De conformidade co artigo 9 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, dáse publicidade á encomenda de xestión da Axencia Turismo de Galicia á Axencia Galega de Infraestruturas para a xestión de carácter técnico relativa á valoración das ofertas técnicas presentadas en expedientes de contratación relacionados co Camiño de Santiago, coas seguintes características:

– Actividade: emisión, por parte de persoal técnico cualificado da Axencia Galega de Infraestruturas, dun informe técnico de valoración das ofertas técnicas presentadas nos seguintes expedientes de contratación relacionados co Camiño de Santiago:

– Contratación, non suxeita a regulación harmonizada da obra por lotes do Proxecto de construción da recuperación, sinalización e mellora do camiño Inglés para adaptalo á nova delimitación oficial 2013-2014, polo procedemento aberto, tramitación anticipada, pluralidade de criterios e documentalmente simplificado, cofinanciado polo Fondo Europeo de Desenvolvemento Rexional (80 %), no marco do programa operativo Feder Galicia 2014-2020, no obxectivo temático 6, prioridade de investimento 6.3, obxectivo específico 6.3.2.

– Contratación, suxeita a regulación harmonizada, do servizo por lotes do mantemento integral e conservación do Camiño de Santiago, polo procedemento aberto, con pluralidade de criterios, tramitación anticipada.

– Contratación da obra de construción da recuperación, sinalización e mellora do camiño Fisterra-Muxía.

– Natureza e alcance da xestión encomendada: esta encomenda ten natureza intersubxectiva, ao realizarse entre entidades públicas pertencentes ao sector público autonómico dotadas de personalidade xurídica propia e ao ser a Axencia Galega de Infraestruturas medio propio e servizo técnico da Administración da Comunidade Autónoma de Galicia, segundo o disposto nos artigos 47 e 48 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.

– Prazo de vixencia da encomenda: ata o 31.12.2017.

– Causas de resolución: incumprimento total ou parcial dalgunha das condicións esenciais que regulan a presente encomenda de xestión, o transcurso do tempo estipulado sen que se realizasen as actividades acordadas, o mutuo acordo das partes asinantes e a denuncia por causas de interese público, por instancia de calquera das partes.

Santiago de Compostela, 21 de febreiro de 2017

Mª Nava Castro Domínguez
Directora da Axencia Turismo de Galicia