O Decreto 244/1999, do 29 de xullo, polo que se regula a cobertura de diversas prazas por persoal funcionario público docente que imparte ensinanzas de niveis non universitarios, prevé no seu artigo 3.2, que as prazas que nel se indican poderán ser cubertas mediante o correspondente concurso específico de méritos e polo prazo que se determine na convocatoria. As devanditas prazas deberán ser provistas a través dun concurso específico de méritos mediante nomeamento temporal con reserva do posto de traballo de orixe e polo tempo que se estableza na correspondente convocatoria que, en ningún caso, poderá exceder en máis de seis anos.

A atención do alumnado con necesidades específicas de apoio educativo nos centros de escolarización preferente contemplados na disposición adicional quinta do Decreto 30/2007, do 15 de marzo, polo que se regula a admisión do alumnado en centros docentes sostidos con fondos públicos que imparten as ensinanzas reguladas na Lei orgánica 2/2006, do 3 de maio, de educación, debe efectuarse con profesorado con destino definitivo. Sen prexuízo do anterior, a escolarización do alumnado de atención preferente en centros ordinarios que, por non ser de escolarización preferente, non van contar con recursos humanos permanentes, aconsella unha certa permanencia do mestre ou mestra co alumnado de ser posible durante unha etapa educativa, evitando un cambio de docente cada curso académico. Posto que estas necesidades educativas teñen un carácter temporal e non poden cubrirse con carácter definitivo, procede a súa provisión en réxime de comisión de servizos, sen prexuízo de que este profesorado atenda outras posibles necesidades existentes no centro.

Na súa virtude, a Consellería de Cultura, Educación e Ordenación Universitaria

DISPÓN:

Artigo 1. Obxecto

Convocar concurso público de méritos específico entre persoal funcionario de carreira e persoal funcionario en prácticas do corpo de mestres, para adxudicar, en comisión de servizos, as prazas que figuran no anexo III desta orde.

Artigo 2. Participantes e requisitos

Poderá participar nesta convocatoria o persoal funcionario de carreira e en prácticas do corpo de mestres que se atope en situación de servizo activo na Comunidade Autónoma de Galicia no curso académico 2017/18 e que posúa a especialidade e, de ser o caso, o requisito específico que se requira para cada praza, así como o título de perfeccionamento en lingua galega ou do certificado de lingua galega (Celga 4) ou certificación ou validación equivalente.

Artigo 3. Lugar e prazo de presentación

O prazo de presentación de solicitudes será de diez días hábiles contados a partir do día seguinte ao da publicación desta orde no Diario Oficial de Galicia.

As solicitudes cubriranse empregando o modelo que figura como anexo I e poderán presentarse no Rexistro Xeral da Xunta de Galicia ou por calquera os medios que establece o artigo 16.4 da Lei 39/2015, do 1 de outubro, do procedemento administrativo común das administracións públicas. No suposto de optar pola presentación da solicitude e demais documentación ante unha oficina de Correos, farase en sobre aberto.

Logo de rematado o prazo de presentación de solicitudes, non se admitirá ningunha modificación nas peticións formuladas.

Artigo 4. Solicitudes e documentación

O persoal concursante presentará unha única solicitude en que poderá consignar ata un máximo de dez prazas e achegará debidamente compulsada a documentación xustificativa dos requisitos exixidos para a praza/s solicitada/s e a documentación xustificativa dos méritos que alegue segundo o baremo que figura como anexo II.

Non terán que presentarse aqueles documentos xustificativos dos méritos alegados que xa figuren no seu expediente persoal na aplicación informática www.edu.xunta.es/datospersoais

No caso de que o persoal participante posúa méritos que non consten no seu expediente ou que sexan incorrectos, deberá xerar unha nova instancia na aplicación www.edu.xunta.es/datospersoais que deberá presentar xunto coa solicitude de participación e unha copia compulsada dos méritos alegados.

Artigo 5. Comisión de selección

1. A selección do persoal aspirante será realizada por unha comisión, nomeada pola persoa titular da Dirección Xeral de Centros e Recursos Humanos, integrada polos seguintes membros:

Presidencia: a persoa titular da Subdirección Xeral de Recursos Humanos ou persoa en quen delegue.

Vogais: ata un máximo de tres vogais, elixidos/as entre persoal funcionario de carreira que ocupe postos de xefatura de servizo ou xefatura de sección da Consellería de Cultura, Educación e Ordenación Universitaria ou membros da inspección educativa, e un/unha vogal membro dos equipos de orientación específicos.

Unha persoa funcionaria da Consellería de Cultura, Educación e Ordenación Universitaria, que actuará como secretario ou secretaria con voz e sen voto.

Ademais poderá asistir á comisión unha persoa representante de cada organización sindical con presenza na mesa sectorial docente non universitaria, con voz e sen voto.

2. Para a valoración dos puntos 1, 2, 3, 4.3 e 4.4 do baremo establecido no anexo II a comisión de selección poderá delegar esta función nunha subcomisión formada por persoal funcionario da Consellería de Cultura, Educación e Ordenación Universitaria.

3. Os membros da comisión e, de ser o caso, da subcomisión, estarán suxeitos ás causas de abstención e recusación establecidas nos artigos 23 e 24 da Lei 40/2015, do 1 de outubro, de réxime xurídico do sector público, e terán dereito a percibir asistencias e axudas de custo por concorreren ás sesións, conforme o Decreto 144/2001, do 7 de xuño (DOG do 25), modificado polo Decreto 144/2008, de 26 de xuño (DOG do 18 de xullo), e polo Decreto 96/2011, do 5 de maio (DOG do 30 de maio) estando cualificadas na categoría primeira.

Artigo 6. Resolución provisional e reclamacións

Logo de realizada a valoración dos méritos, publicarase na páxina web www.edu.xunta.gal a resolución provisional do concurso de méritos específico xunto coa adxudicación das prazas, o baremo, a relación de persoas excluídas e a causa da súa exclusión.

As persoas interesadas poderán formular renuncia e as reclamacións que consideren, no prazo de cinco días hábiles contados desde o seguinte ao da súa publicación na páxina web. As reclamacións entendéranse resoltas mediante a publicación da resolución definitiva.

A renuncia á participación no concurso de méritos específico implica a renuncia a todas as peticións formuladas.

Artigo 7. Resolución definitiva e recursos

Será seleccionado o persoal participante que acade a maior puntuación para a praza que solicita segundo o baremo establecido no anexo II.

No caso de producirse empates no total das puntuacións outorgadas, estes resolveranse atendendo sucesivamente e por esta orde á maior puntuación acadada nos puntos 4.1, 4.2, 2.1, 2.2, 1, 3.1, 3.2, 3.3, 3.4, 3.5, 3.6, 4.3 e 4.4.

A resolución definitiva ditarase pola persoa titular da Dirección Xeral de Centros e Recursos Humanos, logo da proposta da comisión de selección, e publicarase no Diario Oficial de Galicia.

Contra a resolución definitiva do concurso de méritos específico, que pon fin á vía administrativa, as persoas interesadas poderán formular con carácter potestativo un recurso de reposición ante a persoa titular da Dirección Xeral de Centros e Recursos Humanos da Consellería de Cultura, Educación e Ordenación Universitaria, no prazo dun mes contado desde o día seguinte ao da súa publicación no Diario Oficial de Galicia, de conformidade co establecido na Lei 39/2015, do 1 de outubro, do procedemento administrativo común das administracións públicas, ou ben directamente o recurso contencioso-administrativo no prazo de dous meses perante o xulgado do contencioso-administrativo que resulte competente, segundo o establecido na Lei 29/1998, do 13 de xullo, reguladora da xurisdicción contencioso-administrativa.

Artigo 8. Toma de posesión

As persoas seleccionadas deberán incorporarse ás prazas obtidas con data do 1 de setembro do ano 2018, e cesarán no seu destino de procedencia o 31 de agosto do mesmo ano.

As prazas adxudicaranse en réxime de comisión de servizos e con reserva do posto de traballo de orixe, por un período dun ano prorrogable ata que o alumno remate a etapa educativa que cursa e como máximo por un período que, incluída a comisión de servizos inicial e as eventuais prórrogas, non poderá superar os 6 anos de duración, de acordo co disposto no punto 2 do artigo 3 do Decreto 244/1999, do 29 de xullo. A prórroga exixirá petición da persoa interesada e o informe favorable do equipo de orientación específico.

Disposición derradeira primeira. Autorización

Autorízase a Dirección Xeral de Centros e Recursos Humanos para ditar as disposicións que sexan necesarias para a aplicación e o desenvolvemento desta orde.

Disposición derradeira segunda. Entrada en vigor

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 4 de abril de 2018

Román Rodríguez González
Conselleiro de Cultura, Educación e Ordenación Universitaria

ANEXO II

Méritos	Total puntos máximo
1. Antigüidade. Por cada ano de servizos efectivos prestados en situación de servizo activo como persoal funcionario docente no corpo de mestres: 0,50 puntos por ano.	6 puntos
2. Servizos. Servizos prestados na especialidade de Pedagoxía Terapéutica ou na de Audición e Linguaxe: 2.1. Por cada ano de servizos efectivos prestados en situación de servizo activo como persoal funcionario docente na especialidade de Pedagoxía Terapéutica cando a praza que se solicite sexa desta especialidade: 0,50 puntos por ano. 2.2. Por cada ano de servizos efectivos prestados en situación de servizo activo como persoal funcionario docente na especialidade de Audición e Linguaxe cando a praza que se solicite sexa desta especialidade: 0,50 puntos por ano.	6 puntos
3. Méritos académicos. 3.1. Polo título de doutor: 2 puntos. 3.2. Polo título universitario oficial de máster distinto do requirido para o ingreso á función pública docente, para cuxa obtención se exixisen, polo menos 60 créditos: 1,50 puntos. 3.3. Polo recoñecemento de suficiencia investigadora ou o certificado-diploma de estudos avanzados: 1 punto (este mérito non se valorará cando sexa alegado o título de doutor). 3.4. Polo título de grao: 0,50 puntos. 3.5. Por cada titulación de segundo ciclo: 0,50 puntos. 3.6. Pola segunda e restantes titulacións de primeiro ciclo: 0,250 puntos.	6 puntos
4. Actividades de formación. 4.1. Por actividades superadas de formación específica directamente relacionadas coas necesidades educativas especiais (0,2 puntos por cada 10 horas): ata 4 puntos. 4.2. Por actividades impartidas de formación específica directamente relacionadas coas necesidades educativas especiais (0,2 puntos por cada 3 horas): ata 2 puntos. 4.3. Por actividades superadas e non baremadas no subpunto 4.1 que teñan por obxecto o perfeccionamento sobre aspectos científicos e didácticos das especialidades do corpo de mestres ou relacionadas coa organización escolar ou coas tecnoloxías aplicadas á educación, organizadas polas administracións educativas que se atopen en pleno exercicio das súas competencias en materia educativa, por institucións sen ánimo de lucro que fosen homologadas polas administración precitadas, así como as organizadas polas universidades (0,10 puntos por cada 10 horas de actividades de formación acreditadas): ata 2 puntos. 4.4. Pola impartición das actividades de formación indicadas no subpunto 4.2 e non baremadas no subpunto 4.1 (0,10 puntos por cada 3 horas de formación acreditadas): ata 1 punto.	9 puntos

Disposición complementaria primeira

Todos os requisitos de participación, así como os méritos alegados deben reunirse na data de finalización do prazo de presentación de solicitudes.

Disposición complementaria segunda

No que atinxe á antigüidade e ao cómputo dos servizos docentes non se computarán as fraccións inferiores a un ano.

Disposición complementaria terceira

1. No que respecta ás actividades do punto 4 do anexo II:

As actividades de formación do profesorado a partir do 23 de maio de 2013 deberán cumprir co establecido na Orde do 14 de maio de 2013 pola que se regula a convocatoria, o recoñecemento, a certificación e o rexistro das actividades de formación permanente do profesorado en Galicia (DOG nº 96, do 22 de maio).

Con anterioridade ao 23 de maio de 2013 soamente se baremarán as seguintes actividades organizadas polas entidades indicadas nos puntos 4.3 e 4.4 do anexo II: cursos, seminarios permanentes, grupos de traballo, proxectos de formación, congresos e xornadas.

2. Para os efectos da baremación do punto 4.1 e 4.3 do anexo II sumaranse as horas de todas as actividades, non puntuándose o resto do número de horas inferiores a 10. Cando as actividades veñan expresadas en créditos, entenderase que cada crédito equivale a 10 horas. Para os efectos da baremación do punto 4.2 e 4.4 do anexo II sumaranse as horas de todas as actividades e non se puntuarán o resto de número de horas inferior a 3.

Disposición complementaria cuarta

Para optar a prazas que requiran o coñecemento da linguaxe de signos as persoas solicitantes deberán posuír o título de intérprete de lingua de signos expedido pola Confederación Nacional de Xordos de España ou por algunha federación autonómica confederada, ou ben o título de técnico superior de interpretación de lingua de signos (ciclo formativo de grao superior).

Para optar a prazas que requiran o coñecemento de Braille as persoas solicitantes deberán acreditar a realización de cursos de Braille organizados pola Organización Nacional de Cegos de España (ONCE) ou por outros organismos oficiais.

Disposición complementaria quinta

1. Non se baremará o título alegado para o ingreso no corpo.

2. No que respecta á baremación de titulacións de primeiro ciclo, non se entenderá como tal a superación dalgún dos cursos de adaptación.

3. Cando os títulos fosen obtidos no estranxeiro ou fosen expedidos por institucións docentes doutros países, deberá achegarse, ademais, a correspondente homologación.

4. Non se baremarán como méritos académicos os títulos universitarios non oficiais que conforme a disposición adicional décimo primeira do Real decreto 1397/2007, do 29 de outubro, polo que se establece a ordenación das ensinanzas universitarias oficiais, sexan expedidos polas universidades no uso da súa autonomía.

ANEXO III

Código posto	Centro	Prazas	Localidade	Provincia
1501	15005336-CEE Nosa Señora do Rosario (4)	2 AL Requisito: coñecemento de linguaxe de signos	A Coruña	A Coruña
1502	15004964-CEIP Plurilingüe Concepción Arenal (1)	1 PT	A Coruña	A Coruña
1503	15021721-CEIP Zalaeta (2)	1 PT	A Coruña	A Coruña
1504	15026637-CEIP de Barouta (6)	1 PT	Ames	A Coruña
1505	15021779-CEIP da Castellana (2) (8)	1 PT	Aranga	A Coruña
1506	15005877-Ceip de Teixeiro (2)	1PT con afín AL	Curtis	A Coruña
1507	15026960-CEIP de Ponzos (2)	1 AL	Ferrol	A Coruña
1508	15021846-CEIP Plurilingüe San Xoan de Filgueira (2)	1 PT	Ferrol	A Coruña
1509	15021834-CEIP Manuel Masdías (1)	1 PT	Ferrol	A Coruña
1510	15009071-CPI Castro Baxoi (1) (2)	1 PT	Miño	A Coruña
1511	15010575-CEIP O Coto (1) (2)	1 PT	Negreira	A Coruña
1512	15010848-CEIP Felipe de Castro (9)	1 AL	Noia	A Coruña
1513	15027939- IES Plurilingüe Maruxa Mallo (3) (6)	1 PT Requisito: coñecemento, configuración e funcionamento do intercomunicador NuVoice	Ordes	A Coruña
1514	15013643-CEIP Plurilingüe A Magdalena (2)	1 PT Requisito: coñecemento de Braille	As Pontes de García Rodríguez	A Coruña
1515	15025694-IES Moncho Valcarce (5)	1 PT Requisito: coñecemento de Braille	As Pontes de García Rodríguez	A Coruña
1516	15015861-IES Eduardo Pondal (3)	1 PT Requisito: coñecemento de Braille	Santiago de Compostela	A Coruña
1517	15017107-CEIP A Ramallosa (1) (2)	1 PT	Teo	A Coruña
1518	15017041-CEIP A Igrexa-Calo (1) (2)	1 PT	Teo	A Coruña
1519	15027708-CEIP Plurilingüie Ría do Burgo (2) (6)	1PT	Culleredo	A Coruña
2701	27013934-IES Perdouro (2)	1 PT con afín AL	Burela	Lugo
2702	27003126-CEIP Xoán de Requeixo (3)	1 PT con afín AL	Chantada	Lugo
2703	27014008-CPI Tino Grandío (2) (4)	1 AL Requisito: coñecemento de linguaxe de signos	Guntín	Lugo
2704	27006334-CEIP As Mercedes (2)	1 PT	Lugo	Lugo
2705	27014665-CEIP Luís Pimentel (2)	1 AL Requisito: formación en sistemas aumentativos de la comunicación tipo PECS	Lugo	Lugo
2706	27006395-CEIP Quiroga Ballesteros (2) (4)	1 AL Requisito: coñecemento de linguaxe de signos	Lugo	Lugo
2707	27016662-CEIP Plurilingüe Monforte de Lemos (4) (5)	1 PT	Monforte de Lemos	Lugo
2708	27013314-IES Basanta Silva (2)	1 PT	Vilallba	Lugo
2709	27016674-CEP Lois Tobío (1)	1 PT	Viveiro	Lugo
2710	27013636-IES María Sarmiento (4)	1 AL Requisito: coñecemento de linguaxe de signos	Viveiro	Lugo
2711	27014860-CEIP Plurilingüe A Gándara (3) (6)	1 PT	Monforte de Lemos	Lugo
3201	32020781-CEIP Plurilingüe o Ruxidoiro (2) (6)	1 PT con afín AL	Barbadás	Ourense
3202	32001671-CEIP Plurilingüe Otero Pedrayo (4)	1 AL	O Barco de Valdeorras	Ourense
3203	32004398-CEIP Vicente Risco (2)	1 AL afín PT	Cualedro	Ourense
3204	32008835-CEIP Curros Enríquez (2) (10)	1 AL	Ourense	Ourense
3205	32015177-CPI de Padrenda-Crespos (2)	1 PT con afín AL	Padrenda	Ourense
3206	32011755-CEIP Manuel Respino (6)	1 AL	A Rúa	Ourense
3207	32012711-CEIP Saco e Arce (6)	1 PT con afín AL	Toén	Ourense
3208	32004829-CEIP Rosalía de Castro (2) (6)	1 AL	Xinzo de Limia	Ourense
3601	36001148-CPI A Cañiza (7)	1 PT	A Cañiza	Pontevedra
3602	36001148-CPI A Cañiza (7)	1 AL	A Cañiza	Pontevedra
3603	36005555-CEIP Marquesa Pazo da Merce (2)	1 PT	As Neves	Pontevedra
3604	36007709-CEIP Santo Paio de Abaixo (8)	1 PT	Redondela	Pontevedra
3605	36014817-CEIP Plurilingüe da Igrexa-Chapela (8)	1 PT	Redondela	Pontevedra
3606	36009846-CEIP Plurilingüe nº 1 (2)	1 AL	Tui	Pontevedra
3607	36010125-CEIP Fonte Escura (2) (3)	4 PT	Vigo	Pontevedra
3608	36010125-CEIP Fonte Escura (2) (3)	1 AL	Vigo	Pontevedra
3609	36017201-CEE Príncipe Felipe	1 EF	Vigo	Pontevedra
3610	36017201-CEE Príncipe Felipe	1 EM	Vigo	Pontevedra
3611	36017201-CEE Príncipe Felipe	1 AL	Vigo	Pontevedra
3612	36017201-CEE Príncipe Felipe	1 PT	Vigo	Pontevedra

(1) Trastornos graves da conduta

(2) Trastorno do espectro do autismo

(3) Discapacidade motora

(4) Discapacidade sensorial (hipoacusia)

(5) Discapacidade sensorial

(6) Discapacidade intelectual

(7) Altas capacidades

(8) Pluridiscapacidade

(9) Discapacidade física asociada a dificultades graves de linguaxe

(10) Trastornos da comunicación