Ponse en coñecemento de todos os interesados na concentración parcelaria da zona de Quins (Melón-Ourense), declarada de utilidade pública e urxente execución polo Decreto nº 306/1999, do 11 de novembro (DOG nº 233, do 2 de decembro), o seguinte:
Primeiro. Con data do 11 de novembro de 2017, o director xeral de Desenvolvemento Rural aprobou o Acordo de concentración parcelaria da zona de Quins (Melón-Ourense).
Segundo. O acordo de concentración será notificado individualmente a cada un dos afectados e estará exposto ao público no Concello de Melón e na zona. Os documentos que se poden examinar no citado concello refírense aos predios de substitución onde constan as situacións xurídicas derivadas das parcelas de procedencia, as fichas de atribucións, os planos e outros.
Terceiro. De conformidade co disposto polo artigo 36 da Lei 4/2015, do 17 de xuño, de mellora da estrutura territorial agraria de Galicia, no prazo dun mes, contado de data a data e desde o día seguinte ao da notificación individual, poderá vostede interpoñer recurso de alzada, ante a conselleira do Medio Rural.
Serán exclusivamente motivo de recurso as reclamacións sobre o valor, clase de terra e situación dos predios que lle foron atribuídos con respecto aos achegados por vostede.
Non serán motivos de interposición de recurso de alzada as reclamacións sobre titularidade e clasificación das parcelas achegadas ou calquera outra cuestión relativa a materia propia das bases de concentración/reestruturación parcelaria.
De ter presentado algunha alegación ao proxecto de concentración parcelaria da zona e de ser esta estimada, quedará reflectida, segundo o caso, na ficha de atribucións e nos planos do Acordo que agora lle é notificado.
Os planos do Acordo están accesibles na internet, na páxina web da Consellería do Medio Rural, no enderezo:
http://mediorural.xunta.gal/areas/infraestruturas/concentracions_parcelarias/publicacions
Ourense, 22 de novembro de 2017
O xefe territorial de Ourense
P.A.(Resolución do 23.5.2014)
Iván Rodríguez Jiménez
Xefe do Servizo Xurídico-Administrativo