Mediante Resolución do 20 de decembro de 2018 publicouse o acordo do Consello de Dirección que aproba as bases reguladoras para a concesión de axudas, en réxime de concorrencia non competitiva, a establecementos hoteleiros para a adquisición de materiais para a reforma dos establecementos (Reforma-Tur 19), así como a selección de entidades colaboradoras que participarán na súa xestión, e se procede á súa convocatoria (DOG núm. 19, do 28 de xaneiro de 2019).
Tras as primeiras tres semanas de vixencia dos incentivos obsérvase que o ritmo de execución é menor do esperado, o cal pode deberse á novidade dos incentivos e á necesidade de executar a adquisición antes da solicitude da axuda.
En consecuencia, para incrementar no posible a oportunidade de acollerse ás axudas por parte dos seus beneficiarios, e dado que non causa prexuízo a terceiros, acórdase ampliar os prazos previstos na resolución citada.
Na súa virtude e de conformidade coas facultades que teño conferidas,
RESOLVO:
Primeiro. Modifícanse os prazos indicados na Resolución do 20 de decembro de 2018 que quedan establecidos como segue:
O prazo de adhesión das entidades colaboradoras amplíase ata o 30 de abril de 2019.
O prazo de presentación de solicitudes de axuda amplíase ata o 30 de maio de 2019, agás que se produza o suposto de esgotamento de crédito. Neste caso informarase do peche adiantado do prazo de solicitude a través da páxina web do Igape e no Diario Oficial de Galicia (procedemento do Igape co código IG259).
O prazo de execución do proxecto, entendido como o prazo en que se deben ter adquiridos os bens subvencionables, amplíase ata o 14 de xuño de 2019.
O prazo de xustificación da axuda estenderase ata o 28 de xuño de 2019.
Segundo. Esta modificación entrará en vigor o día da súa publicación no Diario Oficial de Galicia.
Santiago de Compostela, 22 de marzo de 2019
Juan Manuel Cividanes Roger
Director do Instituto Galego de Promoción Económica