De conformidade co exposto no artigo 31 do Decreto 428/1993, do 17 de decembro, polo que se regula e refunde a normativa en materia de formación náutico-pesqueira na Comunidade Autónoma de Galicia, a Dirección Xeral de Desenvolvemento Pesqueiro habilitará, para impartir os cursos de formación para acuicultoras/es, o profesorado que superen os cursos específicos que se convoquen para o efecto.
Dada a demanda existente no sector acuícola de participación en cursos de formación, especialmente aqueles orientados á mellora de técnicas, habilidades e recursos para exercer con criterio responsable a actividade profesional da acuicultura, resulta necesario habilitar profesorado para impartir estes cursos.
Visto que este tipo de formación require para a súa impartición dispoñer das especialidades que demanden os seus contidos, e que serían fundamentalmente para cubrir as áreas relacionadas coa acuicultura e a formación pedagóxica.
Por todo o exposto,
DISPOÑO:
Primeiro. Obxecto
Convocar un curso de formación de formadores que capacite para a impartición dos cursos de formación en acuicultura, que se inscribirán nun rexistro que dependerá da Dirección Xeral de Desenvolvemento Pesqueiro, e será responsable do seu mantemento o servizo con atribucións en ensinanzas marítimo-pesqueiras.
Este curso poderá ser financiado nun 75 % polo Fondo Europeo Marítimo e de Pesca (FEMP), no marco do Programa operativo para España do FEMP 2014-2020, na medida 2.5.1, conforme o artigo 50 do Regulamento (UE) 508/2014.
Segundo. Destinatarios/as
Poderán participar no curso as persoas en posesión das titulacións académicas de licenciatura ou grao de bioloxía, ciencias do mar, veterinaria ou enxeñaría de montes e titulados de ciclo formativo superior en acuicultura, en situación laboral de desemprego ou en activo que non presten servizos nas administracións públicas e noutras entidades oficiais.
Terceiro. Organización
1. O número de prazas máximo admisible será de 20 persoas, das cales un mínimo de 5 estarán reservadas ás titulacións de técnico superior en Produción Acuícola ou técnico superior en Acuicultura.
2. A duración do curso será de 100 horas lectivas, distribuídas en dous módulos:
2.1. Módulo xeral de formación destinado a adquirir competencias pedagóxicas e didácticas necesarias para formación no ámbito empresarial e na formación non regrada.
2.2. Módulo específico de acuicultura e do deseño, planificación e xestión de accións formativas en acuicultura.
3. O curso terá lugar no Instituto Galego de Formación en Acuicultura (IGAFA), na Illa de Arousa.
4. As datas previstas de realización están comprendidas entre o 1 de novembro e o 15 de decembro de 2016.
5. Terá lugar en sesións de mañá e tarde.
A asistencia ás sesións do curso será en todo caso obrigatoria. As faltas de asistencia non poderán superar en ningún caso o 10 % das horas lectivas e sempre terá que acreditarse unha causa xustificada. As persoas que incumpran o antedito perderán o dereito ao certificado de participación do curso e a ser inscritas no rexistro de formador/a de formadores/as.
A Dirección Xeral de Desenvolvemento Pesqueiro poderá modificar o desenvolvemento e os contidos do curso anunciado co fin de adaptalo ás necesidades da Administración, así como ás distintas continxencias que poidan xurdir.
Cuarto. Selección de aspirantes
Á vista do currículo presentado por cada aspirante, o Servizo de Ensino e Titulacións Náutico-Pesqueiras realizará unha preselección deles. O baremo que se empregará basearase nos seguintes criterios:
1. Titulacións académicas diferentes a aquela pola cal se accede á convocatoria: 20 puntos:
1.1. Titulación universitaria de grao superior ou equivalente: 20 puntos.
1.2. Titulación universitaria de grao medio ou equivalente: 10 puntos.
2. Situación laboral, ata un máximo de 15 puntos:
2.1. Desempregado: 0,25 puntos por cada mes en situación de desemprego nos últimos cinco anos anteriores á convocatoria.
3. Experiencia profesional en actividades de acuicultura, ata un máximo de 25 puntos:
3.1. Por cada mes en activo: 1 punto.
4. Experiencia docente en formación de adultos, ata un máximo de 10 puntos:
4.1. En organismos oficiais.
4.1.1. Por cada curso impartido de 100 ou máis horas: 1 punto.
4.1.2. Por cada curso ou charlas de duración inferior a 100 horas: 0,02 puntos.
4.2. En entidades privadas de formación.
4.2.1. Por cada curso impartido de 100 ou máis horas: 0,5 puntos.
4.2.2. Por cada curso ou charla de duración inferior a 100 horas: 0,01 puntos.
5. Grao de coñecemento do idioma galego, ata un máximo de 2,5 puntos (só se valorará o nivel máximo acadado):
5.1. Celga III: 1,25 puntos.
5.2. Celga IV: 2,5 puntos.
6. Cursos de formación complementaria, relevantes para o exercicio da actividade de formación acuícola, ata un máximo de 7,5 puntos:
6.1. Metodoloxía didáctica, de duración igual ou superior a 100 horas: 0,5 puntos.
6.2. Formación de formadores/as, de duración igual ou superior a 100 horas: 0,5 puntos.
6.3. Cursos de adaptación pedagóxica de duración igual ou superior a 100 horas: 0,5 puntos.
6.4. Outros cursos de acuicultura de duración igual ou superior a 100 horas: 0.5 puntos.
Aplicado o citado baremo, a lista provisional de aspirantes farase pública no taboleiro de anuncios da Dirección Xeral de Desenvolvemento Pesqueiro e das xefaturas territoriais da Consellería do Mar e na web da Consellería do Mar. Contra a citada lista as persoas interesadas poderán interpoñer reclamacións no prazo de 10 días naturais ante a directora xeral de Desenvolvemento Pesqueiro.
Transcorrido ese prazo e examinadas as reclamacións, se as houbese, elaborarase a lista definitiva, que será exposta nos lugares sinalados no punto anterior. As persoas que estean nos vinte primeiros postos da lista definitiva serán as admitidas para realizar o curso e as seguintes persoas constituirán unha lista de reserva por orde de puntuación por se hai algunha vacante antes de cumprirse o 10 % do curso.
Cando unha persoa das seleccionadas para realizar o curso non poida asistir, deberá comunicalo por escrito á Dirección Xeral de Desenvolvemento Pesqueiro co fin de poder cubrir as vacantes do curso.
Quinto. Presentación de solicitudes
As solicitudes deberán presentarse preferiblemente por vía electrónica a través do formulario normalizado dispoñible na sede electrónica da Xunta de Galicia, https://sede.xunta.es, de acordo co establecido nos artigos 27 da Lei 11/2007, do 22 de xuño, de acceso electrónico dos cidadáns aos servizos públicos, e 24 do Decreto 198/2010, do 2 de decembro, polo que se regula o desenvolvemento da Administración electrónica na Xunta de Galicia e nas entidades dela dependentes.
Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.es/chave365).
Opcionalmente, tamén se poderán presentar as solicitudes en soporte papel en calquera dos lugares e rexistros establecidos no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común, utilizando o formulario normalizado dispoñible na sede electrónica da Xunta de Galicia.
Xuntaráselle á solicitude a seguinte documentación:
– Copia do DNI ou NIE da persoa solicitante, só no caso de non autorizar a súa consulta.
– Copia da titulación académica diferente a aquela pola cal se accede á convocatoria, se é o caso (punto cuarto 1), só no caso de non autorizar a súa consulta.
– Acreditación da situación de desemprego nos anos anteriores á convocatoria, se é o caso. Só terá que presentarse se non autoriza expresamente a súa verificación (punto cuarto 2).
– Acreditación da experiencia profesional en acuicultura, se é o caso (punto cuarto 3).
– Acreditación da experiencia docente en formación de adultos, se é o caso (punto cuarto 4).
– Acreditación do grao de coñecemento do idioma galego, se é o caso (punto cuarto 5), só no caso de non autorizar a súa consulta.
– Copia dos cursos de formación complementaria relevantes para o exercicio da actividade de formación acuícola, se é o caso (punto cuarto 6).
Os datos que non se acrediten debidamente non se valorarán no proceso de selección. Para acreditar a situación laboral será necesaria a presentación dun certificado oficial da vida laboral expedido pola Tesouraría Xeral da Seguridade Social.
A documentación complementaria poderá presentarse electronicamente utilizando calquera procedemento de copia dixitalizada do documento orixinal. Neste caso, as copias dixitalizadas presentadas garantirán a fidelidade co orixinal baixo a responsabilidade da persoa solicitante ou representante. A Administración poderá requirir a exhibición do documento orixinal para o cotexo da copia electrónica presentada segundo o disposto nos artigos 35.2 da Lei 11/2007, do 22 de xuño, de acceso electrónico dos cidadáns aos servizos públicos, e 22.3 do Decreto 198/2010, do 2 de decembro, polo que se regula o desenvolvemento da Administración electrónica na Xunta de Galicia e nas entidades dela dependentes.
A documentación complementaria tamén poderá presentarse en formato papel en calquera dos lugares e rexistros establecidos no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común.
As copias dos documentos gozarán da mesma validez e eficacia que os seus orixinais sempre que exista constancia de que sexan auténticas.
Sempre que se realice a presentación de documentos separadamente da solicitude, a persoa interesada ou representante deberá mencionar o código e o órgano responsable do procedemento, o número de expediente e o número ou código único de rexistro.
A sede electrónica da Xunta de Galicia ten á disposición das persoas interesadas unha serie de modelos normalizados dos trámites máis comunmente utilizados na tramitación administrativa, que poderán ser presentados en calquera dos lugares e rexistros establecidos no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común.
O prazo de presentación de instancias será de vinte (20) días naturais, contados a partir do día seguinte ao da publicación desta resolución.
Sexto. Consentimentos e autorizacións
A tramitación do procedemento require a incorporación de datos en poder das administracións públicas. Polo tanto, os modelos de solicitude incluirán autorizacións expresas ao órgano xestor para realizar as comprobacións oportunas que acrediten a veracidade dos datos. No caso de que non se autorice o órgano xestor para realizar esta operación, deberán achegarse os documentos comprobantes dos datos, nos termos exixidos polas normas reguladoras do procedemento.
A persoa solicitante deberá sinalar na solicitude se autoriza a Consellería do Mar para consultar os seus datos de identidade no Sistema de verificación de datos de identidade do Ministerio de Facenda e Administracións Públicas, de conformidade co artigo 2 do Decreto 255/2008, do 23 de outubro, e a Orde do 7 de xullo de 2009 da Consellería de Presidencia, Administracións Públicas e Xustiza. No caso de sinalar que non autoriza deberá achegar a documentación correspondente.
A persoa solicitante deberá sinalar na solicitude se autoriza a Consellería do Mar para consultar os seus datos relativos á situación de desemprego que constan en poder da Xunta de Galicia, de conformidade co artigo 6.2.b) da Lei 11/2007, do 22 de xuño, de acceso electrónico dos cidadáns aos servizos públicos. No caso de sinalar que non autoriza, deberá achegar a documentación correspondente.
En cumprimento do disposto no artigo 5 da Lei orgánica 15/1999, do 13 de decembro, de protección de datos de carácter persoal, infórmase de que os datos persoais das persoas solicitantes quedarán rexistrados nun ficheiro de titularidade da Xunta de Galicia co obxecto de xestionar o presente procedemento. A persoa interesada poderá exercer os dereitos de acceso, rectificación, cancelación e oposición ante a Secretaría Xeral Técnica da Consellería do Mar, como responsable do ficheiro, solicitándoo mediante o envío dun correo electrónico a sxt.mar@xunta.gal
Sétimo. Certificados de aptitude
Ao remate do curso expedirase un certificado de aptitude a aqueles/as participantes que superasen con aproveitamento o curso de acordo coa avaliación do equipo de profesores. O dito certificado terá validez ante a Consellería do Mar como documento acreditativo da habilitación a que se refire o artigo 32 do Decreto 428/1993, do 17 de decembro, polo que se regula e refunde a normativa en materia de formación náutico-pesqueira na Comunidade Autónoma de Galicia.
Santiago de Compostela, 1 de agosto de 2016
Susana Rodríguez Carballo
Directora xeral de Desenvolvemento Pesqueiro