O artigo 26 do Real decreto lexislativo 1/2016, do 16 de decembro, polo que se aproba o texto refundido da Lei de prevención e control integrados da contaminación (Boletín Oficial del Estado núm. 316, do 31 de decembro), regula a revisión da autorización ambiental integrada.
Os artigos 15 e 16 do Real decreto 815/2013, do 18 de outubro, polo que se aproba o Regulamento de emisións industriais e de desenvolvemento da Lei 16/2002, do 1 de xullo, de prevención e control integrados da contaminación (Boletín Oficial del Estado núm. 251, do 19 de outubro), establecen o procedemento de revisión das autorizacións ambientais integradas.
Para os efectos previstos no artigo 15.5.a) do Real decreto 815/2013, sométese a información pública, durante un período de vinte (20) días hábiles contados a partir do día seguinte ao da publicación deste anuncio no Diario Oficial de Galicia, a documentación presentada por Financiera Maderera, S.A. para a revisión da autorización ambiental integrada da planta de fabricación de taboleiros de fibra de madeira de Padrón, para que calquera persoa interesada poida consultala e, de ser o caso, presentar dentro do dito prazo as alegacións, suxestións ou observacións que considere convenientes.
Poderase acceder a esta documentación nas dependencias da Dirección Xeral de Calidade Ambiental e Cambio Climático, Servizo de Prevención e Control Integrados da Contaminación, en horario de atención ao público (rúa de San Lázaro, s/n, Santiago de Compostela). Ademais, tamén se poderá consultar na páxina web da Consellería de Medio Ambiente, Territorio e Vivenda (http://cmatv.xunta.gal/>>medio ambiente e sostibilidade >>prevención e control de actividades>>autorización ambiental integrada >>proxectos en información pública).
Santiago de Compostela, 20 de xuño de 2019
María Cruz Ferreira Costa
Directora xeral de Calidade Ambiental e Cambio Climático
ANEXO
Expediente: 2018-IPPC-M-120.
Autorización ambiental integrada: 2006/0218_NAA/IPPC_059.
Categoría principal da instalación: 6.3.
Categoría secundaria da instalación: 1.1 a); 1.1 b).
Titular: Financiera Maderera, S.A. (A15005499).
Enderezo do titular: estrada A Coruña-Tui, km 57, 15884 Santiago de Compostela, A Coruña.
Localización da instalación: rúa Paraíso, s/n, 15900 Padrón, A Coruña.
Actividade principal: fabricación de taboleiros de fibra de madeira.
Descrición: a planta fabrica taboleiros de fibra de madeira a partir de troncos de árbores, mediante un proceso que pasa polas etapas de preparación da madeira (separación da codia, esteladura e cribado), tratamento da fibra e formación do taboleiro (dixestión, desfibrado, adición de colas, secado, formación de mantas e prensado) e de acabamento e expedición (arrefriado, estabilización, lixadura e corte e embalaxe). A planta conta cunha serie de instalacións térmicas que producen a calor e enerxía necesarias para o proceso.
Verteduras:
• Augas residuais industriais: non se efectúa vertedura ao dominio público, xa que son reincorporadas ao proceso industrial, vía tratamento físicoquímico ou vía evaporación-condensación e posterior xeración de vapor a partir do condensado.
• Augas residuais fecais: son vertidas á rede municipal con depuración posterior na estación depuradora de augas residuais municipal.
• Augas residuais pluviais: son vertidas a dominio público. Segréganse as augas procedentes das cubertas das naves, que son vertidas directamente, das augas de escorrega superficial, que son recollidas nunha canle no perímetro que bordea o río Ulla e son tratadas antes da súa vertedura.