Advertidos erros na dita resolución, publicada no Diario Oficial de Galicia número 171, do 8 de setembro de 2016, cómpre facer as seguintes correccións:
Nas páxinas 39501 e 39502, artigo 4, onde di: «Poderá existir unha diferenciación entre o titular da instalación solicitada e a titularidade dos centros consumidores de enerxía. Nestes casos, se o solicitante forma parte do sector público deberá xustificarse o desenvolvemento do proxecto con convenios ou acordos asinados cos titulares dos centros consumidores de enerxía, acadando o 50 % do consumo enerxético previsto na súa solicitude. Por outra banda, o solicitante tamén poderá ser unha empresa de servizos enerxéticos que subministre enerxía térmica a distintos consumidores (sector público, empresas, residencial, entidades sen ánimo de lucro,...), sempre que se documente o servizo que se vai realizar, para o cal se terá en conta a documentación que se establece no punto 9.f), e se xustifiquen acordos cos centros consumidores con que se acaden un 50 % do consumo enerxético previsto na solicitude», debe dicir: «Poderá existir unha diferenciación entre o titular da instalación solicitada e a titularidade dos centros consumidores de enerxía. Nestes casos, se o solicitante forma parte do sector público, os centros de consumo deben ser públicos e deberá xustificarse o desenvolvemento do proxecto con convenios ou acordos asinados cos titulares dos centros consumidores de enerxía, acadando o 50 % do consumo enerxético previsto na súa solicitude. Por outra banda, o solicitante tamén poderá ser unha empresa de servizos enerxéticos que subministre enerxía térmica a distintos consumidores (sector público, empresas, residencial, entidades sen ánimo de lucro,...), sempre que se documente o servizo que se vai realizar, para o cal terá en conta a documentación que se establece no punto 9.f) e se xustifiquen acordos cos centros consumidores con que se acaden un 50 % do consumo enerxético previsto na solicitude. Nos casos en que as empresas de servizos enerxéticos sexan os beneficiarios, deberán facer constar a solicitude e/ou concesión da axuda ao abeiro destas bases reguladoras nos contratos que subscriban cos centros consumidores de enerxía, así como os compromisos derivados da axuda, en particular, o relativo á durabilidade dos investimentos nos termos previstos no artigo 71 do Regulamento (UE) nº 1303/2013».
Na páxina 39502, artigo 4, número 7, onde di: «As empresas en crise, agás cando se trate de réximes de axudas destinados a reparar os prexuízos causados por determinados desastres naturais», debe dicir: «Non poderán ter a condición de beneficiarias as empresas en crise».
Na páxina 39509, no artigo 9, letra d), eliminar onde di: «2. Salvo redes de calor urbana que subministren ao sector residencial, constancia por escrito do coñecemento por parte do titular ou titulares das instalacións de que se solicita a subvención».
Na páxina 39512, artigo 11, número 1, onde di: «As subvencións reguladas nestas bases están financiadas con fondos Feder e, polo tanto, serán incompatibles con calquera outra axuda que para o mesmo proxecto ou finalidade leve cofinanciamento comunitario, independentemente do fondo de procedencia e a súa tipoloxía (subvención directa, bonificación de xuros,...)», debe dicir: «As subvencións reguladas nestas bases están financiadas con fondos Feder e, polo tanto, serán incompatibles a nivel de partida de gasto con calquera outra axuda que leve cofinanciamento comunitario, independentemente do fondo de procedencia e a súa tipoloxía nos termos indicados no artigo 65.11 do Regulamento (UE) nº 1303/2013».
Na páxina 39516, artigo 15, número 4, letra a), onde di: «4.a. Grao de concreción do proxecto (8 puntos).
4.a.1. Documentación técnica (5 puntos):
Memoria técnica: 0 puntos.
Anteproxecto asinado por técnico competente: 3 puntos.
Proxecto técnico asinado por técnico competente: 5 puntos», debe dicir: «4.a. Grao de concreción do proxecto (7 puntos).
4.a.1. Documentación técnica (4 puntos):
Anteproxecto asinado por técnico competente: 2 puntos.
Proxecto técnico asinado por técnico competente: 4 puntos».
Na páxina 39517, artigo 15, número 4, letra c), onde di: «4.c. Porcentaxes de acordos cos centros consumidores (7 puntos).
– Acordos para a subministración do 100 % do consumo enerxético previsto na solicitude: 7 puntos», debe dicir: «4.c. Porcentaxes de acordos cos centros consumidores (6 puntos).
– Acordos para a subministración do 100 % do consumo enerxético previsto na solicitude: 6 puntos».
