De acordo co Convenio de colaboración subscrito con data do 10 de xaneiro de 2018 entre a Escola Galega de Administración Pública (en diante, EGAP) e o Parlamento de Galicia para o desenvolvemento de actividades de formación, divulgación e investigación,
RESOLVO:
Convocar un curso sobre a aplicación informática de xestión parlamentaria Ágora, que figura no anexo II e que se deberá desenvolver segundo as bases detalladas no anexo I.
Santiago de Compostela, 11 de xaneiro de 2018
Sonia Rodríguez-Campos González
Directora da Escola Galega de Administración Pública
ANEXO I
Primeira. Requisitos das persoas participantes
Empregados/as públicos/as do Parlamento de Galicia (aberto a bolseiros/as e traballadores/as do Servizo de Tecnoloxías da Información (STI).
Segunda. Desenvolvemento das actividades de formación
A actividade formativa realizarase cos requirimentos, a duración e as condicións que se indiquen na convocatoria. A información relativa ao desenvolvemento da actividade, así como as súas posibles modificacións, será actualizada e ampliada na páxina web http://egap.xunta.gal.
Terceira. Solicitudes e prazos
1. O prazo de presentación de solicitudes será de dez días naturais contados a partir do seguinte ao da publicación desta resolución no Diario Oficial de Galicia.
2. As solicitudes de participación na actividade formativa só poderán realizarse mediante o formulario de matrícula telemática dispoñible no enderezo http://egap.xunta.gal/matricula desde as 8.00 horas da data de inicio do prazo de presentación de solicitudes ata as 14.00 horas da data de finalización. As solicitudes entenderanse presentadas unha vez que se complete correctamente o proceso de matriculación.
3. Serán excluídas automaticamente aquelas solicitudes que non se axusten ao formulario de solicitude, non teñan cubertos correctamente os datos precisos para a realización do proceso de selección ou sexan presentadas fóra de prazo.
4. As persoas que oculten ou falseen datos esenciais para a selección serán automaticamente excluídas das actividades solicitadas e pasarán ao final das listas de todas as actividades formativas que soliciten e cuxo prazo de matrícula comece dentro do ano seguinte contado desde que se detecte o feito.
5. As persoas interesadas en recibir mensaxes sobre o proceso de selección deberán facilitar un enderezo de correo electrónico e/ou un número de teléfono móbil.
6. As persoas que necesiten acreditar circunstancias específicas (discapacidade, permiso de maternidade, etc.) de acordo cos criterios de selección deberán remitirlle á EGAP a correspondente documentación complementaria, xunto cunha copia do formulario da matrícula ao enderezo de correo electrónico xestion.egap@xunta.gal, sen prexuízo do previsto no artigo 16.4 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro). A dita documentación deberá enviarse por unha única das vías indicadas; no caso contrario só serán considerados os datos achegados por correo electrónico. A documentación deberá presentarse dentro do prazo sinalado no punto 1 desta base.
7. A EGAP adoptará as medidas necesarias para facilitar a presentación das solicitudes. As dúbidas, as dificultades técnicas e as peticións de información complementaria serán atendidas a través dos números de teléfono 981 54 62 57, 981 54 62 54 e 981 54 63 35 e do enderezo de correo electrónico xestion.egap@xunta.gal.
Cuarta. Criterios de selección
Criterios xerais da EGAP, segundo a Resolución do 4 de xaneiro de 2008 (DOG do 10 de xaneiro de 2008).
Quinta. Publicación das relacións do alumnado seleccionado
A EGAP publicará no enderezo http://egap.xunta.gal unha relación das persoas seleccionadas para participar no dito curso, así como un número adecuado de reservas de acordo co disposto no artigo 45.1.b) da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).
O prazo de presentación de alegacións será de cinco días naturais desde a súa publicación.
Entenderase que as persoas que non figuren na relación foron excluídas por algunha das razóns expresadas nas bases da convocatoria ou ocupan un posto máis afastado na listaxe de agarda.
Sexta. Cambios ou substitucións na selección, renuncia e asistencia
1. Os cambios ou as substitucións na selección:
En ningún caso serán admitidos cambios ou substitucións entre as persoas seleccionadas.
2. A renuncia:
a) As persoas seleccionadas só poderán renunciar á actividade formativa:
– Por causa de forza maior suficientemente acreditada.
– Por necesidades do servizo debidamente motivadas por parte das persoas responsables dos centros directivos.
– Por outras causas xustificadas documentalmente.
b) A renuncia debe ser comunicada por escrito á Escola Galega de Administración Pública cunha antelación mínima de tres días hábiles anteriores ao inicio da actividade formativa. Na páxina web da escola está dispoñible un modelo de renuncia.
Para isto poderase utilizar, ademais do previsto no artigo 16.4 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro) o enderezo de correo electrónico xestion.egap@xunta.gal.
c) As persoas que incumpran o previsto nas liñas a) e b) pasarán ao final das listaxes de espera de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.
3. A asistencia e a puntualidade:
a) Son obrigatorias a asistencia ás sesións da actividade formativa e mais a puntualidade.
b) Durante a actividade formativa terá lugar un control permanente de asistencia e puntualidade, incluídos controis extraordinarios.
c) As faltas de asistencia nas actividades presenciais:
1. Non poden superar en ningún caso o 10 % das horas lectivas presenciais. En todo caso, as faltas de asistencia deberán xustificarse documentalmente ante as persoas responsables da actividade formativa nun prazo máximo de 10 días contados a partir do día da finalización desta actividade. As persoas que incumpran o antedito perderán o dereito ao certificado de aproveitamento na actividade formativa.
2. Aquelas persoas cuxas faltas de asistencia superen o 50 % das horas lectivas presenciais pasarán ao final das listaxes de agarda de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.
Sétima. Realización de probas
Para poder superar a actividade de formación, o alumnado deberá superar unha proba de avaliación, que se realizará o día 16 de febreiro, ás 11.00 horas, na sede do Parlamento de Galicia en Santiago de Compostela.
Oitava. Certificados
Para obter o certificado de aproveitamento o alumnado deberá obter a avaliación positiva do seu profesorado, o cal emitirá un informe en que declare apto ou non apto cada alumno/a en función do resultado da proba de avaliación.
Novena. Facultades da EGAP
1. A EGAP e o Parlamento de Galicia poderán modificar o desenvolvemento, as datas e os lugares da actividade formativa, así como resolver todas as continxencias que poidan xurdir.
2. No suposto de que o número de admitidos/as sexa inferior ao 50 % das prazas convocadas, a EGAP e o Parlamento de Galicia reservan para si o dereito a suspender, cancelar a actividade, caso en que empregará os medios de notificación ás persoas interesadas previstos na normativa vixente.
3. A EGAP e o Parlamento de Galicia garantirán na actividade derivada desta convocatoria a promoción da igualdade real e efectiva entre mulleres e homes, a eliminación de calquera tipo de discriminación e o fomento dos dereitos de conciliación.
ANEXO II
Código: CV18001.
Área de coñecemento: tecnoloxías da información e da comunicación (TIC).
Nome do curso: Aplicación informática de xestión parlamentaria Ágora.
1. Obxectivos.
Este curso ten por obxecto a presentación da aplicación de xestión parlamentaria Ágora Millennium e a iniciación no seu emprego.
Describirase a aplicación en conxunto e cada un dos módulos que a compoñen cos correspondentes menús e submenús, dedicando tempo para a exposición das funcionalidades e para a execución de supostos prácticos.
2. Destinatarios/as.
Persoal do Parlamento de Galicia (aberto a bolseiros/as e traballadores/as do STI).
3. Desenvolvemento.
Modalidade: presencial.
Duración: 20 horas.
Edicións: unha
Datas: do 5 ao 16 de febreiro de 2018.
Lugar: na sede do Parlamento de Galicia en Santiago de Compostela, rúa Hórreo, número 63.
Horario: 8.30 a 10.30 horas.
Proba final presencial: o día 16 de febreiro ás 11.00 horas.
Prazas: 20.
4. Contido.
1. Introdución. Descrición da aplicación. Módulos que a compoñen (1 h) e interacción con outras aplicacións.
2. Módulo de rexistro (5 h).
– Rexistro de entrada. Anotación (documentos en papel; documentos electrónicos); complementación; apertura e asociación de expedientes; complementación masiva; emisión de oficios. Supostos prácticos (3 h).
– Rexistro de saída. Anotación (manual; oficios; convocatorias); complementación; asociación de expedientes. Supostos prácticos (2 h).
3. Módulo de actividade parlamentaria (5 h).
– Sesións. Asuntos pendentes. Preparación de sesións (Mesa; comisións; Pleno; relatorios): preparación da orde do día; comisión que ditamina; convocatorias; documentación. Supostos prácticos (3 h).
– Sesións. Execución de sesións. Ingreso de acordos (individual; masivo). Modificación de acordos; apertura de expedientes. Asistencias. Carga de actas. Documentación (oficios; actas). Outras opcións. Supostos prácticos (2 h).
4. Módulo de publicacións (1 h).
– Boletíns. Ingreso BOPG. Ingreso DOG. Ingreso BOE. Descritores. Índices. Memorias. Supostos prácticos.
5. Módulo de composición de órganos (2 h).
– Ingreso persoas: información persoal; información lexislatura. Altas, baixas, modificacións. Supostos prácticos. (30’)
– Ingreso órganos: información órganos. Información lexislatura. Composición. Altas, baixas, suplencias e substitucións.
Constitución. Listaxes. Supostos prácticos (1 h 30’).
6. Módulo de control da tramitación (2 h).
– Mantemento de táboas: persoas, órganos, enderezos, expedientes, sesións e documentos. Supostos prácticos.
– Expedientes: creación, trámites; tipoloxía; modificación. Supostos prácticos.
7. Módulo de consultas (3 h).
– Consultas de rexistro. Supostos prácticos.
– Consultas de expedientes. Supostos prácticos.
—Consultas de sesións. Supostos prácticos.
8. Módulo de estatísticas (1 h).
