A Xunta de Goberno local, na sesión extraordinaria que tivo lugar o 11 de outubro de 2018, adoptou, entre outros, o seguinte acordo:
«Primeiro. Suspender durante o prazo dun ano as licenzas de parcelación, nova edificación e demolición no ámbito do Plan especial da Maestranza, aprobado definitivamente o 12 de abril de 1994, e na área do PEPRI, aprobado definitivamente o 26 de xaneiro de 2015, sinalada no plano de delimitación e suspensión, na área sinalada no informe do arquéologo municipal do 3 de agosto de 2018: Porta Real, Paseo da Dársena, Explanada do Parrote, Paseo do Parrote, Ánimas, Castelo de San Antón, Paseo Francisco Vázquez ata a altura da rúa Beiramar, avenida de Metrosidero e rúa Campo da Estrada, para os efectos de estudar a modificación puntual do dito planeamento.
A suspensión non afectará as actividades sinaladas no artigo 86.3 do Regulamento da Lei do solo sen que afecte tampouco as obras de rehabilitación integral que estarán permitidas consonte o previsto no PEPRI e na Lei 5/2016, do 4 de maio, de patrimonio cultural de Galicia.
Xúntase ao presente acordo o resumo executivo co contido previsto no artigo 86.4 do Decreto 143/2016, do 22 de setembro, polo que foi aprobado o regulamento da Lei do solo.
Segundo. Incoar o expediente de modificación puntual do PERI da Maestranza, do 12 de abril de 1994 e do PEPRI aprobado definitivamente o 26 de xaneiro de 2015, para os efectos de pór en valor o sistema amurallado defensivo da Cidade Vella da Coruña e os usos compatibles e deficitarios dela.
Terceiro. Publicar o presente acordo no Diario Oficial de Galicia nun dos maiores diarios de difusión da provincia, así como no taboleiro de anuncios da sede electrónica deste concello.
Cuarto. Comunicar o presente acordo á Consellería de Cultura e Turismo».
Contra este acordo cabe interpor, de conformidade co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, recurso potestativo de reposición ante o órgano que o ditou, no prazo máximo dun mes, ou ben recurso contencioso-administrativo ante a sala correspondente do Tribunal Superior de Xustiza de Galicia, no prazo de dous meses, que se contarán a partir do día seguinte ao da publicación deste anuncio, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa, sen prexuízo de interpor calquera outro recurso que se entenda máis procedente e sexa conforme dereito.
O plano e o resumo executivo a que fai referencia o acordo pódense descargar da páxina web de Urbanismo www.coruna.es/urbanismo, na epígrafe Documentos en exposición pública.
O que se publica para xeral coñecemento.
A Coruña, 22 de outubro de 2018
O alcalde
P.D. (Decreto do 15.6.2015)
Xiao Varela Gómez
Tenente de alcalde da Área de Rexeneración Urbana e Dereito á Vivenda