En cumprimento do disposto no artigo 82.1 da Lei 2/2016, do 10 de febreiro, do solo de Galicia, e no artigo 199.2 do Decreto 143/2016, do 22 de setembro, polo que se aproba o regulamento de desenvolvemento da lei anterior, infórmase que o Pleno municipal, na sesión que tivo lugar o 28 de xullo de 2017, adoptou, entre outros, o seguinte acordo:

«Primeiro. Aprobar definitivamente o documento denominado Modificación puntual do PXOM 2013 na praza de José Toubes Pego, para a previsión dunha parcela de equipamento público. Novembro 2016, redactado polos técnicos e xurídicos municipais.

Segundo. Ordenar a dilixencia do documento co selo de aprobación definitiva.

Terceiro. Realizar os trámites previstos nos artigos 82 e 88 da Lei 2/2016, do solo de Galicia; artigos 199 e 212 do Decreto 143/2016, regulamento para o desenvolvemento da lei anterior; e na Orde do 10 de marzo de 2017, pola que se establecen os modelos normalizados de solicitudes para a inscrición de datos no Rexistro de Planeamento Urbanístico de Galicia, na procura da entrada en vigor do documento aprobado.

Cuarto. Notificar este acordo ás áreas de Infraestruturas e Urbanismo, servizos de Licenzas e Disciplina Urbanística, Xestión do Solo, Edificación, servizos xerais de Urbanismo e Oficina dos SIX municipais».

Medidas adoptadas para o seguimento dos efectos no ambiente:

A Secretaría Xeral de Calidade e Avaliación Ambiental remitiu a Decisión do 18 de setembro de 2014 de non sometemento a avaliación ambiental estratéxica, na cal se conclúe que coa modificación puntual non se prevén efectos ambientais significativos, polo que non é necesario sometela ao procedemento de avaliación ambiental estratéxica. Non obstante o anterior, na decisión sinálase a necesidade de dar cumprimento ás observacións realizadas pola Dirección Xeral do Patrimonio Cultural e achegouse contestación á consulta, formulada polo Instituto de Estudos do Territorio.

As observacións formuladas por ambas as dúas administracións incorpóranse nos números 2.2 e 2.3 do documento da modificación aprobada.

O contido íntegro da modificación puntual do PXOM aprobada poderase consultar no enderezo electrónico www.coruna.gal/urbanismo, na epígrafe “planeamiento/planeamiento vigente”, ou ben, desde a mesma web, a través do Visor Estado Desarrollo PGOM 2013.

Contra este acordo, que pon fin á vía administrativa, cabe interpoñer directamente recurso contencioso-administrativo ante a Sala correspondente do Tribunal Superior de Xustiza de Galicia (artigo 84.1 da Lei do solo de Galicia e artigo 201.1 do regulamento de desenvolvemento da citada lei) no prazo de dous meses, que se contarán a partir do día seguinte ao da publicación deste anuncio, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa, sen prexuízo de interpoñer calquera outro recurso que se entenda máis procedente e sexa conforme dereito.

A Coruña, 4 de agosto de 2017

O alcalde
P.D. (Decreto do 15.6.2015)
Xiao Varela Gómez
Tenente alcalde responsable da Área de Rexeneración Urbana
e Dereito á Vivenda