Conforme o disposto no artigo 70 do Real decreto lexislativo 5/2015, do 30 de outubro, polo que se aproba o texto refundido da Lei do Estatuto básico do empregado público; no artigo 19.Un.2.j) da Lei 3/2017, do 28 de xuño, de orzamentos xerais do Estado para o ano 2017; así como nos estatutos da Universidade de Santiago de Compostela (USC), e logo do informe favorable da Mesa de Negociación do Persoal Docente e Investigador da USC en sesións celebradas os días 28 de abril e 3 e 11 de maio de 2017, do informe favorable do Consello Social da Universidade de Santiago de Compostela, do 7 de xuño de 2017 e da aprobación polo Consello de Goberno da Universidade de Santiago de Compostela o día 12 de xuño de 2017, de creación de 15 prazas de profesorado contratado doutor, 10 prazas de profesor titular de universidade pola quenda libre e 10 prazas de catedrático de universidade pola quenda de promoción interna e unha vez obtida a autorización da Consellería de Facenda da Xunta de Galicia, con data 29 de xuño de 2017, tal e como se determina nos artigos 12 e 34 da Lei 1/2017, do 8 de febreiro, de orzamentos xerais da Comunidade Autónoma de Galicia para o 2017
RESOLVO:
Primeiro. Publicar a oferta de emprego público (OEP) do persoal docente e investigador da Universidade de Santiago de Compostela para o ano 2017, que consiste en 35 prazas de profesorado con vinculación permanente. Do total de prazas, 15 son de profesorado contratado doutor, e delas ofértanse 4 prazas para dar cumprimento á obriga de destinar un 15 % do total de prazas á incorporación de persoal investigador doutor que finalizase o Programa Ramón y Cajal e obtivera o certificado I3, tal e como se recolle no artigo 19.Un.2.j) da Lei 3/2017, 10 prazas de profesor titular de universidade pola quenda libre e 10 prazas de catedrático de universidade pola quenda de promoción interna.
Segundo. Esta OEP inclúe as necesidades de recursos humanos de carácter permanente no ámbito docente e investigador, con asignación orzamentaria, que non poden ser cubertas cos efectivos de persoal existentes, segundo se detalla no anexo, dentro do contexto global de restrición orzamentaria que afecta a todas as administracións públicas.
Terceiro. A planificación dos recursos humanos na USC oriéntase á atención das funcións prioritarias, á correcta dimensión do volume de efectivos e a potenciar a estabilización do seu persoal docente e investigador.
Cuarto. As convocatorias dos concursos derivados desta oferta publicaranse no Diario Oficial de Galicia e, de ser o caso, no Boletín Oficial del Estado, para garantir a publicidade e executaranse dentro do prazo máximo previsto no artigo 70 do Estatuto básico do empregado público.
Quinto. Coa finalidade de dar unha maior difusión ás convocatorias de concursos relacionados con esta oferta de emprego, así como dos actos que deriven deles, na páxina web do Servizo de Planificación de PDI da USC (http://www.usc.es/gl/servizos/profesorado), na sección de Convocatorias de prazas, poderase consultar a documentación correspondente.
Santiago de Compostela, 7 de xullo de 2017
Juan M. Viaño Rey
Reitor da Universidade de Santiago de Compostela
ANEXO
Oferta pública de emprego para o persoal docente e investigador da Universidade de Santiago de Compostela do ano 2017
Categoría |
Nº de prazas |
Sistema de acceso |
Profesor/a titular de universidade |
10 |
Quenda libre |
Profesor/a contratado/a doutor/a |
11 |
Quenda libre |
Profesor/a contratado/a doutor/a (reserva do 15 % para persoal investigador doutor que finalizase o programa Ramón y Cajal e obtivera o certificado I3) |
4 |
Quenda libre |
Catedrático/a de universidade |
10 |
Quenda promoción interna |