Mediante a Orde do 7 de marzo de 2018 modifícase a autorización do centro privado estranxeiro O Castro International School, de Mos, e queda configurado para impartir as ensinanzas de Nursery (3 anos de idade) ata o curso Year 6 (11 anos de idade) para 550 postos escolares; e para impartir os cursos Year 7 (12 anos de idade) ata Year 9 (14 anos de idade) para 150 postos escolares, do Currículo Nacional de Inglaterra.
A titularidade do centro solicita poder impartir as ensinanzas de Year 10 (15 anos de idade) ata Year 11 (16 anos de idade) para 100 postos escolares, e ampliar 25 postos escolares de Year 7 (12 anos de idade) a Year 9 (14 anos de idade), do Currículo Nacional de Inglaterra.
No certificado de acreditación, do 17 de xaneiro de 2018, o British Council sinala que se pode conceder unha autorización temporal, ata o 13 de novembro de 2021, para impartir as ensinanzas de Year 10 (15 anos de idade) ata Year 11 (16 anos de idade) do Currículo Nacional de Inglaterra; ensinanzas que se corresponden con 3º e 4º de educación secundaria obrigatoria, do sistema educativo de España.
Logo da tramitación do expediente de acordo co establecido no Real decreto 806/1993, do 28 de maio, sobre réxime de centros docentes estranxeiros en España, así como no Decreto 133/1995, do 10 de maio, de autorización de centros docentes privados para impartir ensinanzas de réxime xeral non universitarias e coa Orde do 20 de setembro de 1995 que o desenvolve, por proposta da Dirección Xeral de Centros e Recursos Humanos,
DISPOÑO:
Artigo 1. Autorización temporal
Conceder autorización temporal, ata o 13 de novembro de 2021, ao centro privado estranxeiro O Castro International School, para impartir as ensinanzas de Year 10 (15 anos de idade) ata Year 11 (16 anos de idade), e ampliar en 25 postos escolares de Year 7 (12 anos de idade) a Year 9 (14 anos de idade), do Currículo Nacional de Inglaterra. O centro queda configurado como se detalla a seguir:
Denominación xenérica: Centro privado estranxeiro (CPREX).
Denominación específica: O Castro International School.
Código do centro: 36024835.
Titular: O Castro International School of Vigo, S.L.
Domicilio: Camiño de San Cosme, nº 1.
Localidade: San Pedro de Cela.
Concello: Mos.
Provincia: Pontevedra.
Composición resultante:
Currículo Nacional de Inglaterra para alumnado español e estranxeiro.
• Autorización definitiva:
a) Nursery (3 anos de idade) ata o curso de Year 6 (11 anos de idade), para 550 postos escolares, que corresponde co 2º ciclo de educación infantil e de 1º a 6º curso de educación primaria do sistema educativo de España.
b) Year 7 (12 anos de idade) ata Year 9 (14 anos de idade), para 175 postos escolares, que corresponde a 1º e 2º curso de educación secundaria obrigatoria do sistema educativo de España.
• Autorización temporal ata o 13 de novembro de 2021, de Year 10 (15 anos de idade) ata Year 11 (16 anos de idade), para 100 postos escolares, que corresponde a 2º e 3º curso de educación secundaria obrigatoria.
Artigo 2. Ensinanzas de lingua española e galega
O centro deberá complementar as ensinanzas autorizadas con ensinanzas de lingua española e de lingua galega, que deberán impartirse co mesmo deseño e horario establecidos no decreto da Comunidade Autónoma de Galicia, que regula as ensinanzas correspondentes á educación infantil e primaria.
Así mesmo, a cultura española deberá desenvolver os contidos esenciais da correspondente área de coñecemento, recollidos na norma reguladora das ensinanzas.
Artigo 3. Profesorado
O profesorado que imparta as ensinanzas mencionadas no artigo 2 deberá reunir os requisitos de titulación requiridos pola lexislación española para o nivel educativo, e terá os dereitos e obrigas que determina o artigo 12 do Real decreto 806/1993, do 28 de maio, sobre réxime de centros docentes estranxeiros en España.
A Xefatura Territorial da Consellería de Educación, Universidade e Formación Profesional de Pontevedra, logo do informe do Servizo Territorial de Inspección Educativa, aprobará expresamente a relación de persoal que imparta estas materias.
Artigo 4. Validez autorización temporal
A autorización temporal a que se fai referencia no artigo 1 desta orde terá validez ata o 13 de novembro de 2021, conforme o certificado de acreditación emitido polo British Council. A partir desta data, a autorización dependerá dunha nova inspección dos servizos da Embaixada Británica.
Artigo 5. Inscrición no rexistro
Esta orde dará lugar á correspondente inscrición no Rexistro de Centros da Comunidade Autónoma de Galicia.
Artigo 6. Obrigas do centro
O centro queda obrigado ao cumprimento da normativa vixente e sometido á inspección educativa da Consellería de Educación, Universidade e Formación Profesional de conformidade co establecido no artigo 9 do Real decreto 806/1993, do 28 de maio, así como a solicitar unha nova autorización e inscrición no caso de que se produza calquera variación nos elementos e circunstancias que dan lugar a esta autorización.
Contra esta orde, que esgota a vía administrativa, as persoas interesadas poderán formular recurso potestativo de reposición ante esta consellería, no prazo dun mes, contado a partir do día seguinte ao da súa publicación no Diario Oficial de Galicia, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou ben, directamente, o recurso contencioso-administrativo no prazo de dous meses desde a mesma data, ante a Sala do Contencioso-Administrativo do Tribunal Superior de Xustiza de Galicia, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 20 de febreiro de 2019
Carmen Pomar Tojo
Conselleira de Educación, Universidade e Formación Profesional