A Xunta de Goberno Local, en sesión ordinaria do día 12 de marzo de 2018, adoptou, entre outros, o seguinte acordo:

Primeiro. Aprobar inicialmente a modificación do Plan parcial do polígono industrial da Uceira MP-1/2017-A Uceira (nova definición de usos na zona comercial) promovida polo Concello e redactada polo arquitecto municipal, nos termos que constan no expediente.

Segundo. De conformidade co disposto no artigo 75 da Lei 2/2016, do 10 de febreiro, do solo de Galicia, someter o expediente a información pública polo prazo de dous (2) meses, mediante anuncio no Diario Oficial de Galicia e nun dos xornais de maior difusión na provincia.

Durante o dito período quedará o expediente de manifesto no Departamento de Urbanismo, en horario de atención ao público, de luns a venres, das 9.00 ás 14.00 horas. No dito prazo os interesados poderán formular as alegacións que teñan por conveniente para a defensa dos seus dereitos e intereses.

Terceiro. Suspender o outorgamento de aprobacións, autorizacións e licenzas urbanísticas nas áreas en que as novas determinacións para elas previstas supoñan modificación do réxime urbanístico vixente.

Cuarto. Comunicar persoalmente a apertura e duración do trámite de información pública aos propietarios de terreos comprendidos no ámbito da modificación puntual do plan parcial. O chamamento realizarase a cantos figuren como propietarios no Catastro en exixencia do artigo 75.1.a) da Lei 2/2016, do 10 de febreiro, do solo de Galicia.

Quinto. Requirir os informes, ditames ou outro tipo de pronunciamento dos órganos e entidades administrativas xestoras de intereses públicos afectados, previsto legalmente como preceptivos, que deberán ser emitidos nesta fase de tramitación da modificación do Plan parcial e nos prazos que estableza a lexislación sectorial correspondente.

O Carballiño, 11 de abril de 2018

Francisco José Fumega Piñeiro
Alcalde