En cumprimento dos artigos 9.3 e 8.4 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, procederase a dar publicidade á encomenda de xestión á Fundación Semana Verde de Galicia, ordenada pola Resolución da Consellería de Sanidade, do 26 de outubro de 2017, coas seguintes características:
1. A actividade obxecto da encomenda é realizar os traballos de apoio para a realización das probas selectivas correspondentes a diversas categorías de persoal licenciado sanitario e de xestión e servizos do Servizo Galego de Saúde, que tiveron lugar os días 28 e 29 de outubro de 2017, en xornada de mañá e tarde, de conformidade cos requirimentos técnicos que se detallan na correspondente resolución, relativos ás obrigas da entidade encomendante, ás directrices de execución e ao cronograma das actividades que se desenvolveron.
2. A Fundación Semana Verde de Galicia é unha fundación do sector público autonómico de acordo co artigo 113 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, na medida que o seu patrimonio fundacional, con carácter de permanencia, está formado en máis dun 50 % por bens e dereitos achegados ou cedidos pola Xunta de Galicia. De acordo co artigo 47 da citada Lei 16/2010, ten a consideración de medio propio e servizo técnico da Xunta de Galicia.
3. As probas selectivas a que se refiren as actividades encomendadas desenvolvéronse os días 28 e 29 de outubro de 2017.
Santiago de Compostela, 27 de outubro de 2017
Antonio Fernández-Campa García-Bernardo
Xerente do Servizo Galego de Saúde