De conformidade co disposto nos artigos 45 e 46 da Lei 39/2015 (BOE número 236, do 2 de outubro), do procedemento administrativo común das administracións públicas, e por motivos de interese público que o fan aconsellable, faise público, mediante a publicación no Boletín Oficial del Estado e no Diario Oficial de Galicia, que o 29 de marzo de 2019 a Presidencia de Portos de Galicia emitiu resolución que decreta a caducidade da concesión administrativa outorgada o 15 de decembro de 2006 á mercantil Combarromar, S.A., con CIF *****2547, con destino á construción e explotación de instalacións para a navegación recreativa no porto de Combarro (Poio).
Para os efectos do establecido no artigo 43.3 da Lei do procedemento administrativo común das administracións públicas, a notificación da resolución prodúcese coa posta á disposición na sede electrónica desta administración o día 29 de marzo de 2019.
A resolución emítea a Presidencia de Portos de Galicia con base nas competencias que lle confire a ese órgano o artigo 12.3.j) da Lei 6/2017, do 12 de decembro, de portos de Galicia, pola concorrencia da causa imperativa de caducidade prevista na condición xeral 43ª, alínea b), do título da concesión.
A declaración de caducidade implica con efectos inmediatos a extinción anticipada do título e a perda das garantías constituídas, así como a reversión a esta administración, gratuítas e libres de cargas, das obras e instalacións obxecto da concesión nos termos que se recollen no título da concesión.
Por aplicación do establecido no artigo 91.7 da Lei 6/2017, Portos de Galicia non asumirá ningún tipo de obriga laboral ou económica da persoa titular da concesión, vinculada ou non á actividade obxecto do título extinguido.
Os servizos técnicos competentes de Portos de Galicia realizarán as actuacións precisas que requira a extinción anticipada da concesión administrativa e a formalización da acta de reversión ao dominio público portuario, nun prazo máximo de tres (3) meses contados desde a notificación da resolución ao interesado, agás causa xustificada aceptada por Portos de Galicia.
Antes da data que se sinale para o levantamento da acta de reversión, e de acordo co previsto no artigo 91.1 da Lei 6/2017, se non o fixo con anterioridade, o interesado deberá retirar fóra do espazo portuario todos os materiais, equipamentos ou elementos que sexan da súa propiedade e que non revertan gratuitamente a Portos de Galicia, sen que as instalacións experimenten ningún quebrantamento; no caso de incumprimento, a dita retirada efectuaríaa Portos de Galicia de maneira subsidiaria e por conta dos interesados.
Con independencia das comunicacións que en vía de execución desta resolución efectúe esta entidade pública, fáiselle saber a Combarromar, S.A. a obriga que lle incumbe de dar traslado a todas aquelas persoas titulares de dereitos e/ou intereses nas instalacións, tanto en terra coma na lámina de auga, en virtude de contratos asinados como concesionario.
O expediente completo está na sede dos servizos centrais da entidade pública empresarial Portos de Galicia, onde poderá ser consultado, de luns a venres, das 9.00 ás 14.00 horas.
A resolución de caducidade, que esgota a vía administrativa, pode ser obxecto de recurso contencioso-administrativo que deberá ser interposto nun prazo de dous (2) meses contados desde o día seguinte ao da notificación que se efectuase ao interesado máis arriba sinalado ou, noutro caso, contado desde a publicación desta cédula, perante o Xulgado do Contencioso-Administrativo de Santiago de Compostela que corresponda, e tamén pode ser obxecto de recurso potestativo de reposición que se interporá, ante a Presidencia de Portos de Galicia, no prazo dun mes contado desde a mesma data.
Santiago de Compostela, 12 de abril de 2019
José Juan Durán Hermida
Presidente de Portos de Galicia
