SU-15 e o SU-28) concluíron o seu desenvolvemento urbanístico, tendo alcanzado a condición de solo urbano consolidado e sendo recibidas as obras de urbanización dos respectivos ámbitos.

A estes sectores debe engadirse o SU-7, cuxas obras de urbanización foron correctamente executadas e son recibidas polo Concello de Sanxenxo na data da sinatura deste convenio, acadando deste modo o ámbito a condición de solo urbano consolidado.

III. Non obstante, desde a aprobación do vixente PXOM de Sanxenxo (ano 2003), a normativa urbanística aplicable sufriu non poucas alteracións, dando como resultado que o vixente Plan xeral de Sanxenxo non se atopa actualmente adaptado a esta.

Un dos documentos normativos que tivo maior repercusión sobre o PXOM de Sanxenxo foi o Plan de ordenación del litoral (en diante, POL), aprobado en virtude do Decreto 20/2011, do 10 de febreiro, da Consellería de Medio Ambiente, Territorio e Infraestruturas da Xunta de Galicia, publicado no Diario Oficial de Galicia do 23 de febreiro de 2011.

IV. O Concello de Sanxenxo iniciou os trámites para a modificación do PXOM, que se tramita como a modificación puntual nº 9 (no sucesivo, modificación puntual nº 9 PXOM), co obxectivo, tal como indica o documento de borrador de modificación puntual sometido a avaliación ambiental estratéxica, de «adaptar os solos urbanizables incluídos dentro da área de mellora ambiental e paisaxística do POL aos seus criterios e aos establecidos na presente modificación puntual.

Estas modificacións irán dirixidas a rebaixar a densidade, a aumentar a compacidade das ordenacións, liberar solo, ben como espazo público ou privado, e adaptar as construcións e urbanización ao relevo coa finalidade de preservar a paisaxe litoral e mellorar a imaxe de borde costeiro».

V. O POL, ao regular o seu ámbito de aplicación, dispón -artigo 3.2- que non será de aplicación a aqueles solos «que á entrada en vigor deste plan finalizaran a tramitación do instrumento de xestión». Engade o mesmo precepto no seu punto 3 que «non obstante, en virtude de expedientes de primeira formulación, modificación ou revisión do planeamento urbanístico, si será aplicable aos solos que este clasifique de núcleo rural e que se atopen incluídos nas áreas de recualificación identificadas no POL, así como naquelas que, se é o caso, determine o planeamento urbanístico».

O proxecto de compensación do SU-7 foi aprobado definitivamente antes da entrada en vigor do POL, polo que, de acordo coas previsións sinaladas, o SU-7 quedou excluído do seu ámbito de aplicación.

De conformidade cos informes emitidos polo organismo competente na materia durante a tramitación ambiental da modificación puntual nº 9 do PXOM, serán aplicables aqueles criterios de ordenación do POL que resulten viables en función do grao de execución e desenvolvemento de cada ámbito e na medida e co alcance con que o dispoña a modificación puntual nº 9 en tramitación.

En consecuencia, a adaptación do SU-7 ao POL debe ser coherente co grao de execución acadado, tendo en consideración que, como se sinalou, finalizou a execución das obras de urbanización e o ámbito obtivo a condición de solo urbano consolidado.

VI. En coherencia con este marco legal, o documento de avance da modificación puntual xa dispón que «dado o proceso de transformación ao que está sendo sometido xa nestes momentos a zona de mellora ambiental e paisaxística do POL, se entende que a mellor maneira de acadar os obxectivos fixados é mediante acordos cos propietarios que xa iniciaron o desenvolvemento dos solos, de xeito que os documentos aprobados se modifiquen e se adapten ás novas condicións aquí plasmadas».

O documento de modificación puntual precisa o grao de definición dos seus propios obxectivos e determinacións para poder facilitar estes acordos cos propietarios dos solos en execución. E o fai nos seguintes termos: «De cara a poder chegar a acordos cos xestores do solo que nestes momentos iniciaron xa o proceso de transformación, as condicións de desenvolvemento impostas no presente documento de avance non pretenden ser pechadas, sobre todo, no que se refire á diminución da densidade, fixando intervalos de movemento desta variable, de cara a poder axustar o número definitivo no momento en que se acorde una ordenación detallada para cada ámbito que, independentemente do número de vivendas, cumpra cos criterios de mellor integración paisaxística e menor impacto ambiental, dentro do lóxico equilibrio de ingresos e custos».

VII. O documento de avance ou borrador da modificación puntual nº 9 do PXOM recollía a integración das novas ordenacións, detalladas ou non, na modificación en tramitación.

Non obstante, por razóns de operatividade e axilidade, outorgouse a todos os propietarios dos sectores que quedaron fóra do ámbito de aplicación do POL a posibilidade de articular, de mutuo acordo, a adaptación aos criterios do instrumento de ordenación territorial que en cada caso resultasen viables mediante a modificación puntual dos respectivos instrumentos de planeamento de desenvolvemento e de xestión, sen necesidade de modificar o planeamento xeral.

Neste contexto, ao abeiro da competencia municipal en materia de planificación e xestión urbanística recollida no artigo 25.2.a) da Lei 7/1985, do 2 de abril, reguladora das bases do réxime local e de conformidade co disposto nos artigos 165, 166 e 167 da LSG, o Concello de Sanxenxo e os propietarios do SU-7 asinantes estiman conveniente a sinatura do presente convenio urbanístico, que facilitará o desenvolvemento urbanístico do sector e, ao propio tempo, a consecución dos obxectivos da modificación puntual nº 9 do PXOM.

Con base no anterior, as partes que subscriben este documento celebran o presente convenio urbanístico, de acordo coas seguintes

Estipulacións:

Primeira. Obxecto do presente documento

O presente convenio ten por obxecto:

i. Establecer as bases da modificación da ordenación detallada do SU-7, prevista no Plan parcial do sector actualmente en vigor, coa finalidade de adaptala aos criterios do POL que resulten viables, tendo en consideración a execución e final das obras de urbanización do ámbito.

ii. Regular a incorporación da nova ordenación detallada do SU-7 ao planeamento municipal mediante a tramitación da modificación do Plan parcial en vigor, de modo tal que permita avaliar a súa compatibilidade e coherencia cos criterios de ordenación da modificación puntual do PXOM en tramitación.

iii. Clarificar o réxime de conservación das obras de urbanización.

iv. Garantir a viabilidade técnica e económica da actuación, establecendo o adecuado equilibrio entre os beneficios e cargas derivadas da actuación.

v. Concretar os deberes que asumen as partes asinantes no marco da modificación puntual nº 9 do PXOM de Sanxenxo e no desenvolvemento deste no que afecta o sector de solo urbanizable SU-7, de modo que coa formalización deste convenio, no desenvolvemento do sector SU-7 continúe de maneira paralela e non se vexa interrompido pola tramitación da modificación puntual nº 9 PXOM.

Segunda. Proposta de modificación do Plan parcial do sector SU-7 para a súa adaptación a criterios do POL

i. As alteracións que se incorporarán na ordenación urbanística en vigor do sector SU-7 son as reflectidas na ficha que se achega como anexo I, na que se establecen as novas determinacións de aplicación a este sector.

Son obxecto de modificación, entre outros parámetros, os seguintes:

Parámetros	Plan parcial en vigor	Modificación puntual do Plan parcial
Aproveitamento	0,52 m2/m2	0,451 m2/m2
Edificabilidade	12.507 m2	11.255 m2
Densidade de vivendas	50 viv/ha	40 viv/ha
Nº máximo de vivendas	125 vivendas	100 vivendas

En todo o demais, manterase a ordenación urbanística do Plan parcial en vigor e as obras de urbanización xa executadas na medida en que se axusten aos instrumentos vixentes.

ii. Estas novas condicións de desenvolvemento do sector SU-7 materializaranse na ordenación detallada do sector mediante a modificación puntual do Plan parcial en vigor, que se tramitará de conformidade co establecido no artigo 185 e seguintes do Regulamento da Lei do solo de Galicia.

Acompáñase como anexo II a proposta de ordenación a incluír na modificación puntual do Plan parcial, na que se materializan os novos criterios de desenvolvemento do sector, tendo en conta o grao de execución alcanzado, e coa que se estima que se cumpren no sector SU-7 os obxectivos de mellor integración paisaxística e menor impacto ambiental, dentro do necesario equilibrio de beneficios e cargas. Esta proposta axústase aos parámetros e criterios da modificación puntual en tramitación, ben que durante a tramitación da modificación puntual do Plan parcial poderá ser obxecto de adaptacións ou precisións derivadas do maior grao de desenvolvemento que debe presentar o proxecto da modificación puntual do Plan parcial, respectando, en todo caso, as características fundamentais e os aproveitamentos efectivos das parcelas previstos no anexo II.

Dada a especial atención paisaxística que merece a parcela que dá fronte á PO-308, identificada nas fichas adxuntas como parcela RCL1, acompáñase como anexo III plano de situación e localización e plano de alzados e seccións da edificación da parcela, que deberán incorporarse á modificación puntual do Plan parcial. Non obstante, durante a tramitación da modificación puntual do Plan parcial poderá ser obxecto de adaptacións ou precisións derivadas do maior grao de desenvolvemento que debe presentar o proxecto da modificación puntual do Plan parcial, respectando, en todo caso, as características fundamentais e o aproveitamento efectivo da parcela previstos no anexo II.

iii. En calquera caso, as parcelas identificadas no Plan parcial vixente como RUL1-1 e RUL1-2, agrupadas e edificadas, manterán a súa configuración actual e non resultarán afectadas pola modificación proxectada.

Terceira. A xestión do sector SU-7 a partir da formalización do presente convenio

A partir da formalización do presente convenio, o desenvolvemento do sector SU-7 continuará de acordo coas previsión que se indican a seguir:

i. Executadas as obras de urbanización do ámbito, o concello procede á súa recepción de forma simultánea á sinatura deste convenio, incorporándoas ao dominio público municipal e pasando a ter o solo do sector SU-7 a natureza de solo urbano consolidado.

Para a recepción deste ámbito non resulta precisa a execución de infraestruturas exteriores de conexión do polígono cos sistemas xerais existentes, nin obras de ampliación e reforzo dos citados sistemas. Non resulta de aplicación, por perda de vivencia, o Plan director de infraestruturas de abastecemento e saneamento do Concello de Sanxenxo, debendo terse en consideración, para estes efectos, que a modificación puntual nº 9 do PXOM en tramitación prevé a execución de obras exteriores de conexión, ampliación ou reforzo para aqueles ámbitos que así o precisen.

A conservación das obras de urbanización recibidas corresponde ao Concello de Sanxenxo.

ii. A propiedade presentará, nun prazo máximo de 45 días desde o perfeccionamento deste convenio, o borrador de modificación puntual do Plan parcial SU-7 vixente, de acordo coas determinacións establecidas na ficha do sector (anexo I), coa proposta alternativa da modificación da ordenación do Plan parcial (anexo II) e co plano de situación e localización e plano de alzados e seccións da edificación correspondente á parcela identificada como RCL1 (anexo III), que se acompañan a este convenio.

iii. A propiedade poderá solicitar licenzas de edificación naquelas zonas ou parcelas do sector nas que sexan coincidentes ás determinacións do Plan parcial actualmente en vigor e ás determinacións da modificación puntual deste. Para poder apreciar esta coincidencia, estas licenzas outorgaranse a partir da aprobación inicial da modificación puntual do Plan parcial.

Cuarta. Obrigas asumidas polos propietarios asinantes do sector de solo urbanizable SU-7

As obrigas que coa sinatura deste convenio urbanístico asumen os propietarios asinantes do sector SU-7 recondúcense ás seguintes:

1ª. Os propietarios do sector SU-7 asumen os obxectivos xerais pretendidos pola modificación puntual nº 9 do PXOM de Sanxenxo; isto é, «rebaixar a densidade, aumentar a compacidade das ordenacións, liberar solo, ben como espazo público ou privado, e adaptar as construcións e urbanización ao relevo coa finalidade de preservar a paisaxe litoral e mellorar a imaxe do borde costeiro», nos termos e co alcance que resultan da ficha do sector que se achega como anexo I, da proposta de modificación do Plan parcial en vigor que se acompaña como anexo II e do plano de situación e localización e plano de alzados e seccións da edificación correspondente á parcela identificada como RCL1, que se acompaña como anexo III.

2ª. Nun prazo non superior a 45 días contados desde o perfeccionamento deste convenio, os propietarios asinantes deste presentarán no Rexistro Municipal do Concello un borrador de modificación do Plan parcial do sector, que sexa acorde coas determinacións contidas na documentación anexa I, II e III.

3ª. Os propietarios obríganse a reflectir no Rexistro da Propiedade a nova ordenación que resulte da modificación puntual do Plan parcial.

Con esta finalidade, o Concello de Sanxenxo expedirá unha certificación das condicións e parámetros urbanísticos de cada unha das parcelas de resultado (RCL1, RCL2, RCL3, RCL4, RUL1-1 e RUL1-2, RUP1) para a súa inscrición rexistral. Nos casos nos que resultase preciso, os propietarios procederán ao outorgamento das escrituras de agrupación de predios que resulten necesarios.

Verificada a inscrición, os propietarios presentarán no Concello de Sanxenxo unha nota simple na que consten as novas condicións de ordenación.

4ª. No suposto no que, por causas alleas aos asinantes do presente convenio, a nova ordenación aprobada non poida acceder ao Rexistro da Propiedade na forma prevista no punto anterior, os propietarios obríganse a redactar, impulsar e tramitar á súa custa a modificación que sexa preciso realizar do proxecto de equidistribución do polígono único do ámbito, como consecuencia da aprobación da modificación puntual do Plan parcial a que se refire o presente convenio. A dita modificación do proxecto de equidistribución tramitarase preferentemente e, de ser posible, como unha operación xurídica complementaria ao abeiro do previsto no artigo 273 do Regulamento da LSG; en caso contrario, como unha modificación do proxecto de concerto no seu día aprobado.

Para estes efectos, os propietarios asinantes obríganse a presentar nun prazo non superior a 30 días contados desde a denegación da inscrición rexistral das novas condicións de ordenación, unha proposta de modificación do proxecto de equidistribución acorde coas previsións deste convenio e demais normativa de aplicación.

Do mesmo modo, os propietarios asinantes obríganse a realizar todas as actuacións que sexan necesarias para que se poida aprobar a referida proposta de modificación do proxecto de equidistribución e, en todo caso, a realizar as actuacións necesarias para dar á tramitación do referido instrumento a maior axilidade posible, co fin de que o Concello de Sanxenxo poida aprobar a modificación do proxecto de equidistribución no máis breve prazo posible.

E, coa mesma finalidade, os propietarios asinantes obríganse a colaborar na realización de todas as actuacións que, se é o caso, fosen necesarias para lograr a inscrición da modificación do proxecto de equidistribución no Rexistro da Propiedade.

Indícase, a seguir, a equivalencia de parcelas de resultado entre a vixente ordenación e a proxectada, sen que proceda compensación entre as propiedades:

Titular	Plan parcial e proxecto de equidistribución en vigor	Modificación puntual do Plan parcial e, se é o caso, do proxecto de equidistribución
Promociones y Gestiones del Tambre, S.L. Aries Real, S.L.	RCL1	RCL1
Promociones y Gestiones del Tambre, S.L. Aries Real, S.L.	RCL2	RCL2
Promociones y Gestiones del Tambre, S.L. Aries Real, S.L.	RUL1-3 a RUL1-14	RCL3
Aitor Castro Casas	RUL1-1, RUL1-2	RUL1-1, RUL1-2
CPI Proyectos, S.L.	RUP1	RUP1
CPI Proyectos, S.L.	RUP2	RCL4

5ª. Os propietarios asumen, en proporción ás súas respectivas cotas de participación no ámbito, os custos que poidan derivarse dos deberes asumidos no presente convenio.

6ª. Os eventuais adquirentes das parcelas non edificadas incluídas no ámbito do SU-7 quedarán subrogados nos dereitos e deberes derivados do presente convenio. Para tal fin, os asinantes deste obríganse a incluír expresamente no título de transmisión das referidas parcelas os deberes urbanísticos e os deberes derivados do presente convenio pendentes de cumprimento.

7ª. Promociones y Gestiones del Tambre, S.L. e Aries Real, S.L. obríganse a desistir do recurso contencioso-administrativo tramitado como procedemento ordinario nº 4560/2017 ante o Tribunal Superior de Xustiza de Galicia.

8ª. Todos os propietarios asinantes do presente convenio renuncian ao exercicio de calquera reclamación de responsabilidade patrimonial contra o Concello de Sanxenxo en relación co acordo de suspensión de licenzas adoptado o 27 de setembro de 2017 ou calquera outro relacionado coa ordenación do ámbito obxecto do presente convenio.

O incumprimento por parte dos propietarios asinantes dos deberes asumidos no presente convenio motivará a modificación das condicións de ordenación do ámbito na modificación puntual nº 9 do PXOM en tramitación ou a través doutra figura de planeamento, sen que poidan reclamar responsabilidade ningunha por este concepto.

Quinta. Obrigas asumidas polo Concello de Sanxenxo

Coa sinatura do presente convenio o Concello de Sanxenxo asume as seguintes obrigas:

1ª. Tramitar, realizar as actuacións e adoptar os acordos necesarios que desta entidade local dependan ata a aprobación, coa maior celeridade posible, da modificación do plan Parcial do sector SU-7, cuxa proposta deberá ser presentada polos propietarios nos termos expostos na estipulación segunda do presente convenio.

2ª. Realizar, en sede xudicial, as actuacións necesarias para evitar que se impoñan aos propietarios recorrentes as custas procesuais pola renuncia do recurso contencioso-administrativo tramitado como procedemento ordinario nº 4560/2017 ante o Tribunal Superior de Xustiza de Galicia.

3ª. Coa sinatura do presente convenio e, unha vez aprobada definitivamente a modificación do Plan parcial do sector SU-7, o Concello de Sanxenxo dá por cumpridos os criterios de desenvolvemento e os obxectivos pretendidos pola modificación puntual nº 9 do PXOM de Sanxenxo.

4ª. De conformidade co artigo 86.3.c) do Regulamento da Lei do solo de Galicia, o Concello de Sanxenxo asume de forma explícita a súa obriga de outorgar expresamente as licenzas urbanísticas que autoricen os proxectos que cumpran simultaneamente o Plan parcial actualmente en vigor e a modificación puntual do Plan parcial tras a aprobación inicial deste.

Sexta. Tramitación e perfeccionamento do convenio

De conformidade co disposto nos artigos 168 da Lei do solo de Galicia e 401 do seu regulamento de desenvolvemento, unha vez finalizado o trámite de exposición pública do presente convenio, no caso de que por razón das alegacións presentadas se deban introducir cambios, o Concello de Sanxenxo notificará ás partes a proposta de texto definitivo deste, concedéndolle un prazo de dez (10) días hábiles para manifestar a súa conformidade, reparos ou, se é o caso, renuncia a este, trámite este ao que as partes renuncian para o suposto de que o dito texto fose idéntico ao plasmado no presente documento.

Unha vez aprobado definitivamente o convenio polo órgano municipal competente, deberá ser asinado no prazo máximo de quince (15) días contado desde a notificación do acordo ou resolución correspondente (artigos 168.4 da Lei de solo de Galicia e 402 do seu regulamento de desenvolvemento).

Sétima. Documentación que conforma o convenio

Forma parte deste convenio e, polo tanto, do réxime de reciprocidade obrigacional convido polas partes, a proposta de ficha do sector e a proposta de modificación da ordenación detallada do Plan parcial que se incorporan a este convenio como anexos I, II e III e que se integran polos seguintes documentos:

1. Ficha de determinación do sector nº 7 de solo urbanizable.

2. Plano da alternativa proposta.

3. Plano de situación e localización e plano de alzados e seccións da edificación na parcela RCL1.

Oitava. Natureza xurídica e xurisdición competente

O presente documento ten a natureza xurídica de convenio urbanístico de planeamento e de convenio urbanístico para a execución do dito planeamento, nos termos previstos polos artigos 165 e seguintes da LSG e 398 e seguintes do seu regulamento de desenvolvemento.

As previsións establecidas no presente convenio non limitan nin condicionan a potestade municipal de planeamento.

As cuestións relativas á súa celebración, cumprimento, interpretación, efectos e extinción serán competencia da orde xurisdicional contencioso-administrativa.

E en proba de conformidade con todo o acordado, asinan o presente documento por cuadriplicado exemplar no lugar e data indicados no encabezamento.

Polo Concello de Sanxenxo

Asdo.: Telmo Martín González Asdo.: Aitor Castro Casas

Por Promociones y Gestiones del Tambre, S.L. Por Aries Real, S.L.

Asdo.: Delfa Losa García Asdo.: Delfa Losa García

Por CPI Proyectos, S.L.

Asdo.: Jesús Morón Porto

ANEXO I

Ficha das condicións urbanísticas ás que debe
adaptarse o Plan parcial do SU-7

Aproveitamento tipo área de repartición/sector: 0,451 % m2/m2.

Edificabilidade: 11.255 m2.

Densidade máxima de vivendas: 40 viv/ha.

Tipoloxía de edificación: establécese unha tipoloxía de edificación mixta formada por vivenda unifamiliar e vivenda colectiva, sen determinar unha porcentaxe de aproveitamento mínimo para cada unha das tipoloxías edificatorias.

Porcentaxe VPO: 5,55 % ou, de ser superior, a porcentaxe determinada polo Instituto Galego da Vivenda e Solo para o Concello de Sanxenxo que resulte de aplicación no momento de aprobación definitiva da modificación do Plan parcial.

Altura máxima:

• Vivenda colectiva: B+2.

• Vivenda unifamiliar: B+1.

Parcela mínima:

• Vivenda unifamiliar libre: 500 m2.

• Vivenda unifamiliar protexida: 150 m2.

Ocupación:

• Vivenda colectiva:

– Baixo rasante: 100 % da superficie neta da parcela, cun máximo de 2 andares.

– Sobre rasante: 50 % da superficie neta da parcela; exceptúase a parcela identificada no plano de ordenación como RCL1, cunha ocupación máxima do 60 % da superficie neta.

• Vivenda unifamiliar:

– Baixo rasante: 80 % da superficie da parcela, cun máximo dun andar.

– Sobre rasante: 55 % da superficie da parcela.

Disposición da edificación na parcela:

• Vivenda colectiva: recuamento mínimo das edificacións principais de 5,00 metros (ver plano de ordenación).

Casos particulares:

Na parcela RCL1 pódese edificar en liña coas aliñacións oficiais. Non obstante, o terceiro andar (B+2) deberá respectar un recuamento mínimo de 8,00 metros respecto da rúa A do ámbito (ver plano da parcela RCL1, anexo III).

Na parcela RCL3 a edificación deberá recuarse lateralmente respecto da parcela RUL1 un mínimo de 20,00 metros cara ao sur (ver plano de ordenación, anexo II).

• Vivenda unifamiliar: segundo o disposto no Plan parcial vixente.

Superficie máxima edificable e número máximo de vivendas por parcela:

Parcela	Edificabilidade (m2)	Nº de vivendas
RCL1	2.280	21
RCL2	3.955	36
RCL3	2.464	22
RCL4	1.591	14
RUL1-1 e 1-2	340	2
RUP1	625	5
Total	11.255	100

Características específicas:

• Non se permite o aproveitamento baixo cuberta, salvo nas parcelas identificadas como RUL1-1 e RUL1-2 xa edificadas.

• As cubertas das novas edificacións serán planas, cun acabado vexetal en, cando menos, o 60 % da súa superficie. Poderán finalizarse cun peto para poder executar correctamente a impermeabilización, cunha altura máxima de 60 cm sobre a cara superior do forxado da cuberta.

• Na parcela RCL3 poderán edificarse un máximo de tres alturas (B+2) a partir do recuamento de 20 metros cara ao sur e un máximo de dúas alturas (B+1) no resto da parcela (ver plano de ordenación).

• O 40 % da superficie da parcela non ocupada pola edificación deberá estar axardinada.

ANEXO II

Proposta de ordenación

ANEXO III

Parcela RCL 1
Plano de situación e localización
Plano de alzados e seccións