Para os efectos previstos no Real decreto lexislativo 1/2016, do 16 de decembro, polo que se aproba o texto refundido da Lei de prevención e control integrados da contaminación (BOE núm. 316, do 31 de decembro), faise público que por espazo de trinta (30) días hábiles, contados a partir do seguinte ao da publicación deste anuncio no Diario Oficial de Galicia, quedará exposto o documento titulado:
• «Proxecto básico de solicitude da autorización ambiental integrada e estudo de impacto ambiental en industria de produtos do mar».
• Promotora: Pescanova España, S.L.U.
• Localización: avenida da Ponte, parcela 13, Polígono Industrial de Sabón, 15142 Arteixo (A Coruña)».
Para que calquera interesado poida consultalo e, se é o caso, formular no citado prazo as alegacións, suxestións ou observacións que considere oportunas, o documento estará a disposición dos administrados:
– Na páxina web da Consellería de Medio Ambiente, Territorio e Vivenda:
(http://cmatv.xunta.gal>>medio ambiente e sostibilidade>>prevención e control de actividades>>autorización ambiental integrada>>proxectos en información pública).
As alegacións, suxestións ou observacións dirixiranse ao Servizo de Prevención e Control Integrados da Contaminación.
Santiago de Compostela, 8 de xullo de 2019
María Cruz Ferreira Costa
Directora xeral de Calidade Ambiental e Cambio Climático
ANEXO
Memoria resumen
Clave do expediente: 2019-IPPC-I-21
Peticionaria: Pescanova España, S.L.U.
CIF: B94123916.
Dirección social: rúa José Fernández López, s/n; 36320 Chapela, Redondela (Pontevedra).
Localización da instalación: polígono industrial de Sabón, avenida da Ponte, parcela 13, 15142 Arteixo (A Coruña). Coordenadas UTM (Fuso 29, Datum ETRS89): X: 540186, Y: 4795298.
Actividade: englobada no anexo I do Real decreto lexislativo 1/2016, do 16 de decembro, polo que se aproba o texto refundido da Lei de prevención e control integrados da contaminación; epígrafe 9.1 i. Planta de elaboración e preparados de produtos do mar.
Xustificación: o motivo da solicitude da autorización ambiental integrada é a instalación futura no establecemento industrial, dun novo cocedoiro (liña de cocedoiro 3), o que suporá un incremento da capacidade de produción, ata un total de 157 toneladas/día. Adicionalmente, incorporarase unha nova caldeira de vapor a gas natural, e ampliarase a capacidade das liñas de envasado.
Con estas melloras tecnolóxicas a capacidade produtiva máxima teórica modificarase, o que supón que a industria pase a ser unha instalación IPPC, ao superar a capacidade de produción diaria en máis de 75 toneladas/día.
Descrición: Pescanova España, S.L.U., no seu centro de Arteixo (A Coruña), ocupa unha parcela de 16.841 m2 de extensión. As edificacións existentes ocupan unha superficie de 11.756 m2.
O predio onde está situada a dita instalación xa foi ocupada por outras empresas que se dedicaban á mesma actividade. Así foi pasando de Alimentos del Atlántico, S.A. (ALIKO), constituída no ano 1977 a Frinova, S.A., no ano 1992. Posteriormente no ano 1993 foi transmitida á Bajamar Séptima, S.A., e finalmente no ano 2015 por escritura de fusión por absorción e dobre segregación pasa a ser Pescanova España, S.L.U.
En Pescanova, centro de Arteixo, existen 3 tipos de procesos produtivos:
1º. Lagostino cocido: conxelado ou refrixerado (2 liñas).
O proceso comeza coa desembalaxe do lagostino cru conxelado, envasado a granel. Introdución en cestas de plástico e transporte das cestas con produto a través dos distintos módulos:
– Módulo de desconxelación: duchas, a temperatura ambiente, de auga con ácido cítrico como bacteriostático.
– Módulo de cocción: duchas con auga a temperatura entre 95º e 98º C.
– Módulo de arrefriado: duchas con salmoira diluída para conseguir baixar a temperatura interior do lagostino ata uns 4º C. Desta forma evítase que o lagostino se siga cocendo e asegúrase a calidade organoléptica desexada.
– Módulo de conxelación: duchas con salmoira para a conxelación e absorción de sal polo lagostino. Ao finalizar este módulo hai un túnel de conxelación por aire forzado que asegura que o produto chegue aos -18º C.
A etapa final é o envasado en diferentes formatos: estoxo, bolsa e caixa de cartón, envase termomoldeado.
No caso de produto terminado cocido refrixerado, o lagostino retírase da liña antes da entrada ao módulo de conxelación e envásase na sala de refrixerado.
2º. Lagostino cru.
No caso de produto cru, retírase da liña antes da entrada ao módulo de cocción, conxélase no túnel de aire forzado, e envásase nos diversos formatos.
3º. Colas de lagostino peladas e cocidas.
Neste caso non pasa por ningún dos módulos de proceso. A materia prima conxelada a granel vai directamente ao proceso de envasado.