No 15 de xullo de 2016 o director de Augas de Galicia ditou a seguinte resolución:

«Primeiro. Aprobar o padrón cobratorio que contén a relación de debedores e os importes de canon da auga e coeficiente de vertedura declarados como non pagos nas autoliquidacións correspondentes aos anos 2012, 2013 e 2014, así como en autoliquidacións do ano 2015 correspondentes a consumos dos anos 2012 e 2013, polas respectivas entidades subministradoras de auga relativos aos usos asimilados a domésticos, non domésticos e específicos da auga.

Segundo. Expoñer ao público, para a súa notificación colectiva, na Área de Réxime Económico-Financeiro de Augas de Galicia, con enderezo na praza de Camilo Díaz Baliño, 7-9, en Santiago de Compostela, o referido padrón polo prazo dun mes a partir do día seguinte á inserción do correspondente anuncio no Diario Oficial de Galicia, e os debedores ou os seus representantes deberán comparecer no dito prazo no citado enderezo das 9.00 ás 14.00 horas, de luns a venres.

Transcorrido o mencionado prazo sen efectuarse a comparecencia, a notificación entenderase producida desde o día seguinte ao do vencemento do prazo sinalado para comparecer.

Advertencias:

Recursos:

Contra as liquidacións que figuran no indicado padrón de debedores os interesados poderán interpoñer, alternativamente, recurso de reposición ante o director de Augas de Galicia ou ben reclamación económico-administrativa ante a Xunta Superior de Facenda (Consellería de Facenda), no prazo dun mes a partir do día seguinte a aquel en que se notifiquen por comparecencia as liquidacións ou, se for o caso, desde que se entende notificada por falta de comparecencia.

En calquera dos casos anteriores o escrito de interposición dirixirase ao director de Augas de Galicia.

Lugar e prazo de pagamento:

O pagamento das liquidacións deberá realizarse en calquera das oficinas de Abanca nos prazos seguintes en función da data en que se notifique por comparecencia ou, se for o caso, se entenda notificada a liquidación por non comparecencia:

– Polas liquidacións notificadas ou que se entendan notificadas entre os días 1 e 15 de cada mes, ata o día 20 do mes seguinte.

– Polas liquidacións notificadas ou que se entendan notificadas entre os días 16 e último de cada mes, ata o día 5 do segundo mes posterior.

No caso de que o último día de pagamento non sexa hábil, estenderase o prazo de pagamento ata o inmediato hábil seguinte.

Unha vez transcorridos os devanditos prazos, procederase á recadación en vía executiva.

Forma de pagamento:

Aqueles contribuíntes que comparezan dentro do prazo sinalado poderán efectuar o pagamento mediante a carta de pagamento que se lles entregará no momento de compareceren.

Aqueles contribuíntes que non comparezan dentro do prazo sinalado poderán efectuar o pagamento mediante a carta de pagamento que recibirán no seu domicilio. No caso de que non reciban a carta de pagamento no seu domicilio ou a extravíen, poderán dirixirse a Augas de Galicia para solicitaren a carta de pagamento para poder efectuar o seu pagamento».

Santiago de Compostela, 18 de xullo de 2016

Roberto Rodríguez Martínez
Director de Augas de Galicia