O Instituto Galego da Vivenda e Solo (IGVS) encomendoulle, o 15 de novembro de 2017, á sociedade Xestión do Solo de Galicia-Xestur, S.A. a realización dos traballos de difusión das áreas de rehabilitación integral (ARI) e de información e apoio técnico na tramitación dos programas de axudas xestionados polo IGVS no ámbito das ARI dos Camiños de Santiago, de acordo co disposto nos artigos 7, 8 e 13 da Lei 14/2013, do 26 de decembro, de racionalización do sector público autonómico.
A encomenda terá a natureza de encomenda de xestión intersubxectiva, en canto que a entidade sociedade Xestión do Solo de Galicia-Xestur, S.A. ten a consideración de medio propio e instrumental e de servizo técnico da Administración xeral da Comunidade Autónoma de Galicia, nos termos establecidos no artigo 9.2 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
Esta encomenda terá como prazo de duración ata o 31 de decembro de 2018 e poderase proceder á súa prórroga antes da súa finalización, por un período dun ano, en canto que o proxecto de real decreto, no cal se regula o vindeiro Plan estatal 2018-2021, prevé na súa disposición adicional terceira unha ampliación do prazo para a execución das actuacións do programa de rexeneración e renovación urbanas, no cal se inclúe as ARI dos Camiños de Santiago, ata o 31 de decembro de 2019. Así mesmo, cando por razóns de oportunidade debidamente acreditadas no expediente así o aconsellen, poderase proceder á finalización anticipada da encomenda.
Para xeral coñecemento, e en cumprimento do disposto no número 3 do artigo 9 da Lei 16/2010, do 17 de decembro, disponse a súa publicación.
Santiago de Compostela, 16 de novembro de 2017
Heriberto García Porto
Director xeral do Instituto Galego da Vivenda e Solo