En sesión que tivo lugar o día 11 de xullo de 2017, o tribunal nomeado mediante a Orde do 24 de novembro de 2016 (DOG núm. 231, do 2 de decembro), para cualificar o proceso selectivo para o ingreso no corpo superior da Administración xeral da Comunidade Autónoma de Galicia, subgrupo A1, escala superior de estatísticos/as, adoptou os seguintes acordos:

Primeiro. De conformidade co disposto na base II.1.1.3 da convocatoria, superaron o terceiro exercicio os aspirantes que obtiveron unha puntuación mínima de cincuenta puntos (50 puntos).

Segundo. Publicar as puntuacións obtidas polos aspirantes que se presentaron ao terceiro exercicio do proceso selectivo de acordo co disposto na base II.1.2.8.

Terceiro. De conformidade co disposto na base II.1.2.8 da convocatoria, concédese un prazo de dez días hábiles para os efectos de presentar alegacións con relación ás puntuacións obtidas polos aspirantes, que se contarán desde a publicación no DOG desta resolución.

Cuarto. De acordo co disposto na base II.1.1.5 da convocatoria, os aspirantes que superaron o terceiro exercicio disporán dun prazo de dez (10) días hábiles, contados desde o día seguinte ao da publicación desta resolución no Diario Oficial de Galicia, para presentaren a documentación xustificativa (orixinais ou fotocopias compulsadas) de estar en posesión do Celga 4 ou o equivalente debidamente homologado polo órgano competente en materia de política lingüística da Xunta de Galicia, de acordo coa disposición adicional segunda da Orde do 16 de xullo de 2007 pola que se regulan os certificados oficiais acreditativos dos niveis de coñecemento da lingua galega (DOG núm. 146, do 30 de xullo).

Quinto. De acordo co disposto na base III.13 da convocatoria, contra esta resolución poderase interpoñer recurso de alzada, perante o conselleiro competente en materia de función pública, nos termos previstos nos artigos 121 e 122 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 11 de xullo de 2017

Manuel Mateo Díaz
Presidente do tribunal