Mediante a Resolución do 11 de decembro de 2017 (Diario Oficial de Galicia núm. 237, do 15 de decembro), a Dirección Xeral da Función Pública convocou un concurso ordinario para a provisión de postos de traballo vacantes do corpo superior de Administración xeral da Comunidade Autónoma de Galicia, escala superior de finanzas, e do corpo de xestión de Administración xeral da Comunidade Autónoma de Galicia, escala técnica de finanzas.
Mediante a Resolución da Dirección Xeral da Función Publica do 16 de abril de 2018, (Diario Oficial de Galicia núm. 77, do 20 de abril), fixéronse públicas as puntuacións provisionais das persoas participantes admitidas ao concurso.
A base VIII da convocatoria, relativa á comisión de valoración, establece no seu punto quinto que «examinadas e resoltas pola comisión as reclamacións presentadas, elevarase proposta definitiva de resolución do concurso. A convocatoria resolverase por resolución da persoa titular da Dirección Xeral de Función Pública, que se publicará no Diario Oficial de Galicia e na cal figurarán os destinos adxudicados a cada un dos participantes».
A comisión de valoración, na súa xuntanza do día 21 de maio de 2018, acordou, unha vez vistas as reclamacións presentadas contra a valoración provisional de méritos, elevar á Dirección Xeral da Función Pública a proposta definitiva de resolución do concurso.
Por razóns organizativas e para os efectos de manter o correcto funcionamento dos servizos públicos difírense os prazos posesorios derivados da resolución do concurso.
Consonte o anterior, esta dirección xeral, ao abeiro do disposto na Orde da Consellería de Facenda do 8 de xullo de 2013 sobre delegación de competencias na Dirección Xeral da Función Pública en materia de convocatoria e resolución de concursos de traslados (Diario Oficial de Galicia núm. 136, do 18 de xullo), modificada pola Orde da Consellería de Facenda do 26 de agosto de 2013 (Diario Oficial de Galicia núm. 162, do 27 de agosto), e de conformidade co previsto na base VIII.5 da convocatoria,
DISPÓN:
Primeiro. Facer públicas as adxudicacións de postos de traballo que se relacionan no anexo I ás persoas que nel se especifican. Esta información atópase á disposición das persoas interesadas no portal web corporativo da Xunta de Galicia, http://funcionpublica.xunta.gal, na epígrafe de <concurso de traslados>.
Segundo. De acordo co disposto na base IX da convocatoria do concurso de traslados, os destinos adxudicados serán irrenunciables salvo que con anterioridade á finalización do prazo posesorio se obteña outro destino mediante convocatoria pública, ben polo procedemento de libre designación ou por concurso, casos en que poderán optar entre os postos adxudicados, están obrigados a comunicar por escrito a opción seleccionada á Dirección Xeral da Función Pública no prazo dos tres días seguintes ao da resolución pola que se abren prazos posesorios.
Os traslados que deriven da resolución deste concurso terán a consideración de voluntarios polo que, en consecuencia, non xerarán dereito a indemnización.
Terceiro. De conformidade co disposto na Lei 2/2015, do 29 de abril, do emprego público de Galicia, e no artigo 14 do Decreto 93/1991, do 20 de marzo, modificado polo Decreto 166/2013, do 14 de novembro, polo que se aproba o Regulamento de provisión de postos de traballo, promoción profesional e promoción interna, o prazo de toma de posesión comezará a contar a partir do día seguinte ao do cesamento e será de tres días hábiles se non implica cambio de residencia, ou de sete días hábiles se comporta cambio de residencia.
O cesamento deberá efectuarse con data do 17 de setembro de 2018.
Se a adxudicación comporta reingreso ao servizo activo, o prazo de toma de posesión será dun mes e deberá computarse desde o día 17 de setembro de 2018.
Cuarto. En aplicación do parágrafo terceiro da base I.2.a) da convocatoria do concurso, relativo ás persoas que están obrigadas a participar nel, ao persoal funcionario de carreira que cumprindo a obriga establecida no artigo 97.5 da LEPG non obteña praza consecuencia da resolución do concurso, seralle adxudicado pola Dirección Xeral da Función Pública, de oficio e con carácter definitivo, un posto de traballo correspondente ao seu corpo ou escala de entre aqueles que queden vacantes, polo que, en consecuencia, se adxudica a María del Sagrario Roel Alonso, DNI 36073479A, o posto de traballo que se relaciona no anexo II.
A data de cesamento e os prazos de toma de posesión correspóndense cos referenciados no punto terceiro desta resolución.
Quinto. Contra esta resolución, que pon fin á vía administrativa, poderase interpoñer recurso potestativo de reposición ante o conselleiro de Facenda no prazo dun mes contado desde o día seguinte ao da súa publicación no Diario Oficial de Galicia, de conformidade co establecido na Lei 39/2015 do 1 de outubro, do procedemento administrativo común das administracións públicas, ou se poderá impugnar directamente ante o Xulgado do Contencioso-Administrativo de Santiago de Compostela, no prazo de dous meses contados desde a mesma data, segundo a Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 29 de maio de 2018
José María Barreiro Díaz
Director xeral da Función Pública
