Visto pola Sección Segunda da Sala do Contencioso-Administrativo do Tribunal Superior de Xustiza de Galicia o procedemento ordinario 4490/2011, en relación co Decreto 187/2011, da Xunta de Galicia, do 29 de setembro, polo que se suspende parcialmente a vixencia do Plan xeral de ordenación urbana do Concello de Ourense e se aproba a ordenación urbanística provisional ata a entrada en vigor do novo planeamento, interposto por Jorge Víctor Gil Carnicer, ditou a Sentenza 595/2016, do 6 de outubro, pola que se estima o recurso contencioso-administrativo interposto.
Polo tanto, de conformidade co disposto nos artigos 72 e 107 da Lei 29/1998, do 13 de xullo, reguladora da xurisdición contencioso-administrativa, e co fin de levar a puro e debido efecto a dita sentenza, resólvese dar publicidade á súa parte dispositiva, que a seguir se transcribe:
«Que debemos estimar e estimamos o recurso contencioso-administrativo interposto por Jorge Víctor Gil Carnicer contra o Decreto 187/2011, do 29 de setembro, da Consellería de Medio Ambiente, Territorio e Infraestruturas da Xunta de Galicia, polo que se suspende parcialmente o Plan xeral de ordenación urbana do Concello de Ourense e se aproba a ordenación urbanística provisional ata a entrada en vigor do novo planeamento e, conforme o instado, anulamos o referido Decreto 187/2011, no particular que aproba a ordenación urbanística provisional do nº 12 do anexo II do dito decreto, AR-39 E predio Mariñamansa, sen facer especial condena en custas.
Contra esta sentenza cabe interpor, ben ante o Tribunal Supremo, ben ante a correspondente sección desta sala, o recurso de casación previsto no artigo 86 da Lei xurisdicional, que deberá prepararse mediante escrito que se presentará nesta sala no prazo de trinta días e cumprindo os requisitos indicados no artigo 89.2 da dita lei».
Así mesmo, a Sección Segunda do Tribunal Superior de Xustiza de Galicia ditou auto no sentido de inadmitir a trámite o recurso de casación número 118/2016, preparado pola Xunta de Galicia e polo Concello de Ourense contra a Sentenza 595/2016, do 6 de outubro, pronunciada pola Sección Segunda da Sala do Contencioso-Administrativo do Tribunal Superior de Xustiza de Galicia.
Ourense, 19 de abril de 2017
Jesús Vázquez Abad
Alcalde presidente
