En cumprimento do establecido nos artigos 47.1 da Lei 2/2016, do 10 de febreiro, do solo de Galicia, e 86.1 do Decreto 143/2016, do 22 de setembro, polo que se aproba o seu regulamento, faise público o acordo adoptado polo Concello Pleno, do 26.10.2017, cuxa parte dispositiva é a seguinte:

Primeiro. Proceder á formulación dun proxecto de modificación puntual do PXOM aprobado definitivamente de forma parcial pola Orde do 29.4.2011, da Consellería de Medio Ambiente, Territorio e Infraestruturas, en execución da Sentenza do Tribunal Superior de Xustiza de Galicia (TSXG) nº 100/2017, do 2.3.2017, ditada no recurso contencioso-administrativo nº 4263/2012, interposto pola Asociación Cultural do Parque Rosalía de Castro e o seu contorno, para establecer as determinacións urbanísticas do ámbito territorial do denominado URPI-58.

A parte do ditame desta sentenza, que agora se está a executar, literalmente declarou: «2. Anular en parte a dita Orde do 29 de abril de 2011 o dito PXOM no exclusivo aspecto relativo á ordenación urbanística da unidade de actuación CS-5 (hoxe URPI-58) que é contraria a dereito».

Segundo. Acordar, en virtude do establecido nos artigos 47.1 da LSG e 86.1 do RLSG, a suspensión cautelar de licenzas de parcelación e edificación no devandito ámbito territorial do denominado URPI-58, delimitado nas follas 7.36 e 7.40 do tomo V.2. «Ordenación e Xestión do Solo Urbano. Planos» do PXOM (páxina web do Concello de Lugo http://lugo.gal), para garantir o estudo do devandito proxecto de modificación puntual do PXOM, coa publicación deste acordo de suspensión no Diario Oficial de Galicia (DOG) e nun dos xornais de maior difusión da provincia.

A suspensión será efectiva a partir da súa publicación e terá a duración máxima dun ano, sen prexuízo da suspensión automática que poida resultar con anterioridade, no seu caso, do acordo de aprobación inicial da modificación puntual do PXOM.

Signifícase que a suspensión non impedirá a autorización daquelas intervencións necesarias para garantir o cumprimento dos deberes sinalados no artigo 135 da LSG (artigo 86.3.a) do RLSG), nin a autorización de usos e obras provisionais nos termos do artigo 89 da LSG e 204 do RLSG.

Contra este acordo de suspensión de licenzas poderá interpoñerse recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia (artigo 10 da Lei 29/1998, do 13 de xullo) nun prazo de dous (2) meses, contados a partir do día seguinte ao da publicación do presente acordo.

Terceiro. Notificar este acordo á CMAOT e ao TSXG para o seu coñecemento e oportunos efectos.

Lugo, 9 de novembro de 2017

A alcaldesa
P.D. (Decreto número 16008543)
Xosé Daniel Piñeiro Villares
Tenente de alcalde delegado da Área de Desenvolvemento Sostible e Persoal