De conformidade co establecido na disposición adicional quinta do Decreto 206/2005, do 22 de xullo de provisión de prazas de persoal estatutario do Servizo Galego de Saúde (DOG núm. 145, do 29 de xullo), e con base nos criterios reitores para mobilidade interna no ámbito de atención especializada aprobadas pola mesa sectorial o 23 de decembro de 2009, e tras as negociacións mantidas coas seccións sindicais CC.OO., CIG, CSIF, USAE e UGT, asináronse, o 6 de maio de 2016, as bases da convocatoria do concurso de mobilidade interna do persoal estatutario fixo das categorías de persoal sanitario diplomado e sanitario de formación profesional do Hospital Virxe da Xunqueira.

A Xerencia de Xestión Integrada da Coruña, con base nas competencias atribuídas polo Decreto 43/2013, do 21 de febreiro (DOG núm. 47, do 7 de marzo), polo que se establece a estrutura orgánica do Servizo Galego de Saúde, modificado polo Decreto 111/2013, do 4 de xullo (DOG núm. 140, do 24 de xullo), e na Orde do 5 de xullo de 2012 (DOG núm. 139, do 20 de xullo), sobre delegación de competencias en órganos centrais e periféricos do Servizo Galego de Saúde,

RESOLVE:

Anunciar a convocatoria do procedemento de mobilidade interna do persoal estatutario fixo das categorías de enfermeiro/a e técnico/a en coidados auxiliares de enfermaría do Hospital Virxe da Xunqueira.

As bases íntegras da presente convocatoria estarán expostas nos taboleiros de anuncios do Hospital Virxe da Xunqueira e na páxina web do espazo do profesional.

As solicitudes para participar no presente procedemento axustaranse necesariamente ao formulario electrónico existente na oficina virtual do profesional (FIDES/procesos/mobilidade voluntaria interna) e, tras a súa formalización electrónica, unha vez impresa, deberá presentarse no Rexistro do Hospital Virxe da Xunqueira ou en calquera dos rexistros referidos no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común. O prazo de presentación de solicitudes será dun mes a partir do día seguinte ao da publicación no Diario Oficial de Galicia.

Contra esta resolución e as bases do procedemento poderá interpoñerse recurso de alzada, ante a Dirección Xeral de Recursos Humanos do Servizo Galego de Saúde, no prazo dun mes contado a partir do día seguinte ao da súa publicación, nos termos dos artigos 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común, segundo a redacción dada pola Lei 4/1999, do 13 de xaneiro.

A Coruña, 9 de maio de 2016

Francisco José Vilanova Fraga
Xerente de Xestión Integrada da Coruña