A Resolución do 28 de decembro de 2018, da Axencia Galega de Innovación, estableceu as bases reguladoras para a concesión, en réxime de concorrencia competitiva, das axudas para o programa Industrias do futuro 4.0 (terceira convocatoria), orientado a proxectos de investigación industrial, desenvolvemento experimental e innovación centrados en tecnoloxías industriais innovadoras dentro da iniciativa Industrias 4.0-captación de investimentos, cofinanciadas polo Fondo Europeo de Desenvolvemento Rexional (Feder) no marco do programa operativo Feder Galicia 2014-2020, e procedeu á súa convocatoria para o ano 2019 (código do proxecto IN854A) (Diario Oficial de Galicia núm. 28, do 8 de febreiro de 2019).
Esta convocatoria prevé no seu artigo 7 dous períodos de presentación de solicitudes. A primeira edición é para as solicitudes presentadas ata o 8 de marzo de 2019.
O artigo 4 desta resolución de convocatoria establece os requisitos que deben cumprir as entidades beneficiarias para poder optar ás axudas.
Unha vez revisada a documentación inicial dos expedientes xunto coa documentación achegada tras os requirimentos oportunos, o órgano instrutor formulou proposta de resolución de inadmisión dunha solicitude que non cumpría coas exixencias contidas na convocatoria, nas bases reguladoras ou na normativa de subvencións, conforme o establecido no artigo 32.5 das bases reguladoras.
As solicitudes que resultaron admitidas foron obxecto do proceso de avaliación segundo os criterios de valoración establecidos no artigo 34 das bases reguladoras.
A Comisión de Selección prevista no artigo 33 das bases reguladoras reuniuse o día 3 de xuño de 2019 e elaborou unha relación por orde decrecente de puntuación das solicitudes que cumpren as condicións administrativas e técnicas para adquirir a condición de beneficiario, así como os seus custos subvencionables.
O crédito dispoñible para esta edición é o 50 % do orzamento da convocatoria, segundo o establecido no artigo 8.2 desta, e non resulta suficiente para financiar os proxectos seleccionados que superan a puntuación mínima de 60 puntos.
Unha vez realizada a instrución do procedemento e á vista do informe emitido pola Comisión de Selección e a proposta do órgano instrutor para a primeira edición, de acordo co disposto nos artigos 32 e 37 das bases reguladoras,
RESOLVO:
Primeiro. Conceder as axudas, respectando a intensidade máxima prevista no artigo 9 das bases reguladoras, ás entidades seleccionadas que figuran no anexo I desta resolución, por orde decrecente de puntuación.
Segundo. Denegar as solicitudes que acadaron unha valoración inferior a 60,80 puntos, por non dispoñer de crédito suficiente para o seu financiamento. Estas solicitudes relaciónanse no anexo II.
Terceiro. Desestimar as solicitudes que unha vez avaliadas non acadaron os 60 puntos de valoración que esixe o artigo 35.2 da convocatoria. Estas solicitudes recóllense no anexo III.
Cuarto. Publicar como anexo IV a relación de solicitudes que foron inadmitidas por non cumprir os requisitos da convocatoria.
Quinto. Abrir o prazo de presentación de solicitudes para a segunda edición desta convocatoria, desde o día seguinte ao da publicación desta resolución no DOG ata o 31 de xullo de 2019, de conformidade co disposto no artigo 7 das bases reguladoras.
As axudas propostas imputaranse ás aplicacións orzamentarias 09.A3.561A.770.00 e 09.A3.561A.781.0, segundo a natureza da entidade beneficiaria, nas cales existe crédito adecuado e suficiente nos orzamentos da Comunidade Autónoma de Galicia para o ano 2019.
Estas axudas están cofinanciadas no marco do programa operativo Feder Galicia 2014-2020, eixe 1: potenciar a investigación, o desenvolvemento tecnolóxico e a innovación, prioridade de investimento 1.2: o fomento do investimento empresarial en I+i, o desenvolvemento de vínculos e sinerxías entre as empresas, os centros de investigación e desenvolvemento e o sector do ensino superior, en particular mediante o fomento do investimento no desenvolvemento de produtos e servizos, a transferencia de tecnoloxía, a innovación social, a innovación ecolóxica, as aplicacións de servizo público, o estímulo da demanda, a interconexión en rede, as agrupacións e a innovación aberta a través dunha especialización intelixente e mediante o apoio á investigación tecnolóxica e aplicada, liñas piloto, accións de validación precoz dos produtos, capacidades de fabricación avanzada e primeira produción, en particular, en tecnoloxías facilitadoras esenciais e difusión de tecnoloxías polivalentes, obxectivo específico: 1.2.1 Impulso e promoción de actividades de I+i lideradas por empresas, apoio á creación e consolidación de empresas innovadoras e apoio á compra pública innovadora, e actuación CPSO 1.2.1.6 Proxectos de investigación, desenvolvemento e innovación centrados en tecnoloxías industriais innovadoras no marco da atracción do investimento privado para a posta en valor da I+D+i en Galicia.
Contra esta resolución, que non esgota a vía administrativa, poderán os interesados interpoñer recurso de alzada perante o presidente da Axencia Galega de Innovación no prazo dun mes, que comezará a contar a partir do día seguinte ao da publicación desta resolución no Diario Oficial de Galicia.
Santiago de Compostela, 17 de xuño de 2019
Patricia Argerey Vilar
Directora da Axencia Galega de Innovación
