Antecedentes:
Primeiro. O día 21 de abril de 2017 publicouse, no Diario Oficial de Galicia núm. 77, o anuncio do 11 de abril de 2017 polo que se somete ao trámite de información pública o proxecto de construción de itinerario peonil e ciclista na PO-307, treito Deiro-ponte da Illa de Arousa (p.q. 0+000-1+650) e PO-549, treito Tarrío-Cores (p.q. 6+200-7+200), clave PO/16/101.06, así como a relación individual de bens, dereitos e propietarios afectados polo proxecto referido.
Segundo. Despois da análise das alegacións, certificados e informes presentados, o 12 de setembro de 2018 apróbase o expediente de información pública e definitivamente o proxecto de construción de itinerario peonil e ciclista na PO-307, treito Deiro-ponte da Illa de Arousa (p.q. 0+000-1+650) e PO-549, treito Tarrío-Cores (p.q. 6+200-7+200), clave PO/16/101.06.
Este proxecto de construción ten por obxecto a execución dun itinerario peonil mediante a construción dunha senda peonil e algún treito de beirarrúas, que permitan incentivar o traspaso de usuarios de vehículos motorizados a usuarios de bicicletas e peóns, así como garantir unha circulación segura dos viandantes e ciclistas.
A competencia para a execución da expropiación forzosa, no ámbito das estradas non incorporadas á rede do Estado con itinerarios que se desenvolvan integramente no seu territorio corresponde á Comunidade Autónoma de Galicia, ao abeiro do número dous do artigo 28 do Estatuto de autonomía de Galicia, aprobado pola Lei orgánica 1/1981, do 6 de abril.
Corresponde ao Consello da Xunta de Galicia, como órgano equivalente ao Consello de Ministros no ámbito da Administración autonómica, o recoñecemento concreto da utilidade pública e a declaración da urxente ocupación dos bens afectados pola expropiación a que dá lugar a realización da obra, segundo o previsto nos artigos 10 e 52 da Lei do 16 de decembro de 1954, de expropiación forzosa.
Na súa virtude, por proposta da conselleira de Infraestruturas e Mobilidade e logo da deliberación do Consello da Xunta de Galicia, na súa reunión do día vinte e sete de setembro de dous mil dezaoito,
DISPOÑO:
Artigo único
Declarar, en concreto, a utilidade pública e a necesidade de urxente ocupación, para os efectos de expropiación forzosa, dos bens e dereitos que se concretan no expediente administrativo instruído, así como en calquera das modificacións que sexa necesario realizar para a execución do proxecto de construción de itinerario peonil e ciclista na PO-307, treito Deiro-ponte da Illa de Arousa (p.q. 0+000-1+650) e PO-549, treito Tarrío-Cores (p.q. 6+200 -7+200), clave PO/16/101.06.
Santiago de Compostela, vinte e sete de setembro de dous mil dezaoito
Alberto Núñez Feijóo
Presidente
Ethel Mª Vázquez Mourelle
Conselleira de Infraestruturas e Mobilidade