O artigo 28.2 da Constitución española recoñece como dereito fundamental da persoa o dereito á folga.
O exercicio deste dereito na Administración e nas empresas, entidades e institucións públicas ou privadas que presten servizos públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ao mantemento dos servizos esenciais fixados no artigo 2 do Decreto 155/1988, do 9 de xuño (DOG núm. 116, do 20 de xuño), entre os que se encontra a sanidade.
O exercicio público da prestación da asistencia sanitaria non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación con este.
O artigo 3 do citado decreto faculta os conselleiros ou conselleiras competentes por razón dos servizos esenciais afectados para que, mediante orde e ante cada situación de folga, decidan o mínimo de actividade necesaria para asegurar o mantemento de tales servizos, así como para determinar o persoal necesario para a súa prestación.
Os representantes do persoal da empresa Ferrovial Servicios, S.A.U., que presta servizos de limpeza no Complexo Hospitalario Universitario de Ourense, comunicaron a convocatoria dunha folga que se desenvolverá, con carácter indefinido, desde as 00.00 horas do día 5 de febreiro de 2018.
Unha vez outorgada audiencia ao comité de folga,
DISPOÑO:
Artigo 1
A folga referida entenderase condicionada ao mantemento dos servizos mínimos, segundo os criterios que se establecen nesta orde.
A folga convocada afecta a todos os/as traballadores/as da empresa Ferrovial Servicios, S.A.U., que prestan servizos de limpeza no Complexo Hospitalario Universitario de Ourense e ten carácter indefinido. En consecuencia, tivéronse en conta para a determinación dos servizos esenciais os seguintes factores para a cobertura da seguridade en relación coa hixiene do medio ambiente sanitario: o risco para os/as pacientes, usuarios/as e traballadores/as derivado da realización de actividades e uso de materiais que sexan potencialmente contaminantes, a imposibilidade de demorar a prestación da asistencia e o volume de pacientes atendidos.
De acordo coa motivación anterior, os servizos mínimos que se fixan resultan totalmente imprescindibles para manter a axeitada cobertura do servizo esencial de asistencia sanitaria, para os efectos de evitar que se produzan graves prexuízos á cidadanía. E ao propio tempo responden á necesidade de compatibilizar o respecto ineludible do exercicio do dereito á folga coa atención á poboación, que baixo ningún concepto pode quedar desasistida, dadas as características do servizo dispensado.
Estas circunstancias, unidas á necesidade de garantir a presenza dun mínimo de persoal que poida atender de forma permanente a actividade imprescindible nese ámbito, conducen á adopción dos seguintes criterios reitores na determinación dos efectivos necesarios para o mantemento dos servizos esenciais:
– Días laborables:
I. Urxencias, laboratorio de urxencias, radiodiagnóstico de urxencias, UCI, área cirúrxica, reanimación poscirúrxica, reanimación cardíaca, oncoloxía radioterápica, hematoloxía, hospital de día e diálise: o persoal preciso para garantir o 100 % das presenzas e prestación de limpeza habituais.
II. Radioloxía intervencionista, esterilización e hospitalización: o persoal preciso para garantir o 70 % das presenzas e prestación de limpeza habituais.
III. Restantes áreas: o persoal preciso para garantir o 50 % das presenzas e prestación de limpeza habituais.
– Domingos e días festivos: o persoal preciso para garantir o 100 % das presenzas e prestación de limpeza habituais nos domingos e festivos.
Artigo 2
A determinación do persoal necesario con base no criterio anterior faraa a empresa coordinadamente coa Xerencia de Xestión Integrada de Ourense, Verín e O Barco de Valdeorras, debendo estar a súa fixación adecuadamente motivada.
A xustificación debe contar no expediente de determinación de mínimos e exteriorizarse axeitadamente para o xeral coñecemento do persoal destinatario. Deberá quedar constancia no expediente dos factores ou criterios cuxa ponderación conduce a determinar as presenzas mínimas.
O persoal necesario para a cobertura dos servizos mínimos deberá ser publicado nos taboleiros de anuncios con antelación ao comezo da folga.
A designación nominal dos efectivos que deben cubrir os servizos mínimos, que deberá recaer no persoal de xeito rotatorio, será determinada pola empresa e notificada ao persoal designado.
O persoal designado como servizo mínimo que desexe exercer o seu dereito de folga poderá instar a substitución da súa designación por outro/a traballador/a que voluntariamente acepte o cambio de xeito expreso.
No anexo desta orde recóllese o número de presenzas mínimas acordado para cubrir as xornadas de folga.
Artigo 3
Os paros e alteracións no traballo por parte do persoal necesario para o mantemento dos servizos mínimos serán considerados ilegais para os efectos do establecido no artigo 16 do Real decreto lei 17/1977, do 4 de marzo (BOE núm. 58, do 9 de marzo).
Artigo 4
O disposto nos artigos anteriores non significará ningún tipo de limitación dos dereitos que a normativa reguladora da folga recoñece ao persoal nesta situación, nin tampouco sobre a tramitación e efectos das peticións que a motiven.
Artigo 5
Sen prexuízo do que establecen os artigos anteriores, deberanse observar as normas legais e regulamentarias vixentes en materia de garantías dos/das usuarios/as dos establecementos sanitarios. Os altercados ou incidentes que se produzan serán obxecto de sanción con base nas normas vixentes.
Disposición derradeira
Esta orde producirá efectos e entrará en vigor o mesmo día da súa publicación no Diario Oficial de Galicia.
Santiago de Compostela, 31 de xaneiro de 2018
Jesús Vázquez Almuíña
Conselleiro de Sanidade
ANEXO
Centro |
Risco |
% |
Luns a venres |
Sábados 100 % |
Domingos/festivos 100 % |
||||||
Mañá |
Tarde |
Noite |
Mañá |
Tarde |
Noite |
Mañá |
Tarde |
Noite |
|||
Cristal |
Alto risco (área I) |
100 |
19 |
12,25 |
3 |
12 |
6,25 |
2 |
7,75 |
5,25 |
2 |
Medio risco (área II) |
70 |
16,275 |
9,625 |
14 |
9,5 |
10 |
6,5 |
||||
Baixo risco (área III) |
50 |
2,5 |
0,75 |
2 |
0,75 |
1,25 |
0,75 |
||||
H2050 (edificio de hospitalización) |
Alto risco (área I) |
100 |
1 |
0,75 |
0,5 |
0,5 |
0,5 |
0,5 |
|||
Medio risco (área II) |
70 |
10,675 |
5,6 |
8,25 |
6 |
6,5 |
6 |
||||
Baixo risco (área III) |
50 |
0,75 |
0,375 |
0,25 |
0 |
0 |
0 |
||||
Santa María Nai |
Alto risco (área I) |
100 |
0 |
2,25 |
0 |
0 |
0 |
0 |
|||
Medio risco (área II) |
70 |
1,05 |
3,5 |
0,75 |
5 |
0,75 |
1 |
||||
Baixo risco (área III) |
50 |
0,75 |
0,375 |
1,25 |
0 |
1,25 |
0 |
||||
Piñor |
Alto risco (área I) |
100 |
0 |
0 |
0 |
0 |
0 |
0 |
|||
Medio risco (área II) |
70 |
2,8 |
1,4 |
3 |
1 |
3 |
1 |
||||
Baixo risco (área III) |
50 |
0,5 |
0 |
0 |
0 |
0 |
0 |
A unidade (1) equivale á presenza dun efectivo.