O acordo da zona de concentración parcelaria de Fanoi (Abadín-Lugo) foi aprobado pola dirección xeral competente na materia con data do 14 de decembro de 2007, e foi notificado e publicado na forma legalmente prevista. Na actualidade atópase pendente de declaración de firmeza.
Con posterioridade a estes actos, o Concello de Abadín solicitou a cesión da titularidade dos seguintes predios do Fondo de Terras para os fins que se indican:
• Predio nº 187 para dedicalo a aparcadoiro.
• Predio nº 193-2 para actividades culturais e deportivas e aparcadoiro.
• Predio nº 484 para área recreativa.
Vista a proposta da Xunta Local da zona, a Lei de reforma e desenvolvemento agrario, do 12 de xaneiro de 1973, a disposición transitoria primeira da Lei 4/2015, do 17 de xuño, de mellora da estrutura territorial agraria de Galicia, a Lei 10/1985, do 14 de agosto, de concentración parcelaria para Galicia, modificada pola Lei 12/2001, do 10 de setembro; a Lei 39/2015, do 1 de outubro, do procedemento administrativo común das administracións públicas, e demais disposicións vixentes de aplicación ao caso.
Dado o destino para os cales se solicitan os referidos predios, e respecto dos que son perfectamente subsumibles no suposto recollido no artigo 32 da antedita lei galega, esta dirección xeral
RESOLVE:
1. Modificar o acordo de concentración parcelaria da zona de Fanoi (Abadín-Lugo) e adxudicar ao Concello de Abadín a titularidade dos predios nº 187, 193-2 e 484 -que causan baixa no Fondo de Terras da zona- para seren destinados aos fins que se determinan na parte expositiva.
Estes predios foron obxecto de revisión para a súa coordinación entre os seus datos alfanuméricos e gráficos. A cesión levouse a cabo coas seguintes superficies e valores:
• Predio nº 187 con 4.624 m2 e 405.140 puntos.
• Predio nº 93-2 con 5.389 m2 e 431.120 puntos.
• Predio nº 484 con 475 m2 e 47.500 puntos.
2. Transcorridos cinco anos dende a cesión das propiedades sen que os predios fosen destinados aos fins para os cales son adxudicados, a titularidade dos referidos predios reverterá sobre o Fondo de Terras da zona, o patrimonio da Comunidade Autónoma, a Axencia Galega de Desenvolvemento Rural (Agader) ou outra entidade que corresponda, segundo o caso.
Lugo, 13 de decembro de 2018
María Olga Iglesias Fontal
Xefa territorial de Lugo