O Pleno do Concello de Pontevedra, na sesión ordinaria que tivo lugar o 30.9.2019, adoptou, entre outros, o seguinte acordo:
«(...) Primeiro. Prestar aprobación definitiva ao estudo de detalle formulado, mediante iniciativa particular, pola entidade mercantil Geriatros, S.A., para reordenación de volumes edificables e completar as aliñacións e rasantes cara ao lindeiro norte que entesta coa Igrexa da Virxe do Camiño, da parcela con referencia catastral 0277013NG3907N0001PH, abranguida entre as rúas do Doutor Loureiro Crespo e de Casimiro Gómez, na que se situaba o edificio da antiga comandancia da Garda Civil, instrumento urbanístico redactado polo arquitecto José Enrique Pérez-Ardá Criado, datado en novembro do 2018, con entrada no Rexistro Xeral do Concello o 21.11.2018, baixo o núm. 2018047365 e ao que se incorpora, ao situarse o seu ámbito nas zonas de servidumes aeronáuticas correspondentes ao aeroporto de Peinador e como parte integrante deste, o informe emitido pola Subdirección Xeral de Aeroportos e Navegación Aérea da Dirección Xeral de Aviación Civil (csv BQ3J7J795E01IZ8B), que inclúe, no seu anexo 1, un plano –que se incorpora aos planos normativos do estudo de detalle e que será dilixenciado xunto coa restante documentación obxecto de aprobación definitiva– no cal se representan as liñas de nivel das superficies limitadoras das referidas servidumes e que determinan as alturas (respecto do nivel do mar) que non deberá sobrepasar construción ningunha, incluídos todos os seus elementos (postes, antenas, carteis, etc.), así como o gálibo de viario ou vía férrea.
Segundo. Dispor a publicación do anuncio do acordo de aprobación definitiva do estudo de detalle no Diario Oficial de Galicia, con indicación expresa de que o seu contido íntegro estará á disposición do público na sede electrónica do Concello de Pontevedra www.sede.pontevedra.gal.
Unha vez publicado o anuncio no DOG, o instrumento de planeamento aprobado será inscrito no Rexistro de Planeamento Urbanístico de Galicia, a petición deste concello, para o que se remitirá un exemplar en soporte dixital, debidamente dilixenciado pola Secretaría do Pleno.
Ademais de no DOG e sede electrónica, o acordo será obxecto de publicación xunto co índice da documentos e planos –incluído o plano das servidumes aeronáuticas–, unha vez recibido o certificado de inscrición no Rexistro do Instrumento de Planeamento, no Boletín Oficial da provincia de Pontevedra, para lograr a súa eficacia e executividade.
Terceiro. Notificar este acordo individualmente, con ofrecemento dos recursos procedentes, á entidade promotora e a todas aquelas persoas que figuren como interesadas ou constituídas en parte no expediente, con comunicación expresa á Subdirección Xeral de Aeroportos e Navegación Aérea da Dirección Xeral de Aviación Civil do Ministerio de Fomento.(...)»
O que se fai público para a súa executividade, significándose que contra o acto de aprobación definitiva do estudo de detalle, que pon fin á vía administrativa, poderá interpoñer directamente, quen se considere lexitimado, recurso contencioso-administrativo, perante a Sala do Contencioso-Administrativo do Tribunal Superior de Xustiza de Galicia, no prazo de dous meses, contados a partir do día seguinte ao da publicación deste anuncio no DOG, consonte o establecido nos artigos 10.1 e 46.1 da Lei 29/1998, do 13 de xullo, reguladora da xurisdición contencioso-administrativa. Todo isto sen prexuízo de interpoñer calquera outro recurso que se entenda máis procedente e sexa conforme a dereito.
Así mesmo, infórmase que nestas datas xa se atopa publicado na sede electrónica do Concello de Pontevedra (ligazón exacta a día de hoxe: http://www.pontevedra.gal/PXOU/Doutor-Loureiro-Crespo-27_-_Estudo-detalle-aprobado-def.pdf) o contido íntegro do documento aprobado definitivamente polo Pleno do Concello de Pontevedra, en cumprimento do disposto na Lei 19/2013, de transparencia, acceso á información pública e bo goberno.
Pontevedra, 15 de outubro de 2019
Miguel Anxo Fernández Lores
Alcalde
