O Pleno da Corporación, na sesión ordinaria que tivo lugar o día 19 de xullo de 2018, adoptou entre outros, o seguinte acordo:
«Primeiro. Aprobar definitivamente a modificación puntual da ordenanza especial OE-5 Galeras do PXOM, no ámbito do antigo hospital. O documento que se somete a aprobación definitiva incorpora os planos de ordenación reformados segundo o indicado no informe da directora xeral de Ordenación do Territorio e Urbanismo.
Segundo. En estrito cumprimento do sinalado no citado informe, en relación co emitido pola Dirección Xeral do Patrimonio Cultural –que exixe adecuar a normativa do PXOM ao nivel de protección estrutural asignado ao edificio–, engádese o seguinte parágrafo no artigo 171.7 da normativa do PXOM:
O inmoble A-68 (Antigo Hospital de Galeras), catalogado co nivel de protección estrutural na modificación puntual da ordenanza especial OE-5 Galeras do PXOM, no ámbito do antigo hospital, rexerase polo disposto na citada modificación, así como polas disposicións aplicables da Lei 5/2016, do patrimonio cultural de Galicia. Supletoriamente, e sempre que non se opoña ou contradiga o sinalado anteriormente, aplicarase o réxime establecido nos artigos seguintes do PXOM para os edificios de protección non integral.
O acordo de aprobación definitiva publicarase no Diario Oficial de Galicia. Unha vez publicado o acordo, remitirase á Consellería de Medio Ambiente e Ordenación do Territorio a documentación exixida polo artigo 88.3 da LSG, para os efectos de inscribir a modificación puntual do PXOM no Rexistro de Planeamento Urbanístico de Galicia.
Logo de que conste a inscrición no Rexistro, procederase a publicar a normativa no Boletín Oficial da provincia.
Así mesmo, notificarase persoalmente o acordo ás persoas que formularon alegacións, dandolles traslado do acordo de aprobación provisional, así como do informe técnico de contestación ás alegacións presentadas».
Contra o acordo da aprobación definitiva da citada modificación puntual do PXOM, poderase interpoñer directamente recurso contencioso-administrativo ante o Tribunal Superior de Xustiza de Galicia no prazo de dous meses, contados a partir do día seguinte ao da publicación deste anuncio.
Santiago de Compostela, 13 de agosto de 2018
Martiño Noriega Sánchez
Alcalde