En sesión que tivo lugar o día 5 de outubro de 2016, o tribunal nomeado pola Orde do 13 de abril de 2016, da Consellería de Facenda (DOG núm. 74, do 19 de abril) para cualificar o proceso selectivo para o ingreso no corpo superior da Administración xeral da Comunidade Autónoma de Galicia, subgrupo A1, escala superior de finanzas, acordou, de conformidade co disposto na base II.2.6 da convocatoria, que o terceiro exercicio da oposición terá lugar o día vinte e sete (27) de outubro de 2016, nas aulas 2 e 6 da Escola Galega de Administración Pública, situada na rúa Madrid, 2-4 (As Fontiñas) de Santiago de Compostela, en chamamento único que se iniciará ás 15.30 horas.
Os aspirantes deberán ir provistos de DNI ou documento fidedigno acreditativo da súa identidade, a xuízo do tribunal, e de bolígrafo de tinta azul. Os aspirantes serán provistos de calculadora polo tribunal, e queda prohibido o uso de calculadoras distintas daquelas que se lles faciliten.
En relación cos textos legais dos cales se poderán servir para o desenvolvemento da segunda proba do exercicio, admitiranse as súas versións consolidadas, aquelas nas cales figuren notas de vixencia e/ou referencias cruzadas a outras normas e os subliñados simples sempre que non inclúan ningunha outra información, comentario doutrinal ou referencia xurisprudencial. Así mesmo, estará expresamente prohibida a utilización de libros de consulta, temarios, informes ou ditames de calquera tipo, e das resolucións do presidente do Instituto de Contabilidade e Auditoría de Contas.
Durante o desenvolvemento do exercicio, os membros do tribunal poderán examinar o material que está a utilizar cada aspirante e comprobar que se axusta ao establecido nos parágrafos anteriores. O manexo de textos normativos distintos dos permitidos determinará a expulsión do aspirante.
Non se permitirá o acceso ao recinto onde se realice o exercicio con teléfonos móbiles, reloxos intelixentes, axendas electrónicas ou calquera outro instrumento de que se poida valer o aspirante para auxiliarse na realización do exercicio. Non se habilitará no recinto ningún servizo de recollida de móbiles.
Santiago de Compostela, 5 de outubro de 2016
José Miguel Rey Lama
Presidente do tribunal