Na sesión celebrada polo Xurado Provincial o día 14 de xuño de 2018, figura o seguinte acordo:

Monte de Ortoá (expediente 68/78), pertencente aos veciños da parroquia de Ortoá, no termo municipal de Sarria, e clasificado con data do 30 de abril de 1979.

Con data do 31 de maio de 2018, o Servizo de Montes elabora un informe-proposta de homologación do deslindamento do monte de utilidade pública Ludeiro e Macaque na parte do perímetro correspondente co monte veciñal de Ortoá.

No informe consta que o monte Ludeiro e Macaque estaba incluído no Catálogo de utilidade pública co número 77-B e foi deslindado por resolución publicada no Boletín Oficial da provincia do 8 de abril de 1960 de acordo coas actas, planos e rexistro topográficos unidos ao expediente, cunha cabida total de 582 hectáreas.

Tras as sentenzas ditadas nos recursos contencioso-administrativos interpostos, o monte quedaría cunha superficie final de 276 ha, dividido en dúas parcelas:

Zona A: Ludeiro, da pertenza da parroquia de Meixente, cunha superficie de 163 ha.

Zona B: Macaque, da pertenza das parroquias de Ortoá, Maside, Arxemil e Frades, cunha superficie de 113 ha.

No BOP do 18 de novembro de 1967 publícase a aprobación da práctica do amolloamento do monte Ludeiro e Macaque. Á comunidade de Ortoá correspóndelle a superficie da parcela Macaque delimitada polos fitos nº 58 a 71, nº 89 a 109 e nº 113 a 137.

Con data do 20 de outubro de 1969 acórdase mediante unha orde ministerial dar por ben executado o amolloamento do monte de utilidade pública 77-B.

Para a elaboración do informe pártese da premisa de que o monte de Ortoá, clasificado como veciñal en man común, ten unha identidade coa parcela Macaque e, como consecuencia, xa foi deslindado e amolloado.

Os técnicos do Servizo de Montes efectuaron un levantamento topográfico dos fitos colocados no amolloamento do monte de utilidade pública, e recolleron no informe as coordenadas de cada un dos fitos.

Conforme isto modificáronse os esbozos, e produciuse, por unha banda, unha redución da superficie que segundo o amolloamento sería propiedade particular e zonas que foron obxecto de concentración parcelaria, e, por outra, unha inclusión dentro de perímetro, axustándose ao deslindamento de UP en todo o seu perímetro, salvo dúas zonas en que se efectúa un axuste á planimetría catastral.

Como consecuencia dos axustes realizados, o monte de Ortoá queda cunha superficie resultante de 95,341 ha, conforme o perímetro marcado nos planos adxuntos ao informe.

En vista do anterior, o Xurado, por unanimidade, acorda, aceptando a proposta do Servizo de Montes, homologar o deslindamento referido e proceder ás oportunas correccións no expediente, de conformidade co informe do Servizo de Montes.

Contra este acordo, desde o día seguinte ao da súa publicación no Diario Oficial de Galicia, poderase interpoñer recurso potestativo de reposición, ante o Xurado Provincial de Montes Veciñais en Man Común de Lugo, no prazo dun mes, ou ben directamente recurso contencioso-administrativo, ante o Xulgado do Contencioso-Administrativo de Lugo, no prazo de dous meses, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e no artigo 46 da Lei 29/1998, do 13 de xullo, da xurisdición contencioso-administrativa.

Mª Olga Iglesias Fontal
Presidenta do Xurado Provincial de Clasificación de Montes
Veciñais en Man Común de Lugo