O Decreto 52/2018, do 5 de abril, polo que se crea a Axencia Galega da Calidade Alimentaria e se aproban os seus estatutos (DOG núm. 102, do 30 de maio) entrou en vigor o 30 de maio de 2018.
A disposición adicional primeira do citado decreto establece que a constitución da Axencia Galega da Calidade Alimentaria producirase coa celebración da sesión constitutiva do Consello Reitor, que terá lugar dentro do prazo de tres meses desde a entrada en vigor deste decreto, data a partir da cal se realizarán todas as actuacións conducentes á súa adaptación organizativa e de funcionamento.
A disposición adicional segunda do citado decreto establece a adscrición de unidades administrativas do ente de dereito público Instituto Galego da Calidade alimentaria no momento da súa constitución.
Na súa virtude e previa convocatoria pola conselleira do Medio Rural, o Consello Reitor da Axencia Galega da Calidade Alimentaria celebrou a súa sesión constitutiva o día 29 de agosto de 2018
RESOLVEU:
Adscribir á axencia pública Agacal as unidades administrativas de nivel orgánico inferior a servizo, previstas na relación de postos de traballo do ente de dereito público Ingacal que se transforma, ou instrumento equivalente que desenvolva tarefas inherentes ás competencias asumidas pola nova axencia.
A adscrición efectuarase aos órganos da estrutura orgánica previstos nos estatutos da axencia pública autonómica.
Os postos de traballo correspondentes ás unidades administrativas que son obxecto de adscrición continuarán subsistentes e serán retribuídos con cargo aos créditos orzamentarios da Axencia.
Santiago de Compostela, 29 de agosto de 2018
Ángeles Vázquez Mejuto
Presidenta da Axencia Galega da Calidade Alimentaria