Os estatutos da Fundación Manuel Ventura Figueroa, elevados a documento público o 25 de marzo de 2013, estableceron no seu artigo 13 que o primeiro padroado, constituído conforme os presentes estatutos como definitivo, estará composto polos patróns membros do padroado provisional, segundo o disposto na Orde do 2 de maio de 2001, da Consellería de Presidencia e Administración Pública, pola que se modifica a do 2 de novembro de 1995 (DOG núm. 87, do 7 de maio de 2001), e nas demais ordes e resolucións que a desenvolven e aplican, e polo xuíz protector nomeado mediante Decreto 293/2000, do 28 de decembro (DOG núm. 1, do 2 de xaneiro de 2001).

Así mesmo, continúa o artigo 13 sinalando que o padroado se renovará, conforme o disposto no número 1 do presente artigo, aos catro anos da súa constitución, conforme os presentes estatutos.

Transcorrido o prazo previsto nos estatutos, anúnciase convocatoria pública para a determinación do parente máis próximo de Manuel Ventura Figueroa Barreiro, gobernador do Consello e Cámara de Castela, patriarca das Indias e arcebispo de Laodicea, fillo do matrimonio habido entre Manuel Cabanelas Figueroa e María Benita Barreiro Rodríguez e nado en Santiago de Compostela o día 21 de decembro de 1708, de acordo coas bases da convocatoria cuxo texto pode consultarse na seguinte páxina web (https://sites.google.com/site/fundacionmvfigueroa/):

1º. A acreditación do grao de parentesco con Manuel Ventura Figueroa levarase a cabo a través de calquera medio admitido en dereito.

2º. As persoas interesadas, no prazo dun mes contado a partir do seguinte ao da publicación deste anuncio no Diario Oficial de Galicia, remitirán toda a documentación que consideren oportuna para a acreditación do seu grao de parentesco, mediante solicitude, segundo o modelo anexo que figura nas bases da convocatoria, cuxo texto pode consultarse na páxina web (https://sites.google.com/site/fundacionmvfigueroa/), dirixida ao secretario xeral técnico da Consellería de Cultura, Educación e Ordenación Universitaria e vogal do padroado da Fundación Manuel Ventura Figueroa; Edificio Administrativo San Caetano, Santiago de Compostela.

Santiago de Compostela, 12 de abril de 2017

Román Rodríguez González
Presidente do Padroado da Fundación Manuel Ventura Figueroa