Mediante o Acordo do Pleno, do 7 de xullo de 2017, en sesión ordinaria, aprobouse definitivamente, por maioría absoluta, o Plan especial de infraestruturas e dotacións no ámbito de Forxa, o que se publica para os efectos do artigo 92.2 da Lei 9/2002, do 30 de decembro, de ordenación urbanística e protección do medio rural de Galicia. O acordo literal adoptado é o seguinte:
«Aprobación definitiva do Plan especial de infraestruturas e dotacións no ámbito de Forxa.
Dáse lectura á proposta da Alcaldía para adoptar o seguinte acordo:
Primeiro. Aprobar definitivamente o Plan especial de infraestruturas e dotacións no ámbito de Forxa, coas modificacións resultantes das alegacións formuladas e dos informes emitidos.
Segundo. Publicar a aprobación definitiva no Diario Oficial de Galicia, para os efectos do establecido no artigo 82 da Lei 2/2016, do 10 de febreiro, do solo de Galicia (artigo 92.2 da Lei 9/2002). Esta publicación deberase realizar no prazo dun mes desde a adopción da aprobación definitiva.
Terceiro. Comunicar o acordo de aprobación definitiva, en virtude do artigo 88 da Lei 2/2016, de 10 de febreiro, do solo de Galicia, á consellería competente en materia de urbanismo, para a súa inscrición no Rexistro do Plan Urbanístico de Galicia, e achegar un exemplar en soporte dixital debidamente dilixenciado.
Cuarto. Notificar individualmente a aprobación definitiva do plan especial a todas as persoas titulares catastrais dos terreos afectados ás cales xa se lles notificou a súa aprobación inicial, de conformidade co artigo 186.4 do Regulamento da Lei 2/2016, do 10 de febreiro, do solo de Galicia, aprobado polo Decreto 143/2016, do 22 de setembro».
Contra este acordo, en aplicación do artigo 107.3 da Lei 30/1992, do 26 de novembro, de réxime xurídico das administracións públicas e do procedemento administrativo común, e dado que aproba unha disposición de carácter xeral, poderase interpoñer recurso contencioso-administrativo, ante a Sala do Contencioso-Administrativo do Tribunal Superior de Xustiza de Galicia, con sede na Coruña, no prazo de dous meses contados desde o día seguinte ao da publicación, de conformidade co artigo 46 da Lei 29/1998, do 13 de xullo, da xurisdición contencioso-administrativa. Todo isto sen prexuízo de que se poida interpoñer calquera outro recurso que se considere oportuno.
Porqueira, 13 de xullo de 2017
Blasinda Salgado Rivera
Alcaldesa en funcións