A Xunta de Goberno da cidade de Santiago de Compostela, na sesión que tivo lugar o día 26 de xuño de 2015, aprobou inicialmente a modificación puntual do Plan de sectorización do SUNP-25 (Roxos), promovida pola Xunta de Compensación do citado polígono, segundo o proxecto presentado o día 22 de maio de 2015.

Co obxecto de dar cumprimento ao exixido polo artigo 10.3 do Real decreto lexislativo 2/2008, requiriuse da Xunta de Compensación diversa documentación relativa ás parcelas afectadas pola modificación.

Á vista da documentación presentada, a Xunta de Goberno da cidade de Santiago de Compostela, na súa sesión que tivo lugar o día 22 de abril de 2016, adoptou o seguinte acordo:

Primeiro. Aprobar o documento refundido da modificación puntual do Plan de sectorización do SUNP-25 (Roxos), presentado con data do 21 de marzo de 2016 pola Xunta de Compensación do SUNP-25, en Roxos, no que se integra a relación das parcelas e propietarios catastrais afectados pola modificación proposta.

Segundo. Ao abeiro do previsto polo apartado 2 da disposición transitoria segunda da Lei 2/2016, do 10 de febreiro, do solo de Galicia, continuar a tramitación do expediente segundo o procedemento regulado polo artigo 75 da nova lei.

En consecuencia, e de conformidade co que dispón o artigo 75.1.a) da LSG, o expediente someterase a información pública durante o prazo de dous meses, mediante anuncio que para o efecto se publicará no Diario Oficial de Galicia e nun xornal dos de maior difusión na provincia. Así mesmo, practicarase notificación persoal aos propietarios das parcelas afectadas segundo figuran no catastro, e publicarase edicto no Boletín Oficial del Estado para os efectos de que sirva de notificación a aqueles propietarios que non puideran ser citados persoalmente, segundo prevé o artigo 59.5 da Lei 30/1992, do 26 de novembro, de réxime xurídico das administracións públicas e do procedemento administrativo común.

A documentación sometida a información pública incluirá o documento inicialmente aprobado e o refundido presentado o 21 de marzo de 2016, así como o resumo executivo exixido polo artigo 25.3 do Real decreto lexislativo 7/2015.

Tamén se incluirá o documento de inicio remitido ao órgano ambiental, presentado polo promotor con data do 7 de novembro de 2014, e a decisión sobre a non necesidade de sometemento a avaliación ambiental estratéxica.

Así mesmo, e para os efectos do disposto polo artigo 25.3 do Real decreto lexislativo 7/2015, que substitúe o antigo artigo 10.3 do Real decreto lexislativo 2/2008, na documentación sometida a información pública, incluirase un resumo executivo co seguinte teor:

1. A modificación afecta a redacción das ordenanzas H, R1 e R2 do vixente Plan de sectorización do SUNP-25 (Roxos) aprobado definitivamente o 19 de maio de 2006, e cuxa regulación se contén nos artigos 15, 12 e 13 da normativa publicada no Boletín Oficial da provincia do día 24 de xullo de 2006.

2. As parcelas afectadas pola modificación figuran identificadas coa súa referencia catastral e localización no documento presentado o 21 de marzo de 2016 (plano C.01).

3. No ámbito da ordenanza H, parcela catastral 2077706NH3427E0000BQ, o obxecto da modificación é ampliar os usos autorizados polo artigo 15 da normativa vixente do Plan de sectorización, no senso de permitir, ademais do hoteleiro, os seguintes usos dotacionais, de titularidade pública ou privada: asistencial, sanitario, docente, sociocultural, deportivo, relixioso e institucional-administrativo. Así mesmo, incorpórase a ordenación resultante do estudo de detalle aprobado polo Concello o 26 de novembro de 2009, que poderá ser adaptado ou revisado a través dun novo estudo de detalle segundo a normativa de aplicación.

4. No ámbito das restantes parcelas afectadas, ordenanzas de vivenda unifamiliar R1 e R2, modifícanse as condicións de proxecto reguladas nos artigos 12 e 13 da normativa co fin de permitir a redacción dun estudo de detalle que asegure a coherencia e integración do conxunto, con carácter alternativo ou opcional á aprobación dun proxecto único de edificación de cada unha das illas definidas no Plan.

5. Dado o contido e alcance da modificación proposta, a súa aprobación inicial non impide o outorgamento das licenzas que resulten conformes coas determinacións do planeamento vixente (Plan de sectorización e estudo de detalle).

O que se publica co fin de que, durante o prazo de dous meses, contado a partir do día seguinte ao da publicación deste anuncio, os interesados poidan consultar o expediente no Servizo de Planeamento e Xestión e formular as alegacións que xulguen oportunas. Na páxina web do Concello www.santiagodecompostela.gal poderase consultar a documentación sometida a información pública.

Santiago de Compostela, 10 de maio de 2016

O alcalde
P.D. (DEC/3997/2015, do 18 de xuño)
Jorge Duarte Vázquez
Concelleiro delegado de Espazos Cidadáns, Dereito á Vivenda e Mobilidade