O 27 de abril de 2018 publicouse no Diario Oficial de Galicia a Resolución do 12 de abril de 2018 pola que se establecen as bases reguladoras e se convocan para o ano 2018 as axudas aos investimentos en tecnoloxías forestais, procesamento, mobilización e comercialización de produtos forestais, cofinanciadas co Fondo Europeo Agrícola de Desenvolvemento Rural (Feader) no marco do Programa de desenvolvemento rural de Galicia 2014-2020.
O artigo 29 da dita resolución dispón que as axudas se financiarán con cargo á aplicación orzamentaria 09.A4.741A.770.0, código de proxecto 2018 00009, con 5.446.125 euros para o ano 2018 e 2.723.063 euros para o ano 2019.
O artigo 28 establece dous prazos de xustificación: 15 de outubro de 2018 para a anualidade de 2018 e 15 de marzo de 2019 para a anualidade de 2019.
O artigo 26 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, establece que na convocatoria da subvención se deberá indicar a contía máxima da subvencións e a súa distribución por anualidades atendendo o momento en que se prevexa realizar o gasto derivado das subvencións que se concedan.
O remate da fase inicial de tramitación das solicitudes de axuda determinou a necesidade de modificar a distribución inicialmente aprobada. Esta modificación non supón prexuízo para os beneficiarios e persegue unha maior eficacia e eficiencia na xestión dos recursos dispoñibles.
En consecuencia, de acordo co mencionado no artigo 26, e para realizar o dito reaxuste de anualidades sen incremento do gasto total da convocatoria e respectando os límites que establece o artigo 58 do Decreto lexislativo 1/1999,
RESOLVO:
Artigo único. Modificación da Resolución do 12 de abril de 2018 pola que se establecen as bases reguladoras e se convocan para o ano 2018 as axudas aos investimentos en tecnoloxías forestais, procesamento, mobilización e comercialización de produtos forestais, cofinanciadas co Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020 (procedemento IN500A)
O artigo 29 da Resolución do 12 de abril de 2018 pola que se establecen as bases reguladoras e se convocan para o ano 2018 as axudas aos investimentos en tecnoloxías forestais, procesamento, mobilización e comercialización de produtos forestais, cofinanciadas co Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020 queda redactado como segue:
Artigo 29. Financiamento
1. As axudas financiaranse con cargo á aplicación orzamentaria 09.A4.741A.770.0, código de proxecto 2018 00009, con 3.706.400,44 euros para o ano 2018 e 4.462.787,56 euros para o ano 2019.
2. Este orzamento pódese ver incrementado con remanentes adicionais de acordo coas dispoñibilidades de crédito. En todo caso, as concesións limitaranse ás dispoñibilidades orzamentarias.
3. A Axencia Galega da Industria Forestal poderá aumentar o orzamento dispoñible para o financiamento desta resolución cando o incremento derive de:
a) Unha xeración, ampliación ou incorporación de crédito.
b) A existencia de remanentes doutras convocatorias financiadas con cargo ao mesmo crédito ou a créditos incluídos no mesmo programa ou en programas do mesmo servizo.
O incremento do crédito queda condicionado á declaración de dispoñibilidade de crédito como consecuencia das circunstancias antes sinaladas e, se é o caso, unha vez aprobada a modificación orzamentaria que proceda.
4. Estas axudas financiaranse con cargo ao Programa de desenvolvemento rural de Galicia, cunha achega do Feader do 75 %, do Ministerio de Agricultura e Pesca, Alimentación e Medio Ambiente do 7,5 %, e da Xunta de Galicia do 17,5 %.
Disposición derradeira única. Entrada en vigor
Esta resolución producirá efectos desde o día seguinte ao da súa publicación no Diario Oficial de Galicia.
Santiago de Compostela, 23 de xullo de 2018
José Ignacio Lema Piñeiro
Director da Axencia Galega da Industria Forestal
