O Decreto 52/2018, do 5 de abril, polo que se crea a Axencia Galega da Calidade Alimentaria e se aproban os seus estatutos (DOG núm. 102, do 30 de maio) entrou en vigor o 30 de maio de 2018.

A disposición adicional primeira do citado decreto establece que a constitución da Axencia Galega da Calidade Alimentaria se producirá coa celebración da sesión constitutiva do Consello Reitor, que terá lugar dentro do prazo de tres meses desde a entrada en vigor deste decreto, data a partir da cal se realizarán todas as actuacións conducentes á súa adaptación organizativa e de funcionamento.

A disposición adicional quinta do citado decreto establece a adscrición de órganos e unidades administrativas da Consellería do Medio Rural no momento da súa constitución.

Na súa virtude e logo de convocatoria pola conselleira do Medio Rural, o Consello Reitor da Axencia Galega da Calidade Alimentaria celebrou a súa sesión constitutiva o día 29 de agosto de 2018,

RESOLVO:

Adscribir á axencia pública Agacal as unidades administrativas de nivel orgánico inferior a servizo, previstas na relación de postos de traballo da Consellería do Medio Rural correspondentes á Subdirección Xeral de Formación e Innovación Agroforestal da Dirección Xeral de Ordenación Forestal.

Adscribir as unidades administrativas con nivel orgánico inferior a servizo previstas na relación de postos de traballo da Consellería do Medio Rural correspondentes ao Servizo de Promoción da Calidade Agroalimentaria da Subdirección Xeral de Industrias e Calidade Agroalimentaria da Subdirección Xeral de Gandería, Agricultura e Industrias Agroalimentarias.

A adscrición efectúase aos órganos da estrutura orgánica prevista nos estatutos da Axencia.

Santiago de Compostela, 29 de agosto de 2018

Ángeles Vázquez Mejuto
Presidenta da Axencia Galega da Calidade Alimentaria