Para os efectos previstos no artigo 54 da Lei 7/2013, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, en sesión que tivo lugar o día 14 de xullo de 2017, en relación co deslindamento parcial entre as comunidades de montes veciñais en man común de San Martiño de Currás e de Sobrada, no concello de Tomiño, respecto da estrema común dos seus montes.

Antecedentes de feito:

Primeiro. A Lei 7/2012, do 28 de xuño, de montes de Galicia (DOG número 140, do 23 de xullo), na súa disposición derradeira segunda, modifica o artigo 25 da Lei 13/1989, do 10 de outubro, de montes veciñais en man común, e elimina a obriga da Administración forestal de proceder ao deslindamento e sinalización dos montes veciñais. Por tanto, esta competencia corresponde ás comunidades propietarias consonte os artigos 53 e 54 da Lei de montes de Galicia.

Segundo. Con data do 12.12.2016, a CMVMC de San Martiño de Currás comunica ao Xurado Provincial de Montes Veciñais en Man Común de Pontevedra o acordo coa CMVMC de Sobrada na estrema entre ambas as comunidades. A documentación que consta no expediente consonte o artigo 53 da Lei 7/2012 é a seguinte: acto de conciliación no Xulgado de Paz de Tomiño, certificados de aprobación en asemblea xeral de ambas as comunidades e cartografía dixital.

Terceiro. Con data do 11.4.2017, o xefe da Sección de Topografía informa, entre outras cuestións, do seguinte: «Segundo os datos das dúas clasificacións que ten asignadas esta comunidade, fan un total de 38,80 ha. Na primeira clasificación, unha parcela de 28 ha e outra de 10 ha. Na segunda clasificación, una parcela de 0,80 ha. Esta solicitude ten unha cabida de 37,57 ha repartidas en dúas parcelas, unha de 36,57 ha y outra de 1,00 ha. O solicitante non achega o informe de validación catastral. Xúntase neste informe unha montaxe da solicitude sobre o catastro. Non existe coincidencia co catastro actual; están afectadas 27 parcelas catastrais. Presentan o informe de validación catastral; non existen afeccións sobre montes de utilidade pública nin patrimoniais e tampouco sobre a Rede Natura. Acompañan este informe as montaxes solicitadas».

Con data do 22.5.2017 o Servizo de Montes require a CMVMC de Currás para que achegue informe de validación gráfica alternativa da Dirección Xeral de Catastro. A comunidade achega a documentación solicitada o 5.6.2017.

Cuarto. A liña poligonal que determina o deslindamento de mutuo acordo entre os montes veciñais en man común de Currás e de Sobrada, cunha lonxitude de 1.061,56 m, está formada polos seguintes puntos:

Puntos	UTM ETRS89-H29 Coordenada X	UTM ETRS89-H29 Coordenada Y
1	526.707,63	4.651.396,36
2	526.673,78	4.651.409,54
3	526.548,68	4.651.438,95
4	526.471,60	4.651.465,54
5	526.447,23	4.651.463,92
6	526.300,87	4.651.434,40
7	525.872,64	4.651.345,81
8	525.672,08	4.651.307,64

As referencias catastrais obxecto de modificación polo deslindamento son:

Titular catastral CMVMC de Currás	36054A038002610000EW
Titular catastral CMVMC de Sobrada	36054A038002730000EF
	36054A038002740000EM
	36054A038002750000EO

Consideracións xurídicas:

Primeira. A Lei 7/2012, do 28 de xuño, de montes de Galicia, regula nos artigos 52 e 54 o procedemento de deslindamento de montes veciñais en man común e establece, entre outras, a obriga de publicar a resolución do Xurado no Diario Oficial de Galicia.

Segunda. Da documentación achegada polas comunidades e do informe técnico do Servizo de Montes desta xefatura territorial conclúese que a avinza entre as CMVMC de Currás e de Sobrada é congruente coas respectivas resolucións de clasificación e coas estremas nelas descritas.

Revisada a liña de deslindamento presentada, a documentación achegada e o informe técnico do Servizo de Montes da Xefatura Territorial da Consellería do Medio Rural de Pontevedra, este xurado, en atención ao disposto nos artigos 53, 54 e na disposición transitoria décimo cuarta da Lei 7/2013, de montes de Galicia, por unanimidade,

ACORDA:

Primeiro. Aprobar o deslindamento parcial realizado entre as CMVMC de Currás e de Sobrada, no Concello de Tomiño, respecto do seu linde común, nos termos indicados no antecedente de feito cuarto, e segundo os planos topográficos achegados e validados mediante informe técnico do Servizo de Montes.

Segundo. Notificar este acordo ás comunidades propietarias afectadas e publicalo no Diario Oficial de Galicia para dar cumprimento ao disposto na Lei 7/2012, do 28 de xuño, de montes de Galicia.

Contra a presente resolución, que pon fin á vía administrativa, poderase interpoñer recurso de reposición con carácter potestativo ante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo ante o Xulgado do Contencioso-Administrativo de Pontevedra no prazo de dous meses contados desde o día seguinte ao da súa publicación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Pontevedra, 15 de setembro de 2017

Antonio Crespo Iglesias
Presidente do Xurado Provincial de Clasificación de Montes
Veciñais en Man Común de Pontevedra