O Consello da Xunta de Galicia do 25 de abril de 2013 aprobou as guías para a habilitación electrónica de procedementos e servizos que teñen o obxectivo de axudar os órganos e unidades da Administración xeral e do sector autonómico de Galicia, na elaboración de normas que regulan procedementos administrativos e servizos e facilitar o cumprimento da normativa en materia de administración electrónica e simplificación administrativa.
As guías aprobadas están a ser unha importante axuda a todos os órganos e unidades da Administración xeral e do sector público autonómico de Galicia na elaboración de proxectos de disposicións administrativas que regulen procedementos administrativos ou servizos.
A publicación da Lei 39/2015, do 1 de outubro, do procedemento administrativo común das administracións públicas, e da Lei 40/2015, do 1 de outubro, de réxime xurídico do sector público, supoñen un novo escenario normativo base para a consolidación da administración dixital nas administracións públicas e, polo tanto, tamén na Administración xeral e o sector público autonómico de Galicia.
A Lei 39/2015 derroga expresamente a Lei 30/1992, do 26 de novembro, de réxime xurídico das administracións públicas e do procedemento administrativo común, e a Lei 11/2007, do 22 de xuño, de acceso electrónico dos cidadáns aos servizos públicos, que ata o de agora constituían a base normativa para o desenvolvemento da administración electrónica.
Deste xeito, dada a necesidade de actualizar as devanditas guías á nova lexislación vixente e á realidade social do tempo en que deben ser aplicadas, procedeuse a unha revisión e actualización completa do contido recollido nas guías para a habilitación electrónica de procedementos polos órganos con competencias horizontais en materia de administración electrónica e simplificación de procedementos administrativos.
Esta nova versión das guías recolle as previsións normativas actualizadas ás novas disposicións relativas ao impacto do desenvolvemento da administración dixital, tendo como referentes a Lei 39/2015, a Lei 40/2015 e as liñas establecidas no Plan de administración e goberno dixital Horizonte 2020.
Deste xeito, esta nova versión das guías que aquí se aproban configúranse como unha serie de directrices de emprego obrigatorio, cuxa finalidade é promover o uso das tecnoloxías da información e as comunicacións nas relacións entre a Administración pública e a cidadanía e entre as diferentes administracións, e dar cumprimento ás prescricións legais da administración electrónica en vigor.
Por todo o exposto,
RESOLVEMOS:
Primeiro. Aprobar a versión 2.0 das guías para a habilitación electrónica de procedementos, que entrarán en vigor o mesmo día da súa publicación.
Segundo. Publicar esta nova versión das guías na intranet da Xunta de Galicia, no enderezo http://intranet.xunta.gal/guias-habilitacion-procedementos, onde estarán permanentemente actualizadas.
Santiago de Compostela, 22 de decembro de 2016
Natalia Prieto Viso Directora xeral de Avaliación e Reforma Administrativa |
Mar Pereira Álvarez Directora da Axencia para a Modernización Tecnolóxica de Galicia |